AKP កណ្ដាល ថ្ងៃទី១៣ ខែកញ្ញា ឆ្នាំ២០២៦--

លោក អោម ប៊ុនធឿន ប្រធានមន្ទីរពាណិជ្ជកម្មខេត្តកណ្ដាល បានបញ្ជាក់ជូនប្រជាពលរដ្ឋថា សម្រាប់បងប្អូនប្រជាពលរដ្ឋដែលមកទិញនូបផលិតផលក្នុងផ្សារផលិតផលខ្មែរខេត្តកណ្ដាល (ផ្សារចុងសប្តាហ៍) គឺទទួលបាននូវផលិតផលដែលមានប្រភពច្បាស់លាស់ពីប្រជាកសិករនៅក្នុងមូលដ្ឋាន និងធានាបាននៅគុណភាព និងសុវត្ថិភាពត្រឹមត្រូវ។

លោក អោម ប៊ុនធឿន ប្រធានមន្ទីរពាណិជ្ជកម្មខេត្តកណ្ដាល បានបញ្ជាក់បែបនេះ ក្នុងឱកាសដែលលោកប្រធានមន្ទីរ រួមជាមួយមន្ទីរពិសោធន៍ចល័ត្នផ្នែកម្ហូបអាហាររបស់អគ្គនាយកដ្ឋាន ក.ប.ប បានចុះពិនិត្យគុណភាពបន្លែ និងម្ហូបអាហារផ្សេងទៀត នៅផ្សារផលិតផលខ្មែរខេត្តកណ្ដាល (ផ្សារចុងសប្តាហ៍) ស្ថិតនៅសួនច្បារច្រមុះជ្រូកមាត់ទន្លេក្រុងតាខ្មៅ នៅថ្ងៃទី១២ ខែកញ្ញា ឆ្នាំ២០២៦។

លោកប្រធានមន្ទីរបានបន្តថា ចំពោះផ្សារផលិតផលខ្មែរខេត្តកណ្ដាល (ផ្សារចុងសប្តាហ៍) នេះ បានជួយប្រជាកសិករដែលស្ថិតក្នុងគម្រោងអែម ដើម្បីយកផលិតផលរបស់ពួកគាត់មកលក់នៅក្នុងផ្សារចុងសប្តាហ៍នេះ ហើយក្រៅពីលក់ផលិតផលជាបន្លែរបស់ប្រជាកសិករ ផ្សារចុងសប្តាហ៍នេះបានលក់នៅផលិតផលដែលផលិតផលិតដោយកូនខ្មែរជាច្រើនបន្ថែមទៀត។ ផ្សារចុងសប្តាហ៍នេះដែរ គឺចាប់ផ្ដើមលក់នៅរៀងរាល់ព្រឹកថ្ងៃសៅរ៍ និងថ្ងៃអាទិត្យ ហើយមកដល់ពេលនេះមានស្តង់ចំនួន១៦ ដែលកំពុងតាំងលក់នៅសួនច្បារច្រមុះជ្រូកមាត់ទន្លេក្រុងតាខ្មៅ ហើយផ្សារនេះដែរបានជួយចំពោះផលិតផលរបស់ប្រជាកសិករបានច្រើនដែលកំពុងផលិតនៅក្នុងមូលដ្ឋាន។

ទន្ទឹមនឹងនេះ លោកប្រធានមន្ទីរបានសង្កេតឃើញថា មានការគាំទ្រច្រើនពីបងប្អូនប្រជាពលរដ្ឋចំពោះផ្សារចុងសប្តាហ៍នេះ ដោយមានប្រជាពលរដ្ឋមិនត្រឹមតែក្នុងមូលដ្ឋានក្រុងតាខ្មៅ ខេត្តកណ្ដាលនោះទេ គឺមានប្រជាពលរដ្ឋមកពីរាជធានីភ្នំពេញផងដែរ ដែលបានមកគាំទ្រផលិតផលខ្មែររបស់យើងនៅក្នុងផ្សារចុងសប្តាហ៍នេះ។ មន្ទីរពាណិជ្ជកម្មខេត្តមិនត្រឹមតែគ្រប់គ្រងនៅគុណភាព និងសុវត្ថិភាព ជូនបងប្អូនប្រជាពលរដ្ឋដែលជាអ្នកបរិភោគនូវបន្លែទាំងអស់នេះទេ គឺយើងបានគ្រប់គ្រងនៅតម្លៃឱ្យបានសមរម្យ ទៅនឹងការផលិតរបស់ប្រជាកសិករ ព្រោះការផលិតរបស់ពួកគាត់គឺផលិតនៅក្នុងផ្ទះសំណាញ់ និងស្ថិតក្រោមការត្រួតពិនិត្យរបស់គម្រោង និងមន្ទីរពាណិជ្ជកម្មខេត្តកណ្ដាលផងដែរ។ ប្រជាកសិករដែលជាអ្នកផលិត នៅពេលសព្វថ្ងៃនេះតម្រូវការទីផ្សារមានការកើនឡើងច្រើន ហើយយើងត្រូវតែខិតខំផលិតឱ្យបានច្រើន និងធានាឱ្យបាននៅគុណភាព និងសុវត្ថិភាព សម្រាប់បងប្អូនប្រជាពលរដ្ឋរបស់យើងដែលជាអ្នកប្រើប្រាស់។ ជាមួយគ្នានេះដែរលោកប្រធានមន្ទីរ ក៏បានអំពាវនាវដល់បងប្អូនប្រជាពលរដ្ឋ សូមចូលរួមគាំទ្រផលិតផលរបស់បងប្អូនប្រជាកសិកររបស់យើងដែលកំពុងផលិតនៅក្នុងស្រុក ពិសេសមូលដ្ឋានខេត្តកណ្ដាលឱ្យបានច្រើន ព្រោះផលិតផលរបស់យើងមានគុណភាព និងសុវត្ថិភាពគ្រប់គ្រាន់សម្រាប់បងប្អូនប្រើប្រាស់។

សូមបញ្ជាក់ផងដែរថា មន្ទីរពិសោធន៍ចល័ត្នផ្នែកម្ហូបអាហាររបស់អគ្គនាយកដ្ឋាន ក.ប.ប បានធ្វើការពិសោធន៍ទៅលើបន្លែ ផ្លែឈើ ត្រី សាច់ ចំនួន២៣មុខនាពេលនេះ ជាលទ្ធផលមិនមានរកឃើញសារជាតិហាមឃាត់ណាមួយឡើយ៕

ដោយ ណយ នឿន (ប្រភព៖ រដ្ឋបាលខេត្តកណ្តាល)