AKP បន្ទាយមានជ័យ ថ្ងៃទី២៩ ខែសីហា ឆ្នាំ២០២៦ -- មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តបន្ទាយមានជ័យ សហការជាមួយរដ្ឋបាលស្រុកមង្គលបូរី បានរៀបចំពិធីដ៏មានអត្ថន័យបែកចែកវិញ្ញាបនបត្រសម្គាល់ម្ចាស់អចលនវត្ថុ (បណ្ណកម្មសិទ្ធិ) ជូនប្រជាពលរដ្ឋមកពី១៤ភូមិ ស្ថិតក្នុងឃុំចំនួនបួន នៅវត្តគយម៉ែង ក្រោមវត្តមានលោក លី សុវណ្ណារិទ្ធិ អភិបាលរងនៃគណៈអភិបាលខេត្តបន្ទាយមានជ័យ នាព្រឹកថ្ងៃសៅរ៍ ទី២៩ ខែសីហា ឆ្នាំ២០២៦។

ពិធីចែកបណ្ណកម្មសិទ្ធិចំនួន ៧ ២៤៦ បណ្ណ នាឱកាសនោះ គឺបានផ្តល់ជូនប្រជាពលរដ្ឋដែលរស់នៅក្នុងឃុំគោកបល្ល័ង្គ (ភូមិផ្អាវថ្មី) ឃុំគយម៉ែង (រួមមាន ភូមិគយម៉ែង ភូមិស្ដីលើ ភូមិផ្លូវសៀម ភូមិតានង ភូមិអង្ករខ្មៅ ភូមិកសាងថ្មី ភូមិស្ទឹងចាស់ និងភូមិស្ដីក្រោម) ឃុំភ្នំតូច (ភូមិអូរញរ) និងឃុំសំបួរ (រួមមាន ភូមិឆ្នើមមាស ភូមិស្រណាល ភូមិឡ និងភូមិតាមែងពក) ស្រុកមង្គលបូរី។

មានប្រសាសន៍សំណេះសំណាលក្នុងឱកាសនោះ លោក លី សុវណ្ណារិទ្ធិ អភិបាលរងខេត្តបន្ទាយមានជ័យ បានគូសបញ្ជាក់យ៉ាងច្បាស់ថា ការផ្ដល់វិញ្ញាបនបត្រសម្គាល់ម្ចាស់អចលនវត្ថុនាពេលនេះ មានសារៈសំខាន់ខ្លាំងណាស់សម្រាប់ជីវភាពរស់នៅរបស់ប្រជាពលរដ្ឋ។ បណ្ណទាំងនេះមិនត្រឹមតែជួយបញ្ចប់ក្តីព្រួយបារម្ភពាក់ព័ន្ធនឹងសិទ្ធិកាន់កាប់ដីធ្លី ឬដោះស្រាយបញ្ហាវិវាទនានាដែលអាចកើតមានប៉ុណ្ណោះទេ ប៉ុន្តែថែមទាំងជាការទទួលស្គាល់ និងធានានូវសិទ្ធិកម្មសិទ្ធិស្របច្បាប់ ដែលត្រូវបានការពារយ៉ាងរឹងមាំដោយច្បាប់នៃព្រះរាជាណាចក្រកម្ពុជាផងដែរ។

ថ្លែងដោយក្តីមោទនភាព លោកអភិបាលរងខេត្តបានលើកឡើងបន្ថែមថា បណ្ណកម្មសិទ្ធិទាំងអស់នេះ គឺជាផ្លែផ្កាដ៏ត្រចះត្រចង់កើតចេញពីនយោបាយគិតគូរពីសុខទុក្ខ និងជីវភាពប្រជាជនជាចម្បងរបស់រាជរដ្ឋាភិបាល ដែលដឹកនាំដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។ បណ្ណនេះមិនមែនគ្រាន់តែជាក្រដាសសម្គាល់ដីធ្លីធម្មតានោះឡើយ ប៉ុន្តែវាគឺជា បង្អែកសេដ្ឋកិច្ចដ៏រឹងមាំដែលបងប្អូនប្រជាពលរដ្ឋអាចយកទៅប្រើប្រាស់ជាទុនបម្រុងស្របច្បាប់ ក្នុងការស្នើសុំកម្ចីដើម្បីពង្រីកមុខរបរ បង្កើនប្រាក់ចំណូល និងលើកកម្ពស់លំនឹងជីវភាពគ្រួសារឱ្យកាន់តែប្រសើរឡើងពីមួយថ្ងៃទៅមួយថ្ងៃ។

យោងតាមរដ្ឋបាលខេត្ត ការចែកវិញ្ញាបនបត្រសម្គាល់ម្ចាស់អចលនវត្ថុជូនប្រជាពលរដ្ឋ គឺប្រព្រឹត្តទៅក្នុងរយៈពេល ០៧ថ្ងៃ ចាប់ពីថ្ងៃទី២៩ ខែសីហា ដល់ថ្ងៃទី០៤ ខែកញ្ញា ឆ្នាំ២០២៦។ ផុតរយៈពេលកំណត់នេះ មន្ត្រីជំនាញនៃមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តបន្ទាយមានជ័យ នឹងបន្តទទួល និងចែកបណ្ណជូនបងប្អូនប្រជាពលរដ្ឋរៀងរាល់ម៉ោងធ្វើការ ដោយគ្មានកំណត់រយៈពេលបន្តទៀតផងដែរ។ សម្រាប់បងប្អូនប្រជាពលរដ្ឋដែលមានឈ្មោះក្នុងបញ្ជីទទួលបណ្ណ សូមអញ្ជើញមកទទួលយកដោយនាំយកឯកសារពាក់ព័ន្ធមកជាមួយឱ្យបានត្រឹមត្រូវ តាមកាលបរិច្ឆេទ និងទីតាំងដែលបានកំណត់៕

ដោយ ឈុន សារ៉ាត