AKP ភ្នំពេញ ថ្ងៃទី១៧ ខែកញ្ញា ឆ្នាំ២០២៦--កាកបាទក្រហមកម្ពុជាបានរៀបចំកិច្ចប្រជុំបូកសរុបលទ្ធផលការងារស្តារទំនាក់ទំនងគ្រួសារ (Restoring Family Links - RFL) ប្រចាំឆ្នាំ២០២៦ នៅសាលប្រជុំ សណ្ឋាគារ ភាពសុខុម ខេត្តកំពត នៅថ្ងៃទី១៧ ខែកញ្ញា ឆ្នាំ២០២៦នេះ ។

លោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជាបានដឹកនាំកិច្ចប្រជុំនេះ ដោយមានការចូលរួមពីថ្នាក់ដឹកនាំ និងមន្ត្រីកាកបាទក្រហមកម្ពុជា តំណាងគណៈកម្មាធិការអន្តរជាតិនៃកាកបាទក្រហម (ICRC) ព្រមទាំងមន្ត្រី RFL មកពី ២៥ រាជធានី-ខេត្ត សរុបចំនួន៣៣រូប។

ការរៀបចំកិច្ចប្រជុំនេះឡើងក្នុងគោលបំណងបូកសរុបលទ្ធផលការងារ និងសកម្មភាព RFL នាពេលកន្លងមក ពិនិត្យបញ្ហាប្រឈម និងផ្លាស់ប្តូរបទពិសោធន៍ ដើម្បីពង្រឹងប្រសិទ្ធភាពការងារ ព្រមទាំងពង្រឹងកិច្ចសហការជាមួយស្ថាប័នពាក់ព័ន្ធ ជាពិសេសក្នុងការស្វែងរក និងស្តារទំនាក់ទំនងរវាងសមាជិកគ្រួសារដែលបានបាត់បង់ទំនាក់ទំនង។

តំណាង ICRC បានលើកឡើងពីសារៈសំខាន់នៃការងារ RFL ក្នុងការឆ្លើយតបទៅនឹងតម្រូវការរបស់ប្រជាពលរដ្ឋដែលបានបាត់បង់ទំនាក់ទំនងជាមួយក្រុមគ្រួសារ ដោយសារជម្លោះប្រដាប់អាវុធ គ្រោះមហន្តរាយ និងស្ថានភាពផ្សេងៗ។

លោកជំទាវ អគ្គលេខាធិការ បានថ្លែងអំណរគុណចំពោះ ICRC ដែលបានផ្តល់ការគាំទ្រផ្នែកបច្ចេកទេស និងថវិកាដល់ការងារ RFL និងបានគូសបញ្ជាក់ថា ការងារនេះមិនត្រឹមតែជាការផ្តល់សេវាបច្ចេកទេសប៉ុណ្ណោះទេ ប៉ុន្តែជាការងារមនុស្សធម៌ដ៏មានតម្លៃ ដែលជួយឆ្លើយតបទៅនឹងតម្រូវការផ្លូវចិត្ត និងសេចក្តីថ្លៃថ្នូររបស់អ្នកដែលបានបាត់បង់ទំនាក់ទំនងជាមួយក្រុមគ្រួសារ។

លោកជំទាវបានណែនាំដល់មន្ត្រី RFL ទាំង ២៥ រាជធានី-ខេត្ត ឱ្យបន្តពង្រឹងសមត្ថភាព ត្រៀមលក្ខណៈឆ្លើយតបឱ្យបានទាន់ពេលវេលា និងរក្សាបាននូវគុណភាពសេវា ការសម្ងាត់ អព្យាក្រឹតភាព និងសេចក្តីថ្លៃថ្នូររបស់អ្នកទទួលសេវា ដើម្បីបង្កើនប្រសិទ្ធភាពការងារ និងត្រៀមឆ្លើយតបចំពោះស្ថានភាពអាសន្ន និងគ្រោះមហន្តរាយនានា នាពេលអនាគត។

ដោយ ពេជ្រ សំអឿន(ប្រភព៖កាកបាទក្រហមកម្ពុជា)