AKP កំពង់ធំ ថ្ងៃ០១ ខែកញ្ញា ឆ្នាំ២០២៦ -- ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ យោធភូមិភាគទី៤ នារសៀលថ្ងៃទី០១ ខែកញ្ញា ឆ្នាំ២០២៦ នេះ បានដឹកនាំសហការីទៅសំណេះសំណាលសាកសួរសុខទុក្ខគ្រួសារវីរយុទ្ធជន ការពារបូរណភាពទឹកដីនៅតាមខ្សែបន្ទាត់ព្រំដែនកម្ពុជា-ថៃ ទិសទី១ តំបន់ប្រាសាទព្រះវិហារ ខេត្តព្រះវិហារ ដែលបច្ចុប្បន្នមានជីវភាពលំបាកខ្វះខាតកំពុងរស់នៅភូមិស្នោរ ឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ។
លោកស្រី អ៊ន ភី អាយុ ៤៨ឆ្នាំ មានកូនចំនួន ០១នាក់ និងមានឪពុកចាស់ជរាម្នាក់នៅក្នុងបន្ទុក បានរៀបរាប់ថា គាត់មានស្វាមីឈ្មោះ ម៉ៅ សត្យា អាយុ ៥២ឆ្នាំ មានឋានន្តរសក្តិអនុសេនីយ៍ឯក បម្រើការងារនៅក្នុងអង្គភាពកងពលធំអន្តរាគមន៍លេខ៣ ដែលកំពុងប្រចាំការបំពេញភារកិច្ចការពារបូរណភាពទឹកដីនៅតំបន់ប្រាសាទព្រះវិហារ ខេត្តព្រះវិហារ។ មុនពេលមានសង្គ្រាមឈ្លានពានពីទាហានថៃកើតឡើងនៅតាមខ្សែបន្ទាត់ព្រំដែន គាត់ និងកូនព្រមទាំងឪពុកចាស់ជរារស់នៅជាមួយស្វាមីនៅតំបន់ព្រំដែនកម្ពុជា-ថៃ ដោយបានទទួលផ្ទះ ១ខ្នងពីរាជរដ្ឋាភិបាលផ្ដល់ជូនសម្រាប់ស្នាក់អាស្រ័យ។ តែមកដល់ពេលនេះ ដោយសារមានសង្គ្រាមឈ្លានពានកើតឡើង ស្វាមីរបស់គាត់បានឱ្យគាត់មករស់នៅស្រុកកំណើតវិញ ប៉ុន្តែគាត់មិនទាន់មានកន្លែង ឬផ្ទះស្នាក់នៅឱ្យបានសមរម្យនៅឡើយ ហើយជីវភាពក៏មានការលំបាកខ្វះខាត។

នៅក្នុងឱកាសនោះ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ និងសហការី បាននាំយកនៅស្បៀងអាហារ គ្រឿងឧបភោគបរិភោគ ដែលជាអំណោយមនុស្សធម៌របស់សម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ទៅឧបត្ថម្ភជូនក្រុមគ្រួសារគាត់ ដែលរួមមានអង្ករចំនួន ៥០គីឡូក្រាម មីជាតិចំនួន ០២កេស ទឹកត្រីទឹកស៊ីអ៊ីវចំនួន ០២យួរ និងត្រីខកំប៉ុងចំនួន ០២យួរ និងសុំឱ្យក្រុមគ្រួសារគាត់ទទួលបាននូវសុខភាពល្អ ហើយក្នុងនាមកងទ័ពនៅសមរភូមិក្រោយ និងបន្តជួយគាំទ្រដល់បងប្អូនក្រុមគ្រួសារវីរយុទ្ធជន ដែលនៅសមរភូមិមុខជានិច្ច។

លោកស្រី អ៊ន ភី ជាភរិយារបស់វីរកងទ័ពនៅសមរភូមិមុខ បានសូមគោរពថ្លែងអំណរគុណដ៏ជ្រាលជ្រៅជាទីបំផុតចំពោះឧត្តមសេនីយ៍ទោ សោ ស៊ុន និងសហការី ដែលបាននាំយកនូវអំណោយមនុស្សធម៌របស់សម្ដេចមហាបវរធិបតី ហ៊ុន ម៉ាណែត និងលោកជំទាវ មកឧបត្ថម្ភជូនគាត់ ដែលកំពុងមានការខ្វះខាតនៅពេលនេះ និងសូមគោរពជូនពរសម្ដេច លោកជំទាវ និងថ្នាក់ដឹកនាំនៃបញ្ជាការដ្ឋានតំបន់ប្រតិបត្តិការសឹករងកំពង់ធំទាំងអស់ សូមទទួលបាននូវពុទ្ធពរទាំង ៤ប្រការកុំបីឃ្លៀងឃា្លតឡើយ៕
ដោយ៖ ស៊ុម វណ្ណា