AKP ភ្នំពេញ ថ្ងៃទី២៧ ខែសីហា ឆ្នាំ២០២៦ -- សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា និងជាប្រធានសន្និសីទប្រធានសភា នៃអន្តរសភាលើកទី២ (ISC-2) បានថ្លែងបញ្ជាក់ថា ការពិតនាពេលបច្ចុប្បន្នបានក្រើនរម្លឹកយើងថា ទោះបីជាយើងត្រឹមតែអង្គុយមើលភ្លើងសង្គ្រាមនៅតំបន់ដទៃក៏ផ្សែងហុយអាចធ្វើឱ្យយើងថប់ដង្ហើមដូចគ្នា ហើយផលប៉ះពាល់សេដ្ឋកិច្ចដែលបណ្តាលមកពីសង្គ្រាមនៅឆ្ងាយៗមិនមែនជារឿងដាច់ដោយឡែកទៀតនោះទេ តែវាបានប៉ះពាល់ដោយផ្ទាល់ដល់សេដ្ឋកិច្ចក្នុងស្រុករបស់យើង តាមរយៈតម្លៃប្រេងឥន្ធនៈដែលហក់ឡើងយ៉ាងគំហុក ការផ្ដាច់ចរន្តទីផ្សារនាំចេញ និងអត្រាអតិផរណាកាន់តែខ្ពស់ជាដើម។ ការថ្លែងបញ្ជាក់របស់សម្ដេចតេជោប្រធានព្រឹទ្ធសភាបែបនេះ ក្នុងឱកាសអញ្ជើញជាអធិបតីពិធីបើកសន្និសីទប្រធានសភា នៃអន្តរសភាលើកទី២ ក្រោមមូលបទ៖ «សាមគ្គីភាពដើម្បីសន្តិភាព និងវិបុលភាពរួម៖ ពង្រឹងច្បាប់អន្តរជាតិ និងដោះស្រាយជម្លោះដោយសន្តិវិធី» នៅរាជធានីភ្នំពេញ នាព្រឹកថ្ងៃទី២៧ ខែសីហា ឆ្នាំ២០២៦។

សម្តេចតេជោ ហ៊ុន សែន បានលើកឡើងថា សំណួរដ៏សំខាន់ដែលយើងត្រូវសួរខ្លួនឯងនៅថ្ងៃនេះគឺថា៖ «តើយើងត្រូវបន្ថែមភ្នក់ភ្លើងរបស់ប្រទេសដទៃ ឬមួយយើងត្រូវខិតខំពន្លឿនការរៀបចំផ្ទះសម្បែងឱ្យបានរៀបរយ ពន្លឿនការបង្កើតប្រព័ន្ធប្រកាសអាសន្នផ្ទៃក្នុង និងការរៀបចំឧបករណ៍ពន្លត់ភ្លើងរបស់យើង»។

សម្ដេចតេជោបានបញ្ជាក់ថា ចម្លើយគឺច្បាស់លាស់ យើងដាច់ខាតមិនត្រូវរួមបន្ថែមភ្នក់ភ្លើងសង្គ្រាមនោះឡើយ ហើយក៏មិនត្រូវលោតចូលទៅក្នុងល្បែងជម្លោះរបស់មហាអំណាចដែលកំពុងប្រកួតប្រជែងគ្នានោះដែរ។ សម្តេចតេជោប្រធានព្រឹទ្ធសភាបានគូសបញ្ជាក់ទៀតថា ប្រធានសភាត្រូវផ្តល់អាទិភាពដល់ការអនុម័ត និងអនុវត្តនូវសន្ធិសញ្ញាសេដ្ឋកិច្ចពហុភាគីដោយគ្មានការរើសអើង ដោយទាញយកផលប្រយោជន៍យ៉ាងសកម្មពីក្របខ័ណ្ឌពាណិជ្ជកម្មតំបន់ដែលមានស្រាប់ ដើម្បីទប់ស្កាត់មហាអំណាចមិនឱ្យចាត់ទុកប្រទេសតូចតាចជាកូនអុក ដែលអាចទាត់ចោលបាន។ សម្ដេចតេជោបានសង្កត់ធ្ងន់ថា៖ «យើងត្រូវកៀរគសំឡេងរួមរបស់យើង ដើម្បីប្រឆាំងយ៉ាងខ្លាំងក្លាចំពោះនយោបាយគាំពារនិយមពាណិជ្ជកម្ម ដែលត្រូវបានរុញច្រានដោយរបៀបវារៈនយោបាយលាក់កំបាំង ការយកលេសបរិស្ថាន និងការអនុវត្តស្តង់ដារពីរលើបញ្ហាសិទ្ធិមនុស្ស ដើម្បីយករឿងទាំងនោះធ្វើជាអាវុធក្នុងទំនាក់ទំនងសេដ្ឋកិច្ចប្រឆាំងរដ្ឋដែលទន់ខ្សោយជាង។

ក្រៅពីនេះយើងត្រូវពង្រឹងបណ្តាញ និងសេដ្ឋកិច្ចរបស់យើងឱ្យរឹងមាំ ដើម្បីបង្កើតជាខែលដ៏រឹងមាំប្រកបដោយភាពធន់ និងធានាថាយើងអាចការពារទីផ្សារក្នុងស្រុករបស់យើងបានយ៉ាងសកម្ម ទប់ស្កាត់ការរំខានដ៏ធ្ងន់ធ្ងរដល់ជីវភាពរស់នៅរបស់ប្រជាពលរដ្ឋ និងធានាបាននូវការងារសមរម្យ និងមានស្ថិរភាពសម្រាប់ប្រជាជនរបស់យើង»៕

ដោយ៖ ចាន់ សុភឿន