AKP ភ្នំពេញ ថ្ងៃទី១៣ ខែសីហា ឆ្នាំ២០២៦ -- ក្នុងចំណោមភាពមិនប្រាកដប្រជាខាងភូមិសាស្ត្រនយោបាយដែលកំពុងកើនឡើង អាស៊ាន និងកាណាដាកំពុងពន្លឿនកិច្ចសហប្រតិបត្តិការសេដ្ឋកិច្ច និងយុទ្ធសាស្ត្ររបស់ពួកគេ បន្ទាប់ពីការធ្វើឱ្យប្រសើរឡើងនូវចំណងមិត្តភាពរបស់ពួកគេទៅជាភាពជាដៃគូយុទ្ធសាស្ត្រថ្មីៗនេះ។

ផែនការសកម្មភាពថ្មី ឆ្នាំ២០២៦-២០៣០ និងកិច្ចចរចាជាបន្តបន្ទាប់សម្រាប់កិច្ចព្រមព្រៀងពាណិជ្ជកម្មសេរីអាស៊ាន-កាណាដា កំពុងជំរុញសន្ទុះនេះ។ ទីក្រុងអូតាវ៉ាមើលឃើញប្លុកតំបន់នេះថាជាសសរស្តម្ភកណ្តាលនៃយុទ្ធសាស្ត្រឥណ្ឌូ-ប៉ាស៊ីហ្វិករបស់ខ្លួន ដើម្បីធ្វើពិពិធកម្មពាណិជ្ជកម្ម និងកាត់បន្ថយការពឹងផ្អែកលើទីផ្សារប្រពៃណី។

អាស៊ានបានរីកចម្រើនទៅជាដៃគូពាណិជ្ជកម្មធំទីបួនរបស់ប្រទេសកាណាដា ដោយផ្អែកលើការប្តេជ្ញាចិត្តរួមគ្នាចំពោះសណ្តាប់ធ្នាប់អន្តរជាតិដែលមានមូលដ្ឋានលើច្បាប់។ ខណៈដែលភាគីទាំងពីរកំពុងរៀបចំសម្រាប់ខួបលើកទី៥០ នៃភាពជាដៃគូសន្ទនាជាផ្លូវការរបស់ពួកគេ មន្ត្រីនៃភាគីទាំងពីរកំពុងផ្តោតការយកចិត្តទុកដាក់ទៅលើការប្រែក្លាយការប្តេជ្ញាចិត្តកម្រិតខ្ពស់ទៅជាវឌ្ឍនភាពសេដ្ឋកិច្ចជាក់ស្តែង។

វិស័យអាទិភាពសំខាន់ៗសម្រាប់កិច្ចសហការនាពេលអនាគតរួមមានបច្ចេកវិទ្យា ថាមពលស្អាត ការធ្វើពិពិធកម្មទីផ្សារ និងការផ្លាស់ប្តូររវាងប្រជាជន និងប្រជាជន។

វៀតណាមកាន់កាប់តំណែងសំខាន់មួយនៅក្នុងទំនាក់ទំនងដែលកំពុងត្រូវបានពង្រឹងនេះ ដោយបម្រើជាដៃគូពាណិជ្ជកម្មធំបំផុតរបស់ប្រទេសកាណាដានៅក្នុងអាស៊ាន និងជាសមាជិកសំខាន់មួយរបស់កិច្ចព្រមព្រៀងCPTPP។ វៀតណាមមានជំហរល្អក្នុងការធ្វើជាស្ពានក្នុងតំបន់ដើម្បីពង្រីកវិសាលភាពរបស់ប្រទេសកាណាដាចូលទៅក្នុងតំបន់អាស៊ីអាគ្នេយ៍ជាពិសេសតាមរយៈការបណ្តាក់ទុនរួមគ្នាក្នុងវិស័យយានយន្តអគ្គិសនីបច្ចេកវិទ្យាព័ត៌មាន និងការអប់រំ៕

ដោយ៖ យា ចិន្ដាខន្ដី (ប្រភព៖ VNA)