AKP តាកែវ ថ្ងៃទី១៩ ខែកញ្ញា ឆ្នាំ២០២៦-- លោក កឹម ចណ្ណារិទ្ធ ប្រធានសាខាបេឡាជាតិសន្តិសុខសង្គមខេត្តតាកែវ លោក សោ សុផល អភិបាលរងនៃគណៈអភិបាលក្រុងដូនកែវ បានអញ្ជើញជាគណៈអធិបតីក្នុងពិធីបើកកម្មវិធីផ្សព្វផ្សាយស្ដីពី គោលការណ៍ បទប្បញ្ញត្តិច្បាប់ និងអត្ថប្រយោជន៍របបសន្តិសុខសង្គម ជូនដល់បុគ្គលស្ថិតក្នុងវិស័យសាធារណៈ ក្នុងភូមិសាស្រ្តក្រុងដូនកែវ។ក្នុងពិធីនោះដែរក៏មានការអញ្ជើញចូលរួមដោយប្រធាន អនុប្រធានការិយាល័យ អង្គភាព និងមន្ត្រីរាជការចំណុះរដ្ឋបាលក្រុងដូនកែវ។ពិធីនេះរៀបចំឡើងនៅសាលប្រជុំ សាខាបេឡាជាតិសន្តិសុខសង្គម(ប.ស.ស)ខេត្តតាកែវ កាលពីថ្ងៃទី១៨ ខែកញ្ញា ឆ្នាំ២០២៦។

ក្នុងឱកាសនោះ លោក សោ សុផល អភិបាលរងនៃគណៈអភិបាលក្រុងដូនកែវ បានមានប្រសាសន៍សំណេះសំណាល និងណែនាំដល់លោក លោកស្រី ដែលជាអាជ្ញាធរមូលដ្ឋាននៃសង្កាត់ទាំងបី ព្រមទាំងអ្នកពាក់ព័ន្ធដែលបានចូលរួមក្នុងកម្មវិធី ឱ្យយកចិត្តទុកដាក់ក្រសោបយកចំណេះដឹង និងព័ត៌មានដ៏មានសារៈសំខាន់ទាំងនេះ។ដើម្បីយកទៅផ្សព្វផ្សាយបន្តដល់មន្ត្រីរាជការ លោកគ្រូ អ្នកគ្រូ និងបងប្អូនប្រជាពលរដ្ឋក្នុងមូលដ្ឋានឱ្យបានយល់ដឹងកាន់តែច្បាស់ ក្នុងការចុះឈ្មោះប្រើប្រាស់សេវា ប.ស.ស សំដៅទទួលបានការគាំពារសុខភាព និងកាត់បន្ថយបន្ទុកចំណាយផ្សេងៗក្នុងគ្រួសារ។

លោកអភិបាលរងក្រុងដូនកែវបានមានប្រសាសន៍បន្តថា ការចុះឈ្មោះ និងការប្រើប្រាស់បណ្ណ ប.ស.ស. គឺជាគោលនយោបាយគាំពារសង្គមដ៏សំខាន់របស់រាជរដ្ឋាភិបាល ក្នុងការធានាសុវត្ថិភាពប្រាក់ចំណូល និងលើកកម្ពស់សុខុមាលភាពប្រជាពលរដ្ឋ។ដូច្នេះអាជ្ញាធរមូលដ្ឋានគ្រប់លំដាប់ថ្នាក់ ត្រូវធ្វើជាស្ពានចម្លងព័ត៌មាន និងសម្របសម្រួលជួយដល់ប្រជាពលរដ្ឋ ឱ្យទទួលបានសិទ្ធិ និងអត្ថប្រយោជន៍ជាសារវន្តទាំងនេះ ឱ្យបានគ្រប់ៗគ្នាប្រកបដោយបរិយាបន្ន និងសមធម៌សង្គម។

ជាមួយគ្នានោះ លោក កឹម ចណ្ណារិទ្ធ ប្រធានសាខាបេឡាជាតិសន្តិសុខសង្គម (ប.ស.ស.) ខេត្តតាកែវ ក៏បានមានប្រសាសន៍បញ្ជាក់បន្ថែមថា សាខា ប.ស.ស.ខេត្តតាកែវ រង់ចាំទទួលនិងបម្រើសេវាជូនបងប្អូនប្រជាពលរដ្ឋ មន្ត្រីរាជការ កម្មករ និងនិយោជិតទាំងអស់ដោយក្តីរីករាយ និងប្រកបដោយការទទួលខុសត្រូវខ្ពស់។លោកប្រធានសាខាក៏បានធ្វើការអំពាវនាវ ដល់ភាគីពាក់ព័ន្ធទាំងអស់ ឱ្យរួមគ្នាជំរុញការចុះឈ្មោះចូលជាសមាជិក ប.ស.ស. ឱ្យបានកាន់តែទូលំទូលាយបន្ថែមទៀត។ដើម្បីធានាថាប្រជាពលរដ្ឋគ្រប់រូបទទួលបាននូវការថែទាំសុខភាព សេវាពិនិត្យព្យាបាលជំងឺ និងរបបសន្តិសុខសង្គមប្រកបដោយសមធម៌ សុវត្ថិភាព និងប្រសិទ្ធភាពខ្ពស់បំផុត៕

ដោយ អ៊ុច សៀង