AKP ព្រះសីហនុ ថ្ងៃទី៦ ខែកញ្ញា ឆ្នាំ២០២៦ --ឯកឧត្តម ឧត្តមសេនីយ៍ឯក លឹម តុងហួត ប្រធាននាយកដ្ឋានផ្សព្វផ្សាយ អប់រំ និងទំនាក់ទំនងសាធារណៈ នៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀនបានធ្វើបទបង្ហាញដល់សិក្ខាកាមមកពីសាសនាចំនួន៥ ក្នុងខេត្តព្រះសីហនុ ដើម្បីទទួលបានចំណេះដឹងពីបញ្ហាគ្រឿងញៀន App NoDrug សម្រាប់ផ្សាយបន្តដល់បរិស័ទ។ ការធ្វើបទបង្ហាញបែបនេះក្នុងឱកាសដឹកនាំក្រុមការងារ ចែករំលែកចំណេះដឹង បទពិសោធន៍ ក្នុងសិក្ខាសាលាផ្សព្វផ្សាយអប់រំស្តីពី “ការលើកកម្ពស់ការយល់ដឹងពីផលប៉ះពាល់ នៃការប្រើប្រាស់គ្រឿងញៀន App NoDrug និងច្បាប់ស្តីពីការត្រួតពិនិត្យគ្រឿងញៀន ក្នុងវិស័យអន្តរសាសនា” នាថ្ងៃទី៥ ខែកញ្ញា ឆ្នាំ២០២៦ ដែលមានសិក្ខាកាមសាសនាចំនួន៥ នៅខេត្តព្រះសីហនុ សរុបចំនួន ៥០០ អង្គ/នាក់ ។

ក្នុងឱកាសនោះ ឯកឧត្តមឧត្តមសេនីយ៍ឯក លឹម តុងហួត បានកោតសរសើរដល់រដ្ឋបាលខេត្តព្រះសីហនុ ក្រុមប្រឹក្សាបណ្ដាញព្រះវិហារគ្រីស្ទបរិស័ទកម្ពុជា ដែលបានសហការសម្របសម្រួលដល់សាសនាធំៗនៅខេត្តព្រះសីហនុមកសិក្សាស្វែងយល់ ទទួលចំណេះដឹង បទពិសោធន៍ពីការងារប្រយុទ្ធប្រឆាំងគ្រឿងញៀនដើម្បីផ្សព្វផ្សាយបន្តដល់បរិស័ទរៀងៗខ្លួន។ ឯកឧត្តមឧត្តមសេនីយ៍ឯក បានលើកឡើងថា ការបញ្ជ្រាបខ្លឹមសារប្រឆាំងនឹងគ្រឿងញៀនឆាប់ជ្រាបនិងចាក់ចូលជ្រៅទៅដល់បរិស័ទខ្លួនបានរហ័សនោះគឺក្រុមការងារសាសនានីមួយៗត្រូវតែសកម្ម។

ឯកឧត្តម ឧត្តមសេនីយ៍ឯក លឹម តុងហួត  បានបន្ថែមថា ចំណេះដឹងបទពិសោធន៍បញ្ហាគ្រឿងញៀន App NoDrug និងច្បាប់ស្ដីពីការត្រួតពិនិត្យគ្រឿងញៀន គឺជាទុនមួយ សម្រាប់ឲ្យសិក្ខាកាមមកពីសាសនាទាំង៥ គឺព្រះពុទ្ធសាសនា  គ្រីស្ទសាសនា អ៊ីស្លាមសាសនា ពុទ្ធសាសនាមហាយាន សាសនាបាហៃ យកទៅផ្សព្វផ្សាយបន្តដើម្បី បង្ការខ្លួនឯង ក្រុមគ្រួសារ និងអ្នកជិតខាងជាបរិស័ទរបស់ខ្លួនកុំឲ្យទៅពាក់ព័ន្ធនឹងគ្រឿងញៀន និងប្រើប្រាស់App NoDrug ដើម្បីចំណេះដឹងនិងរាយការណ៍យកគ្រឿងញៀនចេញពីសហគមន៍ ។

ជាមួយគ្នានេះ លោក អ៊ួង យូហាន ប្រធានក្រុមប្រឹក្សាបណ្ដាញព្រះវិហារគ្រីស្ទបរិស័ទ បានថ្លែងអំណរគុណដល់វាគ្មិនដែលបានចែករំលែកចំណេះដឹង បទពិសោធន៍ពីបញ្ហាគ្រឿងញៀន App NoDrug និងច្បាប់ស្ដីពីការត្រួតពិនិត្យគ្រឿងញៀនដល់សិក្ខាកាមគ្រប់រូបសម្រាប់យកទៅផ្សព្វផ្សាយបន្តដល់បរិស័ទរៀងៗខ្លួន៕

ដោយ៖ រិទ្ធី, ប្រភព៖ អាជ្ញាធរជាតិប្រយុទ្ធប្រឆាំងគ្រឿងញៀន