AKPបន្ទាយមានជ័យថ្ងៃទី ៩ ខែកញ្ញាឆ្នាំ២០២៦--ការយកចិត្តទុកដាក់ចំពោះសុខទុក្ខ និងជីវភាពរស់នៅរបស់ប្រជាពលរដ្ឋ ជាពិ សេសប្រជាពលរដ្ឋដែលកំពុងភៀសសឹកពីតំបន់ព្រំដែនដោយសារសង្គ្រាមឈ្លានពានរបស់ថៃមកលើដែនអធិប តេយ្យភាពកម្ពុជាគឺជាការងារអាទិភាពមួយដែលរាជរដ្ឋាភិបាលកម្ពុជាបានដាក់ចេញ ដោយមិនទុកឱ្យប្រជាពលរដ្ឋណាម្នាក់ប្រឈមនឹងការលំបាកដោយគ្មានការជួយគាំទ្រឡើយ។

ក្នុងស្មារតីនេះ ឯកឧត្តម គីម វីរៈ អនុប្រ ធាន និងជាអគ្គលេខាធិការ នៃគណៈ កម្មាធិការជាតិគ្រប់គ្រងគ្រោះមហន្តរាយ (គ.ជ.គ.ម.) តំណាងដ៏ខ្ពង់ខ្ពស់ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្ត្រី និងជាអនុប្រធានទី១ គ.ជ.គ.ម. រួមជាមួយក្រុមការងារ បានអញ្ជើញចុះសួរសុខទុក្ខក្រុមការងារ និងប្រជាពលរដ្ឋនៅភូមិរង់ចាំ ព្រមទាំងស្តាប់ និងពិនិត្យអំពីស្ថានភាពការងារគ្រប់គ្រងហានិភ័យ និងគ្រោះមហន្តរាយរបស់ខេត្ត។

ការចុះបំពេញបេសកកម្មនេះ បានធ្វើឡើងនៅរសៀលថ្ងៃទី៨ ខែកញ្ញា ឆ្នាំ២០២៦ នៅទីស្នាក់ការភូមិរង់ចាំ ឃុំស្លក្រាម ស្រុកស្វាយចេក ខេត្តបន្ទាយមានជ័យ ដោយមានការចូលរួមពីលោក ហ៊ឹល រ៉ាយ៉ា អភិបាលរងខេត្ត តំណាងដ៏ខ្ពង់ខ្ពស់ឯកឧត្តម អ៊ុំ រាត្រី អភិបាល នៃគណៈអភិបាលខេត្ត ព្រមទាំងក្រុមការងារពាក់ព័ន្ធ។    

ថ្លែងក្នុងឱកាសជួបសំណេះសំណាល និងសួរសុខទុក្ខប្រជាពលរដ្ឋ ឯកឧត្តម គីម វីរៈ បានបង្ហាញពីការយកចិត្តទុកដាក់ខ្ពស់របស់ប្រមុខរាជរដ្ឋាភិបាលកម្ពុជា ចំពោះសុខទុក្ខ សុវត្ថិភាព និងជីវភាពរស់នៅរបស់ប្រជាពលរដ្ឋភៀសសឹក ដែលត្រូវបានផ្លាស់ទីចេញពីតំបន់មានហានិភ័យ ដើម្បីស្វែងរកទីកន្លែងដែលមានសុវត្ថិភាពជាងមុន។   

ឯកឧត្តមបានបញ្ជាក់ថា ការចុះមកដល់ទីតាំងផ្ទាល់ មិនត្រឹមតែជាការសួរសុខ ទុក្ខ និងលើកទឹកចិត្តដល់ប្រជាពលរដ្ឋប៉ុណ្ណោះទេ ប៉ុន្តែថែមទាំងជាឱកាសសម្រាប់ក្រុមការងារថ្នាក់ជាតិ ស្តាប់ដោយផ្ទាល់នូវបញ្ហាប្រឈម តម្រូវការ និងសំណូមពររបស់ប្រជាពលរដ្ឋ ព្រមទាំងពិនិត្យមើលការអនុវត្តការងាររបស់អាជ្ញាធរមូលដ្ឋាន ក្នុងការគ្រប់គ្រងហានិភ័យ និងឆ្លើយតបចំពោះស្ថានភាពគ្រោះមហន្តរាយ។

ក្នុងន័យនេះ ការគ្រប់គ្រងហានិភ័យគ្រោះមហន្តរាយ ត្រូវបានចាត់ទុកថាជាការងារដែលត្រូវការការត្រៀមលក្ខណៈជាមុន និងការសហការយ៉ាងជិតស្និទ្ធពីគ្រប់ភាគី ពោលគឺចាប់ពីការកំណត់តំបន់ប្រឈមហានិភ័យ ការត្រៀមទីតាំងសុវត្ថិភាព ការជម្លៀសប្រជាពលរដ្ឋ ការផ្តល់ជំនួយបឋម រហូតដល់ការស្តារជីវភាពរស់នៅឡើងវិញ។     

ឯកឧត្តម គីម វីរៈ ក៏បានផ្តោតការយក ចិត្តទុកដាក់លើការរៀបចំ និងសម្រប សម្រួលការងាររបស់ក្រុមការងារនៅមូលដ្ឋាន ដើម្បីធានាថា ប្រជាពលរដ្ឋដែលបានភៀសមកកាន់តំបន់សុវត្ថិភាព ទទួលបានការថែទាំ និងការគាំទ្រចាំបាច់ ព្រមទាំងមានព័ត៌មានគ្រប់គ្រាន់អំពីស្ថានភាព និងវិធានការរបស់អាជ្ញាធរ។   

ជាមួយគ្នានេះ ការចុះពិនិត្យ និងស្តាប់របាយការណ៍ពីការងារគ្រប់គ្រងហានិ ភ័យរបស់ខេត្ត ក៏បានបង្ហាញពីសារៈសំខាន់នៃការពង្រឹងប្រព័ន្ធសម្របសម្រួលរវាងថ្នាក់ជាតិ និងថ្នាក់ក្រោមជាតិ។ ការឆ្លើយតបចំពោះគ្រោះមហន្តរាយ ឬស្ថានភាពប្រឈមណាមួយ នឹងមានប្រសិទ្ធ ភាពកាន់តែខ្ពស់ ប្រសិនបើព័ត៌មានត្រូវបានបញ្ជូនទាន់ពេល ការសម្រេចចិត្តមានភាពច្បាស់លាស់ និងធនធានជំនួយអាចទៅដល់ប្រជាពលរដ្ឋបានឆាប់រហ័ស។   

សម្រាប់ខេត្តបន្ទាយមានជ័យ ដែលជាខេត្តជាប់ព្រំដែន និងមានប្រជាពលរដ្ឋរស់នៅក្នុងតំបន់មួយចំនួនដែលអាចប្រឈមនឹងហានិភ័យ ការត្រៀមខ្លួនជាមុន និងការរក្សាសមត្ថភាពឆ្លើយតបនៅមូលដ្ឋាន គឺជាកត្តាសំខាន់។ ការមានទីតាំងសុវត្ថិភាព ក្រុមការងារត្រៀមអន្តរាគមន៍ និងការចូលរួមរបស់ប្រជាពលរដ្ឋ គឺជាផ្នែកមួយនៃការកាត់ បន្ថយផលប៉ះពាល់ និងការពារអាយុជីវិតប្រជាពលរដ្ឋ។     

នៅចំពោះមុខប្រជាពលរដ្ឋភៀសសឹក ឯកឧត្តម គីម វីរៈ បានបន្តបង្ហាញនូវស្មារតីយកចិត្តទុកដាក់ និងលើកទឹកចិត្តឱ្យប្រជាពលរដ្ឋមានភាពអត់ធ្មត់ រួមគ្នារក្សាសន្តិសុខ សណ្តាប់ធ្នាប់ និងសហការជាមួយអាជ្ញាធរមូលដ្ឋាន ក្នុងការអនុវត្តវិធានការសុវត្ថិភាពនានា។

ការចុះសួរសុខទុក្ខ និងពិនិត្យការងារនៅមូលដ្ឋានរបស់ថ្នាក់ដឹកនាំ គ.ជ.គ.ម. នាពេលនេះ ក៏ជាការបង្ហាញពីការភ្ជាប់យ៉ាងជិតស្និទ្ធរវាងការងារគ្រប់គ្រងគ្រោះមហន្តរាយ និងការថែរក្សាសុខុមាលភាពប្រជាពលរដ្ឋ ដោយផ្តោតសំខាន់លើគោលការណ៍ “ប្រជាពលរដ្ឋជាចម្បង” និងការមិនទុកឱ្យប្រជាពលរដ្ឋដែលកំពុងជួបការលំបាកនៅឯកោឡើយ។    

ជាមួយគ្នានេះ ការចូលរួមរបស់អាជ្ញាធរខេត្ត ក្រុមការងារជំនាញ និងមូលដ្ឋាន ក៏បានបង្ហាញពីការរួមកម្លាំងគ្នាក្នុងការដោះស្រាយបញ្ហាប្រឈម និងបង្កើនសមត្ថភាពត្រៀមបង្ការ ឆ្លើយតប និងស្តារឡើងវិញ ដើម្បីឱ្យប្រជាពលរដ្ឋមានសុវត្ថិភាព និងអាចវិលត្រឡប់ទៅរកជីវភាពធម្មតាវិញនៅពេលស្ថានភាពអនុញ្ញាត៕

ដោយ ៖ឈុនសារ៉ាត