AKP ភ្នំពេញ ថ្ងៃទី៤ ខែកញ្ញា ឆ្នាំ២០២៦-- ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ព្រឹកថ្ងៃទី៤ ខែកញ្ញា ឆ្នាំ២០២៦ បានអញ្ជើញបំពាក់គ្រឿងឥស្សរិយយសការងារជូនបុគ្គលិកអប់រំ យុវជន និងកីឡា ខេត្តកំពង់ចាម ដោយបានវាយតម្លៃខ្ពស់ចំពោះសមិទ្ធផលការងារអប់រំក្នុងខេត្តមួយនេះនាពេលកន្លងមក ជាពិសេសលទ្ធផលនៃការប្រឡងសញ្ញាបត្រមធ្យមសិក្សាទុតិយភូមិឆ្នាំ២០២៦ ដែលសម្រេចបានអត្រាសិស្សជាប់រហូតដល់ ៨៥% និងមានសិស្សទទួលបាននិទ្ទេស A ដល់ទៅ១០០នាក់។

ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានគូសបញ្ជាក់ថា មិនថាទទួលបាននិទ្ទេសណានោះទេ អ្វីដែលសំខាន់គឺសិស្សត្រូវបន្តខិតខំប្រឹងប្រែង ជ្រើសរើសជំនាញដែលខ្លួនស្រឡាញ់ និងស្របតាមតម្រូវការទីផ្សារការងារ ព្រោះការរៀនពូកែតែមួយមុខមិនទាន់គ្រប់គ្រាន់ក្នុងការធានាបាននូវភាពជោគជ័យនាពេលអនាគតនោះទេ គឺទាមទារឱ្យមានឆន្ទៈស្រឡាញ់ពិតប្រាកដលើជំនាញ និងការងាររបស់ខ្លួន ព្រមទាំងត្រូវមានការចូលរួមយ៉ាងសកម្មពីគ្រប់ភាគីពាក់ព័ន្ធ ទាំងអាជ្ញាធរមូលដ្ឋាន ថ្នាក់ដឹកនាំ មន្ត្រីអប់រំ លោកគ្រូ អ្នកគ្រូ និងអាណាព្យាបាល ដើម្បីធានាបាននូវគុណភាពអប់រំប្រកបដោយចីរភាព។

ឯកឧត្តមបណ្ឌិតសភាចារ្យ ហង់ជួន ណារ៉ុន បានរំលេចពីការលើកកម្ពស់វិស័យអប់រំនៅកម្ពុជា ដែលត្រូវពង្រឹងចាប់ផ្ដើមចេញពីការអភិវឌ្ឍការអប់រំកុមារតូច ជាពិសេសក្នុងរយៈពេល ១០០០ថ្ងៃដំបូង ដែលជាពេលវេលាខួរក្បាលកុមារលូតលាស់រហូតដល់ ៩០% ដែលទាមទារឱ្យមានការយកចិត្តទុកដាក់ខ្ពស់ និងអាហារូបត្ថម្ភល្អ។ សម្រាប់កម្រិតមត្តេយ្យសិក្សា គឺមិនត្រឹមតែផ្ដោតលើការរៀនសូត្រប៉ុណ្ណោះទេ ថែមទាំងជាដំណាក់កាលដ៏សំខាន់ក្នុងការបណ្ដុះស្មារតីកុមារឱ្យមានភាពក្លាហាន ម្ចាស់ការលើខ្លួនឯង ចេះគ្រប់គ្រងអារម្មណ៍ និងមានបំណិនដោះស្រាយបញ្ហាតាមរយៈការលេង ដែលជាមូលដ្ឋានគ្រឹះយ៉ាងរឹងមាំក្នុងកម្រិតសិក្សាបន្តបន្ទាប់ទៀត។ ទន្ទឹមនឹងនេះ ត្រូវបន្តពង្រឹងការអនុវត្តកញ្ចប់អំណានដំបូង និងគណិតវិទ្យាដំបូងនៅកម្រិតបឋមសិក្សាឱ្យកាន់តែមានប្រសិទ្ធភាព ដើម្បីត្រៀមលក្ខណៈឱ្យសិស្សមានសមត្ថភាពពេញលេញក្នុងការឈានទៅកម្រិតមធ្យមសិក្សា ដែលផ្ដោតលើការធ្វើទំនើបកម្ម ការអនុវត្តវិធីសាស្ត្របង្រៀនថ្មីៗ និងបច្ចេកវិទ្យា។

តាងនាមក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានអបអរសាទរយ៉ាងកក់ក្ដៅជូនចំពោះបុគ្គលិកអប់រំនៃខេត្តកំពង់ចាម ដែលទទួលបានការបំពាក់គ្រឿងឥស្សរិយយសនា ឱកាសនេះ ដោយបានគូសបញ្ជាក់ថា កិត្តិយសដ៏ឧត្ដុង្គឧត្ដមនេះ គឺជាការទទួលស្គាល់ និងជាការលើកទឹកចិត្តរបស់រាជរដ្ឋាភិបាល និងក្រសួងអប់រំ យុវជន និងកីឡា ចំពោះកិច្ចខិតខំប្រឹងប្រែងបំពេញភារកិច្ចអស់ពីកម្លាំងកាយចិត្ត ប្រកបដោយការទទួលខុសត្រូវខ្ពស់របស់លោកគ្រូ អ្នកគ្រូ ក្នុងការចូលរួមលើកកម្ពស់វិស័យអប់រំ យុវជន និងកីឡា ឱ្យកាន់តែរីកចម្រើន មានប្រសិទ្ធភាព និងចីរភាព៕

ដោយ៖ ចាន់ សុភឿន (ប្រភព៖ ក្រសួងអប់រំ)