AKP បន្ទាយមានជ័យ ថ្ងៃទី៤ ខែកញ្ញា ឆ្នាំ២០២៦--ផ្ទះមួយខ្នង មិនត្រឹមតែជាទីជម្រកសម្រាប់រស់នៅប៉ុណ្ណោះទេ ប៉ុន្តែសម្រាប់អតីតយុទ្ធជនដែលបានលះបង់កម្លាំងកាយចិត្តក្នុងបុព្វហេតុការពារជាតិ វាក៏ជានិមិត្តរូបនៃការចងចាំ ការដឹងគុណ និងការយកចិត្តទុកដាក់របស់សង្គម ចំពោះអ្នកដែលធ្លាប់ឈរជួរមុខដើម្បីបុព្វហេតុជាតិមាតុភូមិ។

ជាក់ស្តែង អតីតយុទ្ធជនចំនួន ១៧គ្រួសារ នៅខេត្តបន្ទាយមានជ័យ បានទទួលឱកាសថ្មីសម្រាប់ជីវិតរស់នៅ ដោយបានចាប់ឆ្នោតទទួលផ្ទះជាអំណោយដ៏ថ្លៃថ្លារបស់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា និងជាប្រធានសមាគមអតីតយុទ្ធជន និងនិវត្តន៍ជនកម្ពុជា។

ពិធីចាប់ឆ្នោតប្រគល់ផ្ទះជូនអតីតយុទ្ធជនទាំង១៧គ្រួសារ បានធ្វើឡើងនាព្រឹកថ្ងៃទី៤ ខែកញ្ញា ឆ្នាំ២០២៦ នៅក្នុងមណ្ឌលតេជោសន្តិភាព ២២២២ ស្ថិតក្នុងឃុំប៉ោយចារ ស្រុកភ្នំស្រុក ខេត្តបន្ទាយមានជ័យ ក្រោមអធិបតីភាព ឯកឧត្តម អ៊ុ រាត្រី អភិបាល នៃគណៈអភិបាលខេត្តបន្ទាយមានជ័យ និងជាប្រធានសមាគមអតីតយុទ្ធជន និងនិវត្តន៍ជនកម្ពុជាខេត្ត។

ថ្លែងក្នុងឱកាសនោះ ឯកឧត្តម អ៊ុ រាត្រី បានពាំនាំការផ្តាំផ្ញើ និងសាកសួរសុខទុក្ខដោយក្តីនឹករលឹកពីសំណាក់សម្តេចតេជោ ហ៊ុន សែន និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ជូនចំពោះបងប្អូនអតីតយុទ្ធជន និងក្រុមគ្រួសារ ដោយសង្កត់ធ្ងន់ថា ថ្នាក់ដឹកនាំជាតិតែងតែយកចិត្តទុកដាក់ចំពោះសុខទុក្ខ ជីវភាពរស់នៅ និងការលំបាករបស់អតីតយុទ្ធជន។

ឯកឧត្តម អ៊ុ រាត្រី បានលើកឡើងថា អតីតយុទ្ធជនគឺជាអ្នកដែលមានគុណបំណាច់ចំពោះជាតិ ដោយបានចូលរួមក្នុងបុព្វហេតុការពារជាតិមាតុភូមិ និងបានឆ្លងកាត់ការលំបាក សេចក្តីលះបង់ និងហានិភ័យជាច្រើន ដើម្បីរក្សាសន្តិភាព និងបូរណភាពទឹកដី។ ដូច្នេះ ការយកចិត្តទុកដាក់លើជីវភាពរបស់អតីតយុទ្ធជន មិនមែនជាការផ្តល់ជំនួយតែមួយលើកនោះទេ ប៉ុន្តែជាការបង្ហាញពីការដឹងគុណចំពោះអ្នកដែលបានបំពេញកាតព្វកិច្ចចំពោះជាតិ។

ឯកឧត្តមអភិបាលខេត្ត ក៏បានបញ្ជាក់ថា ការផ្តល់ផ្ទះជូនអតីតយុទ្ធជន គឺជាអំណោយដ៏មានអត្ថន័យ ព្រោះក្រៅពីផ្តល់ទីជម្រកសមរម្យ វាក៏ជួយឱ្យគ្រួសារអតីតយុទ្ធជនមានភាពកក់ក្តៅ មានសុវត្ថិភាព និងអាចចាប់ផ្តើមជីវិតរស់នៅប្រកបដោយក្តីសង្ឃឹមកាន់តែប្រសើរ។
ក្នុងចំណោមអតីតយុទ្ធជនដែលមានសំណាងទទួលបានផ្ទះ គេអាចមើលឃើញស្នាមញញឹម និងអារម្មណ៍រំភើបនៅពេលលទ្ធផលចាប់ឆ្នោតត្រូវបានប្រកាស។ សម្រាប់ពួកគេ ផ្ទះនេះមិនមែនជាទ្រព្យសម្បត្តិធម្មតាមួយឡើយ ប៉ុន្តែជាអំណោយដែលពោរពេញដោយអត្ថន័យ និងជាការឆ្លើយតបចំពោះការលះបង់ដែលពួកគេបានធ្វើកន្លងមក។

អតីតយុទ្ធជនមួយរូបដែលទទួលបានផ្ទះ បានបង្ហាញក្តីរំភើបថា ការទទួលបានផ្ទះនៅថ្ងៃនេះ គឺជាក្តីស្រមៃមួយដែលគ្រួសាររបស់លោករង់ចាំជាយូរ។ លោកបានសម្តែងការដឹងគុណចំពោះសម្តេចតេជោ ហ៊ុន សែន ដែលបានផ្តល់អំណោយដ៏មានតម្លៃនេះ និងចំពោះថ្នាក់ដឹកនាំខេត្តដែលបានយកចិត្តទុកដាក់ និងរៀបចំការចាប់ឆ្នោតប្រកបដោយភាពច្បាស់លាស់។

លោកបានបន្តថា ផ្ទះថ្មីនេះនឹងក្លាយជាទីកន្លែងដែលគ្រួសាររបស់លោកអាចរស់នៅដោយភាពកក់ក្តៅ និងមានសុវត្ថិភាព ព្រមទាំងជាកន្លែងសម្រាប់កូនចៅចងចាំថា ការលះបង់របស់ឪពុកម្តាយក្នុងអតីតកាល ត្រូវបានសង្គម និងថ្នាក់ដឹកនាំចងចាំ និងឱ្យតម្លៃ។
ជាមួយគ្នានេះ ឯកឧត្តម អ៊ុ រាត្រី ក៏បានអំពាវនាវឱ្យអតីតយុទ្ធជន និងក្រុមគ្រួសារបន្តថែរក្សាសាមគ្គីភាព ស្រឡាញ់ និងគោរពច្បាប់ ព្រមទាំងចូលរួមក្នុងការអភិវឌ្ឍមូលដ្ឋាន ដើម្បីឱ្យមណ្ឌលតេជោសន្តិភាព ២២២២ ក្លាយជាសហគមន៍មួយដែលមានភាពរស់រវើក សុវត្ថិភាព និងមានការរីកចម្រើន។

ការចាប់ឆ្នោតប្រគល់ផ្ទះជូនអតីតយុទ្ធជនចំនួន១៧គ្រួសារនៅថ្ងៃនេះ មិនត្រឹមតែបន្ថែមដំបូលផ្ទះសម្រាប់ប្រជាពលរដ្ឋដែលធ្លាប់បំពេញកាតព្វកិច្ចចំពោះជាតិប៉ុណ្ណោះទេ ប៉ុន្តែថែមទាំងបន្ថែមក្តីសង្ឃឹម និងភាពកក់ក្តៅសម្រាប់ជីវិតគ្រួសាររបស់ពួកគេផងដែរ។
ពីអតីតកាលដែលពួកគេធ្លាប់ឈរជួរមុខដើម្បីការពារមាតុភូមិមកដល់ថ្ងៃនេះ ពួកគេបានទទួលទីជម្រកដែលអាចហៅបានយ៉ាងពេញចិត្តថា ផ្ទះរបស់យើង។ ស្នាមញញឹមរបស់អតីតយុទ្ធជននៅថ្ងៃទទួលកូនសោផ្ទះ គឺជារូបភាពមួយដែលបង្ហាញថា ការដឹងគុណចំពោះអ្នកមានគុណបំណាច់ចំពោះជាតិ មិនគួរត្រូវបានបំភ្លេចឡើយ៕

ដោយ ឈុន សារ៉ាត