AKP ភ្នំពេញ ថ្ងៃទី០៧ ខែកញ្ញា ឆ្នាំ២០២៦ -- ឯកឧត្តម ម៉េង ប៉ូគន្ធ អគ្គនាយក នៃអគ្គនាយកដ្ឋានកិច្ចការរដ្ឋបាល នៃក្រសួងធនធានទឹក និងឧតុនិយម បានអញ្ជើញដឹកនាំបើកវគ្គបណ្តុះបណ្តាល «ការចែករំលែកបទពិសោធន៍បច្ចេកទេសបណ្តុះបណ្តាលពីប្រទេសជប៉ុន និងសាធារណរដ្ឋប្រជាមានិតចិន» នៅបន្ទប់បណ្តុះបណ្តាល TSC នាព្រឹកថ្ងៃចន្ទ ទី០៧ ខែកញ្ញា ឆ្នាំ២០២៦ នេះ នៅទីស្តីការក្រសួង ដោយមានការចូលរួមពីគ្រូឧទ្ទេស ៥រូប និងសិក្ខាកាម ៣០នាក់។

នេះជាវេទិកាដ៏សំខាន់ក្នុងការផ្លាស់ប្តូរបទពិសោធន៍ល្អៗពីជប៉ុន និងចិន ដើម្បីលើកកម្ពស់ប្រសិទ្ធភាពការងារស្ថាប័ន។ ប្រធានបទសំខាន់ៗរួមមាន៖ ការដោះស្រាយបម្រែបម្រួលអាកាសធាតុ ការគ្រប់គ្រងធនធានទឹកចម្រុះ ការរៀបចំ និងគ្រប់គ្រងវដ្តគម្រោង ព្រមទាំងការគ្រប់គ្រងទឹកជំនន់ និងការការពារទំនប់។

ឯកឧត្តមអគ្គនាយកសង្ឃឹមយ៉ាងមុតមាំថា វគ្គនេះនឹងផ្តល់ចំណេះដឹង និងបទពិសោធន៍ថ្មីៗពីជប៉ុន និងចិន សម្រាប់ជាទុនក្នុងការងារ ព្រមទាំងផ្តាំផ្ញើដល់សិក្ខាកាមឱ្យខិតខំក្រេបជញ្ជក់ចំណេះដឹង ដើម្បីពង្រឹងសមត្ថភាព និងលើកកម្ពស់ប្រសិទ្ធភាពការងារស្ថាប័នឱ្យកាន់តែមានបុរេសកម្មខ្ពស់៕

ដោយ៖ ពេជ្រ សំអឿន(ប្រភព៖ ក្រសួងធនធានទឹក និងឧតុនិយម)