AKP  បន្ទាយមានជ័យ ថ្ងៃទី១៧ ខែកញ្ញាឆ្នាំ២០២៦– ការកំណត់ឱ្យបានច្បាស់លាស់នូវព្រំប្រទល់រដ្ឋបាលឃុំ-សង្កាត់ មិនត្រឹមតែជាការងារបច្ចេកទេសពាក់ព័ន្ធនឹងផែនទីប៉ុណ្ណោះទេ ប៉ុន្តែជាមូលដ្ឋានដ៏សំខាន់សម្រាប់ការរៀបចំរដ្ឋបាល ការផ្តល់សេវាសាធារណៈ ការអភិវឌ្ឍមូលដ្ឋាន និងការគ្រប់គ្រងដីធ្លីឱ្យមានប្រសិទ្ធភាព និងច្បាស់លាស់។

នេះជាការលើកឡើងរបស់ឯកឧត្តម ឡោ ដាវុធ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ តំណាងដ៏ខ្ពង់ខ្ពស់ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់។

ការលើកឡើងនេះធ្វើឡើងក្នុងពិធីចុះហត្ថលេខាលើផែនទីព្រំប្រទល់រដ្ឋបាលឃុំ-សង្កាត់ក្នុងភូមិសាស្ត្រខេត្តបន្ទាយមានជ័យ ដែលបានរៀបចំឡើងនៅសាលប្រជុំ ក សាលាខេត្តបន្ទាយមានជ័យ នាព្រឹកថ្ងៃទី១៧ ខែកញ្ញា ឆ្នាំ២០២៦ ដោយមានការអញ្ជើញចូលរួមពីឯកឧត្តម អ៊ុ រាត្រី អភិបាល នៃគណៈអភិបាលខេត្តបន្ទាយមានជ័យ ឯកឧត្តម ប្លែក វ៉ារី ប្រធានក្រុមប្រឹក្សាខេត្ត ឯកឧត្តម វុឌ្ឍី រណ្ណារ៉ា អគ្គនាយក អគ្គនាយកដ្ឋានសុរិយោដី នៃក្រសួងរៀបចំដែនដី នគរូបនីយកម្ម និងសំណង់ លោក សាន ចំរើន អគ្គនាយករង នៃអគ្គនាយកដ្ឋានរដ្ឋបាល ក្រសួងមហាផ្ទៃ ព្រមទាំងអភិបាលរងខេត្តបាត់ដំបង ខេត្តឧត្តរមានជ័យ អភិបាលក្រុង-ស្រុកទាំង៩ ប្រធានមន្ទីរ-អង្គភាពជុំវិញខេត្ត មេឃុំ-ចៅសង្កាត់ និងស្មៀនឃុំ-សង្កាត់។

ឯកឧត្តម ឡោ ដាវុធ បានបញ្ជាក់ថា ការចុះហត្ថលេខាលើផែនទីព្រំប្រទល់រដ្ឋបាលឃុំ-សង្កាត់ គឺជាជំហានសំខាន់មួយក្នុងការធានាឱ្យការបែងចែក និងគ្រប់គ្រងដែនរដ្ឋបាលនៅមូលដ្ឋានមានភាពច្បាស់លាស់ ស្របតាមស្ថានភាពជាក់ស្តែង និងអាចយកទៅប្រើប្រាស់ជាមូលដ្ឋានក្នុងការអនុវត្តការងាររដ្ឋបាលបានកាន់តែមានប្រសិទ្ធភាព។

ឯកឧត្តមបានគូសបញ្ជាក់ថា ផែនទីព្រំប្រទល់រដ្ឋបាលដែលមានភាពច្បាស់លាស់ មានសារៈសំខាន់សម្រាប់ស្ថាប័នពាក់ព័ន្ធ និងរដ្ឋបាលថ្នាក់ក្រោមជាតិ ក្នុងការរៀបចំផែនការអភិវឌ្ឍន៍ ការគ្រប់គ្រងធនធាន ការផ្តល់សេវាសាធារណៈ និងការអនុវត្តមុខងាររដ្ឋបាលនៅក្នុងដែនសមត្ថកិច្ចរបស់ខ្លួន។

ជាមួយគ្នានេះ ការកំណត់ព្រំប្រទល់ឱ្យបានច្បាស់លាស់ ក៏ជាកត្តាដែលអាចជួយកាត់បន្ថយភាពមិនច្បាស់លាស់ក្នុងការគ្រប់គ្រងដែនដីនៅមូលដ្ឋាន ជាពិសេសនៅតំបន់ដែលមានការតភ្ជាប់ព្រំប្រទល់រវាងឃុំ-សង្កាត់ ឬរវាងស្រុក-ក្រុង និងខេត្តជាប់គ្នា។ ការមានឯកសារ និងផែនទីដែលមានភាពច្បាស់លាស់ នឹងជួយឱ្យអាជ្ញាធរគ្រប់លំដាប់ថ្នាក់អាចអនុវត្តការងារបានស្របគ្នា និងមានមូលដ្ឋានយោងជាក់លាក់។

ឯកឧត្តម ឡោ ដាវុធ ក៏បានអំពាវនាវដល់អាជ្ញាធរមូលដ្ឋាន និងមន្ត្រីពាក់ព័ន្ធ បន្តយកចិត្តទុកដាក់លើការអនុវត្តការងារពាក់ព័ន្ធនឹងព្រំប្រទល់រដ្ឋបាលឱ្យបានត្រឹមត្រូវ តាមផែនទី និងឯកសារដែលបានឯកភាព និងចុះហត្ថលេខា ព្រមទាំងសហការគ្នាយ៉ាងជិតស្និទ្ធ ដើម្បីធានាឱ្យការគ្រប់គ្រងដែនដីនៅមូលដ្ឋានប្រព្រឹត្តទៅដោយមានរបៀបរៀបរយ និងប្រសិទ្ធភាព។

ក្នុងឱកាសនោះ ឯកឧត្តម អ៊ុ រាត្រី បានបង្ហាញការគាំទ្រចំពោះការងារកំណត់ និងបញ្ជាក់ព្រំប្រទល់រដ្ឋបាលនៅក្នុងខេត្តបន្ទាយមានជ័យ ដោយចាត់ទុកថា ការងារនេះមានសារៈសំខាន់ចំពោះការពង្រឹងការគ្រប់គ្រងរដ្ឋបាលនៅថ្នាក់មូលដ្ឋាន និងជួយបង្កើតភាពច្បាស់លាស់សម្រាប់ការអនុវត្តការងាររបស់ឃុំ-សង្កាត់ ក្រុង-ស្រុក និងរដ្ឋបាលខេត្ត។

ការចុះហត្ថលេខានាពេលនេះ ក៏បង្ហាញពីកិច្ចសហការរវាងក្រសួងស្ថាប័នពាក់ព័ន្ធ និងរដ្ឋបាលថ្នាក់ក្រោមជាតិ ក្នុងការធ្វើឱ្យការគ្រប់គ្រងដែនដីមានប្រព័ន្ធ និងមានមូលដ្ឋានទិន្នន័យច្បាស់លាស់។ ជាពិសេស ការចូលរួមរបស់មេឃុំ-ចៅសង្កាត់ និងស្មៀនឃុំ-សង្កាត់ ដែលជាអ្នកអនុវត្តការងារផ្ទាល់នៅមូលដ្ឋាន គឺជាផ្នែកមួយដ៏សំខាន់ក្នុងការធានាថា ព័ត៌មានពាក់ព័ន្ធនឹងព្រំប្រទល់រដ្ឋបាលត្រូវបានយល់ដឹង និងអនុវត្តបានត្រឹមត្រូវ។

សម្រាប់ខេត្តបន្ទាយមានជ័យ ដែលជាខេត្តមានសកម្មភាពសេដ្ឋកិច្ច សង្គម និងការអភិវឌ្ឍកំពុងបន្តកើនឡើង ការមានផែនទីព្រំប្រទល់រដ្ឋបាលដែលមានភាពច្បាស់លាស់ នឹងក្លាយជាមូលដ្ឋានមួយសម្រាប់ការរៀបចំផែនការអភិវឌ្ឍន៍ និងការគ្រប់គ្រងមូលដ្ឋានឱ្យកាន់តែមានប្រសិទ្ធភាព ស្របតាមតួនាទី និងសមត្ថកិច្ចរបស់រដ្ឋបាលនីមួយៗ។

ពិធីចុះហត្ថលេខាលើផែនទីព្រំប្រទល់រដ្ឋបាលឃុំ-សង្កាត់នេះ ដូច្នេះ មិនមែនគ្រាន់តែជាព្រឹត្តិការណ៍ផ្លូវការមួយប៉ុណ្ណោះទេ ប៉ុន្តែជាការបន្តពង្រឹងមូលដ្ឋានសម្រាប់ការគ្រប់គ្រងដែនដីប្រកបដោយភាពច្បាស់លាស់ សណ្តាប់ធ្នាប់ និងការទទួលខុសត្រូវ ដែលនឹងរួមចំណែកដល់ការផ្តល់សេវាសាធារណៈ និងការអភិវឌ្ឍមូលដ្ឋានឱ្យឆ្លើយតបបានកាន់តែប្រសើរទៅនឹងតម្រូវការរបស់ប្រជាពលរដ្ឋ៕

ដោយ៖ ឈុន សារ៉ាត