AKP កំពង់ធំ ថ្ងៃទី២៧ ខែសីហា ឆ្នាំ២០២៦--នៅទីបញ្ជាការតំបន់ប្រតិបត្តិការសឹករងកំពង់ធំ យោធភូមិភាគទី៤ នាព្រឹកថ្ងៃទី២៧ ខែសីហា ឆ្នាំ២០២៦នេះ បានរៀបចំកិច្ចប្រជុំបូកសរុបលទ្ធផលការងារយោធា សន្តិសុខប្រចាំឆមាសទី១ និងដាក់ចេញនូវទិសដៅសម្រាប់អនុវត្តបន្តឆមាសទី២ ឆ្នាំ២០២៦ក្រោមអធិបតីភាពឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ និងដោយមានការចូលរួមពីថ្នាក់ដឹកនាំ និងមេបញ្ជាការគ្រប់បណ្ដាកងឯកភាព និងស្ថាប័នចំណុះបញ្ជាការដ្ឋានតំបន់ប្រតិបត្តិការសឹករងកំពង់ធំជាច្រើនរូប។

លោកវរសេនីយ៍ទោ ស៊ុន សារិន នាយកាល័យទី៣ នៃបញ្ជាការដ្ឋានតំបន់ប្រតិបត្តិការសឹករងកំពង់ធំ បានឡើងធ្វើរបាយការណ៍ស្ដីពីលទ្ធផលសំខាន់ៗ នៃការងារយោធាសន្តិសុខប្រចាំឆមាសទី១ ដែលអង្គភាពសម្រេចបាន និងបានគូសបញ្ជាក់អំពីលទ្ធផលក្នុងកិច្ចប្រតិបត្តិការការពារ ទប់ស្កាត់ និងបង្ក្រាបទល្មើសធនធានធម្មជាតិ ទទួលបានជោគជ័យគួរជាទីមោទនៈ ព្រមទាំងបានគូសបញ្ជាក់អំពីចំណុចខ្លាំង ចំណុចខ្សោយ ព្រមទាំងបញ្ហាប្រឈមមួយចំនួន ដើម្បីអង្គប្រជុំបានជ្រួលជ្រាប។

ជាមួយគ្នានោះដែរ លោកវរសេនីយ៍ឯក អ៊ូ ឆេងកន មេបញ្ជាការរង នៃបញ្ជាការដ្ឋានតំបន់ប្រតិបត្តិការសឹករងកំពង់ធំ បានឡើងអាន និងប្រគល់ទិសដៅសំខាន់ៗមួយចំនួន ដែលត្រូវអនុវត្តបន្តនៅក្នុងឆមាសទី២ ឆ្នាំ២០២៦ ខាងមុខនេះ។

ឧត្តមសេនីយ៍ទោ សោម ស៊ុន បានថ្លែងនូវការកោតសរសើរ ចំពោះថ្នាក់ដឹកនាំគ្រប់លំដាប់ថ្នាក់ មេបញ្ជាការគ្រប់បណ្ដាកងឯកភាព និងនាយការិយាល័យ ស្ថាប័នចំណុះទាំងអស់ ព្រមទាំងយោធិនគ្រប់រូប ចំណុះឱ្យបញ្ជាការដ្ឋានតំបន់ប្រតិបត្តិការសឹករងកំពង់ធំ ដែលបានខិតខំប្រឹងប្រែងបំពេញភារកិច្ចប្រកបដោយស្មារតីទទួលខុសត្រូវខ្ពស់តាមផែនការដែលថ្នាក់ដឹកនាំនៃកងយោធពលខេមរភូមិន្ទបានប្រគល់ជូន។ ពិសេសក្នុងរយ:ពេលកន្លងទៅនេះ កងកម្លាំងនៃបញ្ជាការដ្ឋានតំបន់ប្រតិបត្តិការសឹករងកំពង់ធំបានចូលរួមក្នុងភារៈកិច្ចការពារបូរណភាពទឹកដី ក្នុងពេលដែលពួកចោរសៀមឃ្លានពានទឹកដី។ព្រមជាមួយនោះ កងកម្លាំងក៏បានចូលរួមចំណែកយ៉ាងសកម្ម និងជាស្នូលក្នុងការការពារ ទប់ស្កាត់ និងបង្ក្រាបបទល្មើសធនធានធម្មជាតិ ទទួលបានលទ្ធផលល្អប្រសើរ ដែលធ្វើឱ្យបច្ចុប្បន្ននេះបទល្មើសនេសាទនៅខេត្តកំពង់ធំ មានការថយចុះប្រមាណពី៧០ទៅ៨០% ។ ដោយឡែកការកាប់ទន្ទ្រានព្រៃឈើយកដីរបស់រដ្ឋធ្វើជាកម្មសិទ្ធិ មិនមានការកើតឡើងជាថ្មីទៀតឡើយ ហើយផ្ទៃដីដែលរងនូវការទន្ទ្រានកន្លងទៅត្រូវបានកងកម្លាំងចម្រុះដកហូត គ្រប់គ្រងជាសម្បត្តិរបស់រដ្ឋ និងកំពុងដាំស្តាព្រៃឈើឡើងវិញ ។

ឧត្តមសេនីយ៍ទោ សោម ស៊ុន បានប្រគល់ភារកិច្ចសំខាន់ៗមួយចំនួន ដែលត្រូវអនុវត្តបន្តនៅឆមាសទី២ ឆ្នាំ២០២៦ ខាងមុខនេះមានជាអាទិ៍៖ទី១.កងកម្លាំងទាំងអស់ ត្រូវត្រៀមខ្លួនរួចជាស្រេចអនុវត្តតាមបទបញ្ជា ក្នុងភារកិច្ចការពារបូរណភាពទឹកដី ដោយត្រូវហ្វឹកហ្វឺនរៀនសូត្រឱ្យបានជាប់ជាប្រចាំ។ទី២.ត្រូវបន្តសកម្មភាពការពារ ទប់ស្កាត់ និងបង្ក្រាបបទល្មើសធនធានធម្មជាតិឱ្យមានប្រសិទ្ធភាពបន្ថែមទៀត ។ ទី៣.ត្រូវចូលរួមក្នុងការអនុវត្តន៍ច្បាប់កាតព្វកិច្ចយោធា និងការកែទម្រង់កងយោធពលខេមរភូមិន្ទឱ្យទទួលបានជោគជជ័យ។ទី៤.បន្តសហការជាមួយអាជ្ញាធរដែនដី កងកម្លាំងប្រដៅវុធទាំងបី ក្នុងការអនុវត្តនូវគោលនយោបាយភូមិ ឃុំ សង្កាត់មានសុវត្ថិភាព រក្សាសន្តិសុខសណ្ដាប់ធ្នាប់សង្គម ជូនបប្រជាពលរដ្ឋនិងទី៥.ត្រូវបន្តចូលរួមដោះស្រាយការលំបាកជូនបងប្អូនអតីតយុទ្ធជន និងប្រជាជនដែលមានជីវភាពលំបាកខ្វះខាតនៅតាមមូលដ្ឋាននានាក្នុងភូមិសាស្ត្រខេត្តកំពង់ធំឱ្យបានល្អប្រសើរស្របតាមទិសស្លោកកងទ័ពជាកូនចៅរបស់ប្រជាជននិងធ្វើអ្វីៗដើម្បីប្រជាជន៕

ដោយ ស៊ុម វណ្ណា