AKP ភ្នំពេញ ថ្ងៃទី៧ ខែកញ្ញា ឆ្នាំ ២០២៦--- មន្រ្តីស្ថានទូត​កម្ពុជាប្រចាំ​សាធារណរដ្ឋ​កូរ៉េ​នៅថ្ងៃអាទិត្យ​ ទី៦ ខែកញ្ញា​ ឆ្នាំ២០២៦បានចូលរួមកម្មវិធីបុណ្យភ្ជុំបិណ្ឌ​ ដែលរៀបចំដោយសមាគមខ្មែរពូឆន់ នៅមជ្ឈមណ្ឌលគាំពារពលករបរទេសក្រុងពូឆន់ នៅតំបន់ពូឆន់​ ខេត្តខ្យង់គីដូ​ សាធារណរដ្ឋកូរ៉េ ដោយមានការអញ្ជើញចូលរួមពីប្រធានមជ្ឈមណ្ឌលគាំពារពលករបរទេសក្រុងពូឆន់​ និងសហការី​ ព្រមទាំងបងប្អូនសហគមន៍ខ្មែរ និងកូរ៉េ​ នៅតំបន់ពូឆន់ប្រមាណ ១៥០ នាក់។

ថ្លែងក្នុងឱកាសនៃកម្មវិធីបុណ្យខាងលើ លោក​ សូ​ ប៊ុណ្ណា​ ទីប្រឹក្សា​ស្ថានទូត​ បានសម្តែងក្តីសោមនស្សរីករាយ និងកោតសរសើរដល់បងប្អូនសហគមន៍ខ្មែរ​ ដែលបានមូលមតិគ្នារៀបចំកម្មវិធីបុណ្យភ្ជុំបិណ្ឌ​នេះឡើង ព្រមទាំងបានថ្លែងអំណរគុណដល់មជ្ឈមណ្ឌលគាំពារពលករបរទេសទីក្រុងពូឆន់ និងអាជ្ញាធរកូរ៉េ ដែលបានផ្តល់ទីតាំង និងជួយសម្របសម្រួលរៀបចំកម្មវិធីខាងលើប្រកបដោយភាពរលូន​ និងសប្បាយរីករាយ។

នៅក្នុងកម្មវិធីនេះ​ ​ក៏មានការសម្តែងរបាំជូនពរ​ និងការប្រគំតន្រ្តីបុរាណសម័យជូនបងប្អូនសហគមន៍ខ្មែររាំលេងកម្សាន្ត​ ដេីម្បីអភិរក្សសិល្បៈ​ របាំបុរាណ​ របស់ខ្មែរយេីងផង​ និងដេីម្បីឱ្យបងប្អូនបានរាំកម្សាន្ត​ កាត់បន្ថយភាពនឿយហត់ពីការបំពេញការងារ​ ផងដែរ៕

ដោយ៖ ប៊ុនរិទ្ធ,ប្រភព៖ស្ថានទូតកម្ពុជាប្រចាំប្រទេសកូរ៉េ