AKP តាកែវ ថ្ងៃទី១៣ ខែកញ្ញា ឆ្នាំ២០២៦--

ឯកឧត្តម ទួន ស៊ីផាន់ រដ្ឋលេខាធិការក្រសួងប្រៃសណីយ៍ និងទូរគមនាគមន៍ និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកត្រាំកក់ បានអញ្ជើញចុះជួបសំណេះសំណាល និងចូលរួមអបអរសាទរជាមួយប្អូនៗក្មួយៗសិស្សានុសិស្សដែលទើបបានប្រឡងជាប់ សញ្ញាបត្រមធ្យមសិក្សាទុតិយភូមិ (បាក់ឌុប) សម័យប្រឡងថ្ងៃទី១០-១១ ខែសីហា ឆ្នាំ២០២៦ ឆ្នាំសិក្សាសិក្សា២០២៥-២០២៦ ចំនួន១១៦៥នាក់ មកពីវិទ្យាល័យនានាក្នុងស្រុកត្រាំកក់ ដោយនិមន្ត និងអញ្ជើញចូលរួមក្នុងពិធីនោះពីព្រះមង្គលបញ្ញាបណ្ឌិត សៅ តារាវី ព្រះអនុគណស្រុកត្រាំកក់ និងជាព្រះគ្រូចៅអធិការវត្តមង្គលមានល័ក្ខណ៍ ព្រះមន្ត្រីសង្ឃស្រុកត្រាំកក់ ឯកឧត្តម លោកជំទាវ លោក លោកស្រីអនុប្រធាន សមាជិក សមាជិកាក្រុមការងាររាជរដ្ឋាភិបាលចុះមូលដ្ឋានស្រុកត្រាំកក់ ប្រធាន អនុប្រធាន សមាជិក សមាជិកាក្រុមការងាររាជរដ្ឋាភិបាលចុះមូលដ្ឋានឃុំត្រពាំងធំខាងជើង ថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ ចំណុះរដ្ឋបាលខេត្តតាកែវ ចំណុះរដ្ឋបាលស្រុកត្រាំកក់ ព្រះសង្ឃ លោកគ្រូ អ្នកគ្រូ សិស្សានុសិស្ស មាតា បិតា អាណាព្យាបាលសិស្ស និងប្រជាពលរដ្ឋចូលរួមយ៉ាងច្រើនកុះករ ក្នុងបរិវេណវត្តមង្គលមានល័ក្ខណ៍ ស្ថិតនៅក្នុងភូមិត្រពាំងស្វាយឃុំត្រពាំងធំខាងជើងស្រុកត្រាំកក់ខេត្តតាកែវ កាលពីថ្ងៃទី១២ ខែកញ្ញា ឆ្នាំ២០២៦។

មានប្រសាសន៍សំណេះសំណាលក្នុងឱកាសនោះ ឯកឧត្តម ទួន ស៊ីផាន់ រដ្ឋលេខាធិការក្រសួងប្រៃសណីយ៍និងទូរគមនាគមន៍ និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកត្រាំកក់ បានថ្លែងនូវការកោតសរសើរនិងអបអរសាទរ ចំពោះក្មួយៗសិស្សានុសិស្សទាំងអស់ ដែលបានខិតខំប្រឹងប្រែងលះបង់កម្លាំងកាយចិត្ត និងពេលវេលាក្នុងការសិក្សារៀនសូត្រ រហូតទទួលបានជោគជ័យគួរជាទីមោទនភាពនាពេលនេះ។

ឯកឧត្តម ទួន ស៊ីផាន់ បានមានប្រសាសន៍បន្តថា ទន្ទឹមនឹងនេះសូមក្មួយៗសិស្សានុសិស្សទាំងអស់ ត្រូវបន្តខិតខំសិក្សា និងក្រេបជញ្ជក់ចំណេះដឹងបន្ថែមទៀត នៅកម្រិតឧត្ដមសិក្សានូវជំនាញដែលក្មួយៗពេញចិត្ត។ដើម្បីអភិវឌ្ឍសមត្ថភាពខ្លួនឯង ឱ្យក្លាយជាទំពាំងស្នងឫស្សី និងជាធនធានមនុស្សដ៏មានសក្ដានុពល ក្នុងការចូលរួមចំណែកអភិវឌ្ឍប្រទេសជាតិ និងស្រុកកំណើតឱ្យកាន់តែរីកចម្រើននាពេលអនាគត។

ឯកឧត្តម ទួន ស៊ីផាន់ បានមានប្រសាសន៍បន្ថែមថា លទ្ធផលដែលក្មួយៗទទួលបាននៅថ្ងៃនេះ បានបង្ហាញពីការយកចិត្តទុកដាក់ ខិតខំប្រឹងប្រែងបង្ហាត់បង្រៀន របស់លោកគ្រូអ្នកគ្រូ និងការចូលរួមដាស់តឿនក្រើនរំលឹក ពីសំណាក់មាតាបិតាអាណាព្យាបាលសិស្ស។ពិសេសសិស្សខ្លួនឯងផ្ទាល់តែម្ដង ដែលបានខិតខំប្រឹងប្រែងរៀនសូត្រ ទើបទទួលបានលទ្ធផលល្អបែបនេះ។ចំណែកក្មួយៗដែលមិនបានទទួលជោគជ័យក្នុងការប្រឡង សូមកុំបាក់ទឹកចិត្ត ត្រូវខិតខំប្រឹងប្រែងសិក្សារៀនសូត្របន្ថែមទៀត ដើម្បីមានឱកាសប្រឡងជាប់នៅឆ្នាំក្រោយៗទៀត៕

ដោយ អ៊ុច សៀង