AKP ព្រះសីហនុ ថ្ងៃទី២៤ ខែសីហា ឆ្នាំ២០២៦--កាលពីយប់ថ្ងៃទី២៣ ខែសីហា ឆ្នាំ២០២៦ លោក វរសេនីយ៍ឯក សុង កុសល មេបញ្ជាការរងកងរាជអាវុធហត្ថខេត្ត ដឹកនាំកម្លាំង ដោយមានការសម្របសម្រួលនីតិវិធីពីលោក ឆាយ សុត្រា ព្រះរាជអាជ្ញារង នៃអយ្យការអមសាលា ដំបូងខេត្តព្រះសីហនុបានចុះឆែកឆេរទីតាំងសណ្ឋាគារ ឈុនអុី ដែលមានកម្ពស់ ២២ជាន់ ស្ថិតនៅភូមិ២ សង្កាត់លេខ៣ ក្រុងព្រះសីហនុ ខេត្តព្រះសីហនុ រកឃើញជនបរទេសចំនួន ៣៥នាក់ (ស្រី ០៤នាក់)។ 
ក្នុងប្រតិបត្តិការនេះ គឺអនុវត្តតាមការណែនាំរបស់ ឯកឧត្តម គណៈបញ្ជាការឯកភាពរដ្ឋបាលខេត្តព្រះសីហនុ និងមេបញ្ជាការកង រាជអាវុធហត្ថខេត្តព្រះសីហនុ បានធ្វើការស្រាវជ្រាវឈានដល់ការចុះប្រតិបត្តិការជាក់ស្តែង។

  
ក្នុងកិច្ចប្រតិបត្តិការនេះកម្លាំងជំនាញកងរាជអាវុធហត្ថខេត្តសម្រេចដកហូតវត្ថុតាងរួមមាន៖
-កំព្យូទ័រយួរដៃ(laptop) ចំនួន ១៣គ្រឿង
-កំព្យូទ័រលើតុ All in one ចំនួន ២៨គ្រឿង
-ទូរស័ព្ទដៃផ្ទាល់ខ្លួន ចំនួន ៤០គ្រឿង
-ទូរស័ព្ទ ពាក់ព័ន្ធscams ចំនួន ៥៥គ្រឿង
-លិខិតឆ្លងដែនចំនួន ១០ក្បាល
-រថយន្តចំនួន ០៣គ្រឿង។
ព្រមទាំងធ្វើការឃាត់ខ្លួនជនបរទេសចំនួន ៣៥នាក់ (ស្រី៤នាក់) ជាជនដែលសង្ស័យជាប់ពាក់ព័ន្ធបទល្មើសឆបោកតាមប្រព័ន្ធបច្ចេកវិទ្យា(Online Scams)។

បច្ចុប្បន្នជនសង្ស័យទាំង ៣៥នាក់ រួមជាមួយវត្ថុតាងត្រូវបានបញ្ជូនទៅកាន់បញ្ជាការកងរាជអាវុធហត្ថខេត្តព្រះសីហនុ ដើម្បីបន្តនីតិវិធីសាកសួរ ។

សូមបញ្ជាក់ថា ចំពោះបទល្មើសឆបោកតាមប្រព័ន្ធបច្ចេកវិទ្យានេះ កម្លាំងគណៈបញ្ជាការឯកភាពរដ្ឋបាលខេត្តព្រះសីហនុ អនុវត្តន៍ដូចភ្លៀងរលឹម ដើម្បីលុបបំបាត់ និងសំអាតផ្ទះរបស់យើង ដើម្បីការពារសន្តិសុខ សណ្តាប់ធ្នាប់សាធារណៈជូនប្រជាពលនរដ្ឋ ក៏ដូចជាភ្ញៀវជាតិ អន្តរជាតិ ជាពិសេសអ្នកវិនិ យោគនៅក្នុងខេត្តព្រះសីហនុ ៕

ដោយ ងូ សុមុនី