AKP ភ្នំពេញ ថ្ងៃទី៤ ខែកញ្ញា ឆ្នាំ២០២៦-- ស្នងការដ្ឋាននគរបាលខេត្ដសៀមរាបបានប្រមូលផ្តុំកម្លាំងពាក់ព័ន្ធ ដើម្បីត្រៀមអន្តរាគមន៍ និងសង្គ្រោះប្រជាពលរដ្ឋ ក្នុងករណីកើតមានគ្រោះមហន្តរាយ និងហេតុការណ៍អាសន្នផ្សេងៗកើតឡើងនៅក្នុងភូមិសាស្ត្រខេត្តសៀមរាប ដែលដឹកនាំ និងបញ្ជាដោយផ្ទាល់ពីលោកឧត្តមសេនីយ៍ទោស្នងការ។

ក្នុងពិធីសំណេះសំណាល នាព្រឹកថ្ងៃទី៤ ខែកញ្ញា ឆ្នាំ២០២៦ លោកឧត្ដមសេនីយ៍ទោ ហួត សុធី ស្នងការ នៃស្នងការដ្ឋាននគរបាលខេត្ដសៀមរាបបានណែនាំដល់កម្លាំងទាំងអស់ឱ្យបង្កើនការប្រុងប្រយ័ត្ន និងត្រៀមខ្លួនជានិច្ច ដោយត្រូវរៀបចំកម្លាំង មធ្យោបាយ សម្ភារ និងឧបករណ៍សង្គ្រោះឱ្យបានគ្រប់គ្រាន់ ដើម្បីអាចចេញអន្តរាគមន៍បានទាន់ពេលវេលា ប្រកបដោយប្រសិទ្ធភាពនៅពេលមានស្ថានការណ៍ចាំបាច់ណាមួយកើតឡើង ដើម្បីចូលរួមការពារសុវត្ថិភាព អាយុជីវិត និងទ្រព្យសម្បត្តិរបស់ប្រជាពលរដ្ឋ ព្រមទាំងជួយជម្លៀសប្រជាពលរដ្ឋទៅកាន់ទីសុវត្ថិភាព ក្នុងករណីមានគ្រោះទឹកជំនន់ ខ្យល់កន្ត្រាក់ អគ្គិភ័យ ឬគ្រោះមហន្តរាយផ្សេងៗ។ ជាមួយគ្នានេះ កម្លាំងទាំងអស់ត្រូវយកចិត្តទុកដាក់លើការទទួលព័ត៌មាន និងរាយការណ៍ពីស្ថានការណ៍ឱ្យបានឆាប់រហ័ស ដើម្បីធានាថា រាល់ការអន្តរាគមន៍ និងសង្គ្រោះអាចប្រព្រឹត្តទៅបានទាន់ពេលវេលា និងកាត់បន្ថយហានិភ័យដែលអាចកើតមានចំពោះប្រជាពលរដ្ឋ។

បន្ថែមលើនោះផងដែរ លោកឧត្តមសេនីយ៍ទោស្នងការ បានក្រើនរំលឹកដល់កម្លាំងទាំងអស់ ត្រូវរក្សាស្មារតីទទួលខុសត្រូវខ្ពស់ មានវិន័យ សាមគ្គីភាព និងត្រៀមខ្លួនជានិច្ច ដើម្បីបំពេញភារកិច្ចការពារ និងបម្រើប្រជាពលរដ្ឋឱ្យបានល្អប្រសើរ ជាពិសេសក្នុងពេលប្រឈមនឹងគ្រោះមហន្តរាយ និងស្ថានការណ៍អាសន្នគ្រប់ប្រភេទ៕

ដោយ៖ ចាន់ សុភឿន (ប្រភព៖ ក្រសួងមហាផ្ទៃ)