AKP ព្រះសីហនុ ថ្ងៃទី៦ ខែកញ្ញា ឆ្នាំ២០២៦ --ឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀនបានសំណូមពរឱ្យតំណាងសាសនាទាំងអស់ក្នុងខេត្តព្រះសីហនុជួយពង្រីកការផ្សព្វផ្សាយពីបញ្ហាគ្រឿងញៀន App NoDrug ដល់បរិស័ទរបស់ខ្លួន។ ការលើកឡើងសំណូមពរបែបនេះក្នុងឱកាសចូលរួមជាគណៈអធិបតីសិក្ខាសាលាផ្សព្វផ្សាយអប់រំស្តីពី “ការលើកកម្ពស់ការយល់ដឹងពីផលប៉ះពាល់ នៃការប្រើប្រាស់គ្រឿងញៀន App NoDrug និងច្បាប់ស្តីពីការត្រួតពិនិត្យគ្រឿងញៀន ក្នុងវិស័យអន្តរសាសនា” នាថ្ងៃទី៥ ខែកញ្ញា ឆ្នាំ២០២៦ ដែលមកពីតំណាងក្រសួង ស្ថាប័ន អង្គភាព និងតំណាងសាសនាទាំង៥ នៅខេត្តព្រះសីហនុ សរុបចំនួន ៥០០ អង្គ/នាក់ ។

ក្នុងឱកាសនោះ ឯកឧត្តម នាយឧត្តមសេនីយ៍ មាស វិរិទ្ធ បានមានប្រសាសន៍ថា រាជរដ្ឋាភិបាលបន្តវេនដឹកនាំដោយសម្ដេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជាបន្តរក្សាបាននូវសុខដុមរមនីយសាសនា សេរីភាពជំនឿសាសនា បរិស័ទអាចចូលរួមការងារសង្គមបានតាមលទ្ធភាព។ ឯកឧត្តម នាយឧត្តមសេនីយ៍ បានថ្លែងនូវអំណរគុណ និងកោតសរសើរ ចំពោះគ្រប់ភាគីពាក់ព័ន្ធទាំងអស់ដែលបាន ចូលរួមសកម្មភាពប្រយុទ្ធប្រឆាំងគ្រឿងញៀន និងបានសំណូមពរដល់តំណាងសាសនាដែលជាសិក្ខាកាមទាំងអស់យកចំណេះដឹងពីបញ្ហាគ្រឿងញៀន App NoDrug ដែលទទួលបានពីសិក្ខាសាលានេះ ផ្សព្វផ្សាយបន្តពង្រីកការយល់ដឹងដល់បរិស័ទរបស់ខ្លួន ពិសេសយុវជនគ្រប់ក្រុមគ្រួសារ និងប្រើប្រាស់App NoDrug ដើម្បីចំណេះដឹង និងរាយការណ៍យកគ្រឿងញៀនចេញពីសហគមន៍។

ក្នុងឱកាសនោះដែរ ឯកឧត្តម ឆាយ វណ្ណា សមាជិកព្រឹទ្ធសភា បានថ្លែងបញ្ជាក់ថា ភាពសុខដុមរមនាសាសនា គឺពិតជាធ្វើឲ្យសង្គមមានសន្តិភាព សន្តិសុខ និងមានការអភិវឌ្ឍ ហើយការចូលរួមពីគ្រប់សាសនាទាំងអស់ជួយទៅលើការងារសង្គម គឺពិតជាអាចឱ្យសង្គមចៀសផុតបានពីបញ្ហាផ្សេងៗក្នុងនោះមានបញ្ហាគ្រឿងញៀនជាដើម។

បើតាមលោក នៃ គង់ អភិបាលរងខេត្តព្រះសីហនុ បានបញ្ជាក់ថា ការរៀបចំនេះក្នុងគោលបំណងឲ្យសាសនាទាំងអស់ចូលរួមក្នុងការងារប្រយុទ្ធប្រឆាំងគ្រឿងញៀន និងប្រើប្រាស់កម្មវិធីទូរសព្ទដៃ NoDrug ។

សូមជម្រាបជូនថា សិក្ខាសាលានេះរៀបចំឡើងដោយអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀនសហការជាមួយរដ្ឋបាលខេត្តព្រះសីហនុ និងក្រុមប្រឹក្សាបណ្ដាញព្រះវិហារគ្រីស្ទបរិស័ទកម្ពុជា ៕

ដោយ៖ រិទ្ធី ប្រភព៖ អាជ្ញាធរជាតិប្រយុទ្ធប្រឆាំងគ្រឿងញៀន