AKPបន្ទាយមានជ័យថ្ងៃទី៩ខែកញ្ញាឆ្នាំ២០២៦--ឯកឧត្តម អ៊ុំ រាត្រី អភិបាលខេត្តបន្ទាយ មានជ័យបានបញ្ជាក់ពីសារៈសំខាន់នៃអក្ខរកម្មថា ការចេះអាន ចេះសរសេរ និងមានសមត្ថភាពគណនា មិនមែនជាចំណេះដឹងមូលដ្ឋានសម្រាប់ប្រើប្រាស់ក្នុងជីវភាពប្រចាំថ្ងៃប៉ុណ្ណោះទេ ប៉ុន្តែជាមូលដ្ឋានគ្រឹះដ៏សំខាន់សម្រាប់ឱ្យប្រជា ពលរដ្ឋអាចបន្តការសិក្សា រៀនជំនាញថ្មីៗ ចូលរួមក្នុងសកម្មភាពសង្គម និងបង្កើនសមត្ថភាពប្រកបរបរចិញ្ចឹមជីវិតឱ្យកាន់តែប្រសើរ។

ការថ្លែងយ៉ាងដូច្នេះរបស់  ឯកឧត្តម អ៊ុំ រាត្រី  បានធ្វើឡើងក្នុងឱកាសអញ្ជើញជាអធិបតីក្នុងពិធីអបអរសាទរ ទិវាអក្ខរកម្មជាតិ ៨ កញ្ញា លើកទី២៦ ដែលបានរៀប ចំឡើងនៅវិទ្យាល័យស្វាយចេក ស្រុកស្វាយចេក ខេត្តបន្ទាយមានជ័យ ព្រឹកថ្ងៃពុធ ទី៩ ខែកញ្ញា ឆ្នាំ២០២៦ ដោយ មានការចូលរួមពីមន្ទីរ-អង្គភាពជុំវិញខេត្ត កងកម្លាំងប្រដាប់អាវុធ អាជ្ញាធរមូលដ្ឋាន អង្គការសង្គមស៊ីវិល វិស័យឯកជន លោកនាយក លោកគ្រូ អ្នកគ្រូ ប្រជាពលរដ្ឋ និងសិស្សានុសិស្សយ៉ាងច្រើនកុះករ។

ឯកឧត្តមអភិបាលខេត្ត បានគូសបញ្ជាក់ថា ក្នុងបរិបទសង្គមដែលមានការរីក ចម្រើនយ៉ាងឆាប់រហ័ស អក្ខរកម្មមិនគួរត្រូវបានយល់ត្រឹមតែការចេះអាន និងសរសេរតាមបែបប្រពៃណីនោះឡើយ ប៉ុន្តែត្រូវពង្រីកទៅដល់ អក្ខរកម្មឌីជីថល អក្ខរកម្មហិរញ្ញវត្ថុ អក្ខរកម្មសុខភាព និងចំណេះដឹងដែលពាក់ព័ន្ធនឹងការរស់នៅក្នុងសង្គមទំនើប ដើម្បីឱ្យប្រជាពលរដ្ឋមានសមត្ថភាពទទួលព័ត៌មាន វិភាគព័ត៌មាន និងប្រើប្រាស់បច្ចេកវិទ្យាបានប្រកបដោយសុវត្ថិភាព និងប្រសិទ្ធភាព។    

ឯកឧត្តម អ៊ុំ រាត្រី ក៏បានអំពាវនាវដល់គ្រប់មន្ទីរ-អង្គភាព អាជ្ញាធរគ្រប់លំដាប់ ថ្នាក់ អង្គការសង្គមស៊ីវិល វិស័យឯកជន និងដៃគូពាក់ព័ន្ធ បន្តចូលរួមជំរុញការ ងារអក្ខរកម្មនៅតាមមូលដ្ឋាន ជាពិសេសការផ្តល់ឱកាសឱ្យប្រជាពលរដ្ឋដែលនៅមានកម្រិតអក្ខរកម្មទាប អាចទទួលបានការសិក្សា និងការបណ្តុះបណ្តាលជំនាញសមស្រប។

ជាមួយគ្នានេះ ឯកឧត្តមអភិបាលខេត្ត បានលើកទឹកចិត្តដល់លោកគ្រូ អ្នកគ្រូ និងបុគ្គលិកអប់រំ ឱ្យបន្តខិតខំបំពេញតួនាទីរបស់ខ្លួនប្រកបដោយការទទួល ខុសត្រូវ ព្រោះវិស័យអប់រំ គឺជាវិស័យដ៏សំខាន់ក្នុងការកសាងធនធានមនុស្ស ដែលជាកម្លាំងចលករដ៏សំខាន់សម្រាប់ការអភិវឌ្ឍសង្គម និងសេដ្ឋកិច្ចជាតិ។     

ឯកឧត្តមបានបន្តថា ការលើកកម្ពស់អក្ខរកម្មត្រូវការការចូលរួមពីគ្រប់ភាគី មិនអាចពឹងផ្អែកតែលើស្ថាប័នអប់រំ ឬគ្រូបង្រៀនតែប៉ុណ្ណោះទេ។ គ្រួសារ សហគមន៍ អាជ្ញាធរមូលដ្ឋាន អង្គការសង្គមស៊ីវិល និងវិស័យឯកជន សុទ្ធតែមានតួនាទីសំខាន់ក្នុងការបង្កើតបរិយាកាសសិក្សា និងលើកទឹកចិត្តឱ្យប្រជាពលរដ្ឋគ្រប់វ័យចូលរួមរៀនសូត្រពេញមួយជីវិត។ 

ពិធីទិវាអក្ខរកម្មជាតិ ៨ កញ្ញា លើកទី២៦ នៅខេត្តបន្ទាយមានជ័យនេះ ក៏ជាឱកាសមួយសម្រាប់បង្ហាញពីការយកចិត្តទុកដាក់របស់អាជ្ញាធរខេត្តចំពោះវិស័យអប់រំ និងការអភិវឌ្ឍធនធានមនុស្ស ព្រមទាំងជំរុញឱ្យសង្គមទាំងមូលចាត់ទុកការរៀនសូត្រ និងការបង្កើនចំណេះដឹង ជាផ្នែកមួយនៃជីវិតប្រចាំថ្ងៃ។

ជាមួយនឹងការចូលរួមយ៉ាងច្រើនកុះករពីគ្រប់មជ្ឈដ្ឋាន ពិធីនេះបានបង្ហាញយ៉ាងច្បាស់ពីការរួមកម្លាំងគ្នារបស់រដ្ឋ អាជ្ញាធរ ស្ថាប័នពាក់ព័ន្ធ និងប្រជា ពលរដ្ឋ ក្នុងការជំរុញវប្បធម៌សិក្សា និងការរៀនសូត្រពេញមួយជីវិត ដើម្បីឱ្យប្រជាពលរដ្ឋខេត្តបន្ទាយមានជ័យកាន់តែមានចំណេះដឹង ជំនាញ សមត្ថ ភាព និងអាចចូលរួមបានកាន់តែសកម្មក្នុងដំណើរការអភិវឌ្ឍមូលដ្ឋាន និងប្រទេសជាតិ៕

ដោយ ៖ឈុនសារ៉ាត