AKP កំពង់ធំ ថ្ងៃទី២៨ ខែសីហា ឆ្នាំ២០២៦--លោក សាយ គឹមឡម អភិបាលនៃគណៈអភិបាលស្រុកស្ទោង បានអំពាវនាវឱ្យប្រជាពលរដ្ឋបង្កើនការប្រុងប្រយ័ត្ន និងរួមគ្នាលុបបំបាត់ជម្រកមកខ្លាដើម្បីទប់ស្កាត់ជំងឺគ្រុនឈាមក្នុងឱកាសអញ្ជើញជួបសំណេះសំណាលសួរសុខទុក្ខអ្នកជំងឺ និងក្រុមគ្រូពេទ្យនៅមន្ទីរពេទ្យបង្អែកស្ទោង កាលពីរសៀលថ្ងៃទី២៧ ខែសីហា ឆ្នាំ ២០២៦។

លោកអភិបាលស្រុកបានសង្កត់ធ្ងន់ថា បងប្អូនប្រជាពលរដ្ឋទាំងអស់នៅក្នុងមូលដ្ឋានសូម បង្កើនស្មារតីប្រុងប្រយ័ត្នខ្ពស់ និងចូលរួមយ៉ាងសកម្មក្នុងការប្រយុទ្ធប្រឆាំងនឹងជំងឺគ្រុនឈាម ដែលកំពុងមានការកើនឡើងនៅក្នុងរដូវភ្លៀងនេះ ដើម្បីការពារសុខភាព និងជីវិតរបស់ក្រុមគ្រួសារ ជាពិសេសកុមារតូចៗ។ ត្រូវអនុវត្តន៍វិធានការសំខាន់ៗក្នុងការលុបបំបាត់ជម្រកមូសខ្លា ដើម្បីកាត់ផ្តាច់ប្រភពកកើតមូសខ្លា ធ្វើអនាម័យជុំវិញផ្ទះឱ្យបានជាប់លាប់។ ត្រូវលាងសម្អាតពាង លូ អាងទឹក ឬធុងស្តុកទឹកប្រើប្រាស់ឱ្យបាន ២ដងក្នុងមួយសប្តាហ៍ និងគ្របគម្របឱ្យបានជិតល្អ ដាក់ថ្នាំអាបែតនៅក្នុងអាង ឬពាងទឹកដែលមិនអាចគ្របបាន ដើម្បីសម្លាប់ដង្កូវទឹក ឬចិញ្ចឹមត្រីក្រឹមឱ្យស៊ីដង្កូវទឹក ប្រមូល និងកម្ទេចចោលនូវសំបកកង់ឡាន សំបកដប កំប៉ុង ត្រឡោកដូង ឬវត្ថុដក់ទឹកផ្សេងៗជុំវិញបរិវេណផ្ទះ។  ថែរក្សាការពារខ្លួន និងសមាជិកគ្រួសារកុំឱ្យមូសខ្លាខាំ។ មូសខ្លាជាភ្នាក់ងារចម្លងជំងឺគ្រុនឈាម ដែលច្រើនខាំមនុស្សនៅពេលថ្ងៃ(ព្រលឹមស្រាងៗ និងពេលរសៀល)។ ត្រូវគេងក្នុងមុងជានិច្ច ទោះបីជាគេងនៅពេលថ្ងៃ ឬពេលយប់ក៏ដោយ ពាក់អាវដៃវែង និងខោជើងវែងដល់កុមារ ដើម្បីបិទបាំងស្បែកកុំឱ្យមូសខាំ  ប្រើប្រាស់ឡេឬថ្នាំបាញ់ដេញមូស និងបើកបង្អួចឱ្យមានពន្លឺ និងខ្យល់ចេញចូលគ្រប់គ្រាន់ ដើម្បីកាត់បន្ថយភាពងងឹតដែលមូសចូលចិត្តជ្រកកោន។

លោក សាយ គឹមឡម បានសង្កត់ធ្ងន់ថា ប្រសិនបើសមាជិកគ្រួសារមានរោគសញ្ញាសង្ស័យ ដូចជា ក្តៅខ្លួនខ្លាំងភ្លាមៗ(៣៩°C-៤០°C) ឈឺក្បាល ឈឺត្របកភ្នែក ឈឺសាច់ដុំ ឬមានស្នាមអុចក្រហមលើស្បែក ត្រូវប្រញាប់បញ្ជូនអ្នកជំងឺទៅពិនិត្យ និងព្យាបាលនៅមណ្ឌលសុខភាព ឬមន្ទីរពេទ្យបង្អែកដែលជិតបំផុតនិងឱ្យបានលឿនបំផុត (ក្នុងរង្វង់ ២៤ ទៅ ៤៨ ម៉ោង)។

ជាមួយគ្នានេះលោកអភិបាលស្រុក ក៏បានណែនាំដល់អាជ្ញាធរឃុំត្រូវបន្តយុទ្ធនាការផ្សព្វផ្សាយណែនាំ និងធ្វើយុទ្ធនាការលុបបំបាត់ជម្រកមូសខ្លា និងបង្ការជំងឺគ្រុនឈាមនៅក្នុងមូលដ្ឋានឱ្យអស់ពីលទ្ធភាពនិងដូចភ្លៀងរលឹម។

លោក សាយ គឹមឡម អភិបាលស្រុកស្ទោង បានគោរពថ្លែងអំណរគុណយ៉ាងជ្រាលជ្រៅបំផុតដល់ឧកញ៉ា លីម ប៊ុនណ្ណា និងលោកជំទាវ ថុងធីតា ដែលបានឧបត្ថម្ភផ្លែក្រូចពោធិ៍សាត់ចំនួន៣០០ថង់ ដល់កុមារអ្នកជំងឺ ព្រមទាំងក្រុមគ្រូពេទ្យនៅក្នុងមន្ទីរពេទ្យបង្អែកស្ទោង ហើយលោកក៏បានកោតសរសើរខ្ពស់ដល់បុគ្គលិកទាំងអស់នៃមន្ទីរពេទ្យដែលបានខិតខំព្យាបាលអ្នកជំងឺទូទៅ ជាពិសេសជំងឺគ្រុនឈាមដោយ ក្រមសីលធម៌វិជ្ជាជីវៈខ្ពស់ និងឆាប់ជាសះស្បើយ៕

ដោយ ស៊ុម វណ្ណា