AKP ភ្នំពេញ ថ្ងៃទី២៧ ខែសីហា ឆ្នាំ២០២៦ -- សង្គ្រាមនៅក្នុងសតវត្សទី២១ លែងកំណត់ត្រឹមតែជាការប៉ះទង្គិចរវាងកងទ័ពនៅលើសមរភូមិរូបវន្តទៀតហើយ គឺសង្គ្រាមបានវិវត្តទៅជាសំណាញ់ដ៏ស្មុគស្មាញ និងមានច្រើនស្រទាប់នៃវិបត្តិដែលប្រទាក់ក្រឡាគ្នា ដែលត្រូវបានរចនាឡើងដើម្បីធ្វើឱ្យសង្គមបាត់បង់ស្ថិរភាព មុនពេលសង្គ្រាមចំហត្រូវបានប្រកាសជាផ្លូវការ។ នេះជាការលើកឡើងរបស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា និងជាប្រធានសន្និសីទប្រធានសភា នៃអន្តរសភាលើកទី២(ISC-2) ក្នុងឱកាសអញ្ជើញជាអធិបតីនៃពិធីបើកជាផ្លូវការសន្និសីទប្រធានសភា នៃអន្តរសភាលើកទី២ នៅរាជធានីភ្នំពេញ ក្រោមមូលបទ៖ «សាមគ្គីភាពដើម្បីសន្តិភាព និងវិបុលភាពរួម៖ ពង្រឹងច្បាប់អន្តរជាតិ និងដោះស្រាយជម្លោះដោយសន្តិវិធី» នៅរាជធានីភ្នំពេញ នាព្រឹកថ្ងៃទី២៧ ខែសីហា ឆ្នាំ២០២៦។

សម្តេចតេជោប្រធានព្រឹទ្ធសភាបានថ្លែងបញ្ជាក់ថា នៅក្នុងគំរូថ្មីនេះ ការវាយប្រហារជាយុទ្ធសាស្ត្រលែងមានការបែងចែកចំពោះប្រជាជនស៊ីវិល និងហេដ្ឋារចនាសម្ព័ន្ធស្នូលទៀតហើយ ដែលជម្លោះទំនើបបានឈានដល់ការវាយប្រហារលើហេដ្ឋារចនាសម្ព័ន្ធនៃជីវភាពរបស់ប្រជាពលរដ្ឋសាមញ្ញ ដោយបង្វែរទ្រព្យសាធារណៈឱ្យទៅជាសមរភូមិសកម្ម។ សម្តេចតេជោបានគូសបញ្ជាក់យ៉ាងដូច្នេះថា៖ «យើងឃើញមានការវាយប្រហារដោយដ្រូនទំនើបតម្រង់លើសំណង់ស៊ីវិល រួមមាន ផ្លូវ ស្ពាន ទីសក្ការៈសាសនា សាលារៀន និងរោងចក្រចម្រាញ់ប្រេង។ ទន្ទឹមនេះ ការបំផ្លិចបំផ្លាញដោយចេតនាទៅលើបំពង់បង្ហូរឧស្ម័ន និងការបាញ់ប្រហារទៅលើនាវាពាណិជ្ជកម្មដឹកប្រេងឥន្ធនៈបានក្លាយជាឧបករណ៍ដ៏ងាយស្រួលនៅក្នុងយុទ្ធវិធីនៃល្បែងភូមិសាស្ត្រនយោបាយ ដោយមិនគិតគូរទល់តែសោះចំពោះផលប្រយោជន៍សកលទាំងមូល ហើយថាការអនុវត្តច្បាប់ក្រៅដែនអធិបតេយ្យ ចំពោះបទល្មើសឆ្លងដែន ដូចជាការឆបោកអនឡាញ ដើម្បីជាលេសកាន់កាប់ទឹកដីប្រទេសដទៃដោយខុសច្បាប់ គឺជាទម្រង់សង្គ្រាមទំនើបមួយនៅក្នុងយុគសម័យនេះឯង»។ សម្តេចតេជោបានលើកឡើងពីសង្គ្រាមព្រំដែនកម្ពុជា-ថៃ គឺស្ថិតនៅក្នុងស្ថានភាពនេះឯង ដែលគេកំពុងកាន់កាប់ទឹកដីកម្ពុជា ដោយអះអាងថា ទឹកដីកម្ពុជា ខ្លះ គឺជាផ្នែកនៃល្បែងឆបោក។

ជាមួយគ្នានេះ សម្តេចតេជោ ហ៊ុន សែន បានបញ្ជាក់ផងដែរថា សង្គ្រាមពាណិជ្ជកម្មបានប្រើប្រាស់របាំងពន្ធគយ ដើម្បីដាក់ទណ្ឌកម្ម និងដកហូតការអនុគ្រោះពាណិជ្ជកម្មដែលមានពីមុនមក ខណៈសង្គ្រាមបច្ចេកវិទ្យាបានបង្ហាញពីការប្រកួតប្រជែងយ៉ាងស្រួចស្រាវ ដើម្បីគ្រប់គ្រងបញ្ញាសិប្បនិម្មិត ស៊ីមីកុងឌុចទ័រទំនើប និងហេដ្ឋារចនាសម្ព័ន្ធសន្តិសុខសាយប័រដ៏សំខាន់។ សម្ដេចតេជោបានបន្ថែមថា ចុងក្រោយ សង្គ្រាម និងនយោបាយគាំពារនិយមទាក់ទងនឹងធនធានធម្មជាតិ បាន និងកំពុងរុញច្រានឱ្យមានការដណ្ដើមគ្នាយ៉ាងខ្លាំងក្លា និងរឹតត្បិតលើធនធានយុទ្ធសាស្ត្រនានានៅលើពិភពលោកដូចជា ថាមពល និងរ៉ែកម្រ ដែលធ្វើឱ្យប្រទេសងាយរងគ្រោះធ្លាក់ចូលទៅក្នុងសំណាញ់អសន្តិសុខជាប្រព័ន្ធ៕

ដោយ៖ ចាន់ សុភឿន