AKP ភ្នំពេញ ថ្ងៃទី០៧ ខែកញ្ញា ឆ្នាំ២០២៦ -- ឯកឧត្តម ចាន់ ស៊ីណាត រដ្ឋលេខាធិការ ក្រសួងធនធានទឹក និងឧតុនិយម បានអញ្ជើញដឹកនាំកិច្ចប្រជុំបើក (Kick-Off Meeting) ស្ដីពីការត្រួតពិនិត្យវឌ្ឍនភាពគម្រោងកែលម្អវិស័យធារាសាស្ត្រកសិកម្ម (IAIP) ក្រោមហិរញ្ញប្បទានធនាគារអភិវឌ្ឍន៍អាស៊ី (ADB) នៅសាលប្រជុំទីស្តីការក្រសួង នាព្រឹកថ្ងៃចន្ទទី០៧ ខែកញ្ញា ឆ្នាំ២០២៦ នេះ។

កិច្ចប្រជុំនេះ មានការចូលរួមពីក្រុមបេសកកម្មធនាគារអភិវឌ្ឍន៍អាស៊ី (ADB) តំណាងក្រសួងសេដ្ឋកិច្ច និងហិរញ្ញវត្ថុ ក្រសួងកសិកម្ម រុក្ខាប្រមាញ់ និងនេសាទ ព្រមទាំងមន្ត្រីបច្ចេកទេស ទីប្រឹក្សាគម្រោង និងតំណាងមន្ទីរធនធានទឹក និងឧតុនិយមនៃខេត្តគោលដៅជាច្រើនរូប។

ឯកឧត្តមរដ្ឋលេខាធិការ បានបញ្ជាក់ឱ្យដឹងថា បេសកកម្មរបស់ធនាគារអភិវឌ្ឍន៍អាស៊ីនាពេលនេះ គឺដើម្បីត្រួតពិនិត្យមើលវឌ្ឍនភាពនៃការអនុវត្តគម្រោងចាប់តាំងពីចាប់ផ្តើមរហូតមកដល់បច្ចុប្បន្ន ជាពិសេស គឺស្វែងរកចំណុចខ្លាំង ចំណុចខ្វះខាត និងដំណោះស្រាយ ដើម្បីពន្លឿនការអនុវត្តការងារឱ្យស្របតាមផែនការដែលបានឯកភាពគ្នា។

ឯកឧត្តមរដ្ឋលេខាធិការ ក៏បានថ្លែងអំណរគុណយ៉ាងជ្រាលជ្រៅជូនចំពោះធនាគារអភិវឌ្ឍន៍អាស៊ី (ADB) ដែលជាដៃគូយូរអង្វែងក្នុងការគាំទ្រដល់ការអភិវឌ្ឍវិស័យធនធានទឹក និងឧតុនិយមនៅកម្ពុជា៕

ដោយ៖ ពេជ្រ សំអឿន(ប្រភព៖ ក្រសួងធនធានទឹក និងឧតុនិយម)