AKP ខេត្តក្វាងនីញ, វៀតណាម ថ្ងៃទី២៦ ខែសីហា ឆ្នាំ២០២៦--

ប្រធានគណៈប្រតិភូអ្នកសារព័ត៌មានកម្ពុជា បានស្នើដល់ប្រព័ន្ធផ្សព្វផ្សាយ និងអង្គភាពសារព័ត៌មានទាំងអស់ចំណុះមន្ទីរវប្បធម៌ កីឡា និងទេសចរណ៍ខេត្តក្វាងនីញ ប្រទេសវៀតណាម ឱ្យចូលរួមជួយជំរុញការផ្សព្វផ្សាយអំពីសក្ដានុពលទេសចរណ៍ទៅវិញទៅមក ដើម្បីរួមចំណែកដល់ការអភិវឌ្ឍ «ឧស្សាហកម្មបៃតង» ក៏ដូចជាការរឹតចំណងមិត្តភាព និងទំនាក់ទំនងវប្បធម៌រវាងប្រជាជននៃប្រទេសទាំងពីរ កម្ពុជា-វៀតណាម។ ការស្នើបែបនេះ ក្នុងឱកាសដឹកនាំគណៈប្រតិភូអ្នកសារព័ត៌មានកម្ពុជាជួបពិភាក្សា និងផ្លាស់ប្ដូរបទពិសោធន៍ការងារជាមួយ លោក ង្វៀន ថាញ់ទុង អនុប្រធានមន្ទីរវប្បធម៌ កីឡា និងទេសចរណ៍ខេត្តក្វាងនីញ នា​រសៀលថ្ងៃពុធ ទី២៦ ខែសីហា ឆ្នាំ២០២៦។

ក្នុងឱកាសនេះ  លោក ជ្រីម ឆេងលីម ប្រធានគណៈប្រតិភូអ្នកសារព័ត៌មានកម្ពុជាបានគូសបញ្ជាក់ថា កិច្ចសហប្រតិបត្តិការជិតស្និទ្ធរវាងប្រព័ន្ធផ្សព្វផ្សាយនៃប្រទេសទាំងពីរ គឺជាចលករយ៉ាងសំខាន់ក្នុងការជំរុញវិស័យទេសចរណ៍ ដែលជាឧស្សាហកម្មគ្មានផ្សែង។ លោកបន្តថា ការជំរុញការផ្សព្វផ្សាយពីតំបន់ទេសចរណ៍ទៅវិញទៅមក រវាងកម្ពុជា និងវៀតណាម គឺជាការជួយគ្នាទៅវិញទៅមកក្នុងការអភិវឌ្ឍឧស្សាហកម្មបៃតង ជំរុញកំណើនសេដ្ឋកិច្ច-សង្គម និងជាពិសេសនោះ គឺការលើកកម្ពស់ការយល់ដឹង និងទំនាក់ទំនងវប្បធម៌រវាងប្រជាជននៃប្រទេសទាំងពីរឱ្យកាន់តែជិតស្និទ្ធ។

ជាការឆ្លើយតប លោក ង្វៀន ថាញ់ទុង អនុប្រធានមន្ទីរវប្បធម៌ កីឡា និងទេសចរណ៍ខេត្តក្វាងនីញ បានសម្ដែងនូវការស្វាគមន៍យ៉ាងកក់ក្តៅ និងបានចែករំលែកពីបទពិសោធន៍នៃការកែទម្រង់ប្រព័ន្ធផ្សព្វផ្សាយនៅក្នុងខេត្តបន្ទាប់ពីអនុវត្តគោលនយោបាយច្របាច់បញ្ចូលគ្នារវាងស្ថាប័នថ្នាក់ជាតិ និងថ្នាក់មូលដ្ឋាន ប្រមូលផ្តុំឱ្យស្ថិតនៅក្រោមដំបូលអង្គភាពតែមួយ ដោយធានាបាននូវប្រសិទ្ធភាពការងារខ្ពស់។

ទន្ទឹមនឹងនេះ ភាគីទាំងពីរបានសម្ដែងនូវបំណងបន្តរក្សាបណ្ដាញទំនាក់ទំនងយ៉ាងជិតស្និទ្ធជាមួយគ្នា ដើម្បីបង្កើនការផ្លាស់ប្ដូរបទពិសោធន៍ និងការបណ្ដុះបណ្ដាលជំនាញបច្ចេកទេសលើការធ្វើបរិវត្តកម្មឌីជីថលសារព័ត៌មាន ពង្រឹងកិច្ចសហប្រតិបត្តិការលើការងារព័ត៌មានការបរទេស ដើម្បីជួយផ្សព្វផ្សាយពីប្រវត្តិសាស្ត្រ វប្បធម៌ តំបន់ទេសចរណ៍ និងប្រជាជននៃប្រទេសទាំងពីរ កម្ពុជា-វៀតណាម ឱ្យកាន់តែទូលំទូលាយ។

ក្នុងជំនួបទស្សនកិច្ចការងារនាពេលនេះ មិនត្រឹមតែបើកទំព័រថ្មីនៃកិច្ចសហប្រតិបត្តិការផ្លាស់ប្ដូរបទពិសោធន៍វិជ្ជាជីវៈសារព័ត៌មានរវាងស្ថាប័នទាំងពីរប៉ុណ្ណោះទេ ប៉ុន្តែថែមទាំងបានរួមចំណែកយ៉ាងសំខាន់ក្នុងការរឹតបន្តឹងចំណងមិត្តភាពប្រពៃណី និងកិច្ចសហប្រតិបត្តិការគ្រប់ជ្រុងជ្រោយរវាងប្រជាជន និងប្រទេសទាំងពីរ កម្ពុជា និងវៀតណាម ឱ្យកាន់តែរីកចម្រើន និងមានចីរភាពតទៅមុខទៀត៕

ដោយ៖ ទូច វលក័្ខណ