AKP កំពង់ចាម ថ្ងៃ០១ ខែកញ្ញា ឆ្នាំ២០២៦ -- ពលរដ្ឋរងគ្រោះដោយខ្យល់កន្ត្រាក់ចំនួន ០៦គ្រួសារ ស្ថិតក្នុងស្រុកចំនួនពីរ គឺស្រុកព្រៃឈរ និងស្រុកកងមាស ខេត្តកំពង់ចាម ទទួលបាន អំណោយមនុស្សធម៌របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា តាមរយៈសាខាកាកបាទក្រហមកម្ពុជា ខេត្តកំពង់ចាម នៅថ្ងៃទី០១ ខែកញ្ញា ឆ្នាំ២០២៦ នេះ ក្រោមការយកទៅប្រគល់ជូនតាមលំនៅដ្ឋានដោយផ្ទាល់ ដោយលោកស្រី ប៉ាង ដានី អភិបាលរងខេត្ត តំណាងឯកឧត្តម អ៊ុន ចាន់ដា ប្រធានគណៈកម្មាធិការសាខាកាកបាទក្រហមកម្ពុជាខេត្ត។

ក្នុងឱកាសជួបសំណេះសំណាល និងសួរសុខទុក្ខដោយផ្ទាល់តាមលំនៅដ្ឋានរបស់បងប្អូនជនរងគ្រោះនាពេលនេះ លោកស្រី ប៉ាង ដានី អនុប្រធានសាខា បានពាំនាំនូវការចូលរួមសោកស្តាយជាមួយជនរងគ្រោះ និងបានពាំនាំនូវការសាកសួរសុខទុក្ខរបស់ថ្នាក់ដឹកនាំគ្រប់លំដាប់ថ្នាក់ពិសេស សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលជានិច្ចកាល សម្តេចតែងបានគិតគូរខ្ពស់ចំពោះជនរងគ្រោះ និងងាយរងគ្រោះ ដោយឱ្យតំណាងចុះជួបជាមួយក្រុមគ្រួសាររងគ្រោះ ព្រមទាំងបាននាំយកជាមួយនូវស្បៀងអាហារ សម្ភារៈ និងថវិកា ទៅឧបត្ថម្ភជូនដល់ជនរងគ្រោះ ពេលជួបមានគ្រោះថ្នាក់ក្នុងឧបទ្ទវហេតុអ្វីមួយដោយគ្រោះមហន្តរាយពីធម្មជាតិ និងបានអំពាវនាវដល់ប្រជាពលរដ្ឋទាំងអស់ ត្រូវតែមានការបង្កើនប្រុងប្រយ័ត្នខ្ពស់ចំពោះគ្រោះថ្នាក់ជាយថាហេតុហេតុណាមួយ ពិសេសនៅពេលមេឃកលភ្លៀង និងមានភ្លៀងធ្លាក់តែងតែមានបាតុភូតធម្មជាតិដូចជា ផ្គរ រន្ទះ ខ្យល់កន្ត្រាក់ជាដើម។
ចូរបងប្អូន ត្រូវតែមានការប្រុងប្រយ័ត្នខ្ពស់បំផុតទើបយើងបង្ការបានការការពារខ្លួន ជៀសផុតពីគ្រោះថ្នាក់ដល់រាងកាយ និងអាយុជីវិត និងចូលរួមថែទាំសុខភាពឱ្យបានល្អ។ ចំពោះអំណោយដែលសាខាកាកបាទក្រហមកម្ពុជាខេត្ត ផ្តល់ជូនក្នុង ១គ្រូសារ ទទួលបានអង្ករ ២៥គក្រ មី ត្រីខ ទឹកត្រី ទឹកស៊ីអ៊ីវ និងឃីត ១សម្រាប់ រួមនឹងថវិកាមួយចំនួនផងដែរ៕

ដោយ៖ ឆាយ ម៉ុត