AKPតាកែវថ្ងៃទី0៦ ខែសីហាឆ្នាំ២០២៦--រដ្ឋបាលស្រុកព្រៃកប្បាស នាំយកទៀនព្រះវស្សា បច្ច័យ ទេយ្យទាន និងគ្រឿងឧបភោគបរិភោគ ប្រគេនព្រះសង្ឃដែលគង់ចាំព្រះវស្សាអស់ត្រីមាស ក្នុងពុទ្ធសីមាវត្តឈ្នះនិងវត្តធម្មវិន័យ។

ដើម្បីចូលរួមនិងលើកកម្ពស់វិស័យព្រះពុទ្ធសាសនា ដែលជាសាសនារបស់រដ្ឋឱ្យកាន់តែមានភាពរុងរឿង រដ្ឋបាលស្រុកព្រៃកប្បាស ដឹកនាំដោយលោក អ៊ិត សារ ប្រធានក្រុមប្រឹក្សាស្រុកព្រៃកប្បាស លោក គិន ភក្ដី អភិបាលនៃគណៈអភិបាលស្រុកព្រៃកប្បាស ព្រមទាំងថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ អាជ្ញាធរមូលដ្ឋាន ពុទ្ធបរិស័ទ និងបងប្អូនប្រជាពលរដ្ឋ បាននាំយកទៀនព្រះវស្សា គ្រឿងឧបភោគបរិភោគ បច្ច័យ និងទេយ្យទាន ប្រគេនព្រះសង្ឃដែលគង់ចាំព្រះវស្សាអស់ត្រីមាស ក្នុងពុទ្ធសីមាវត្តឈ្នះនិងវត្តធម្មវិន័យ។

ពិធីនេះរៀបចំឡើងនៅក្នុងវត្តឈ្នះ ស្ថិតនៅក្នុងឃុំស្នោស្រុកព្រៃកប្បាសខេត្តតាកែវ កាលពីព្រឹកថ្ងៃពុធ៧រោចខែទុតិយាសាឍឆ្នាំមមីអដ្ឋស័កព.ស២៥៧០ ត្រូវនឹងថ្ងៃទី០៥ ខែសីហា ឆ្នាំ២០២៦។

មានប្រសាសន៍សំណេះសំណាលក្នុងពិធីនោះ លោក គិន ភក្ដី អភិបាលនៃគណៈអភិបាលស្រុកព្រៃកប្បាស បានថ្លែងថាពិធីបុណ្យចូលព្រះវស្សាគឺជាពិធីបុណ្យមួយដែលមានសារៈសំខាន់ក្នុងព្រះពុទ្ធសាសនា។ជាពេលវេលាដ៏សំខាន់សម្រាប់ភិក្ខុសង្ឃ និងសាមណេបានរៀនធម៌ និងវិន័យយ៉ាងខ្ជាប់ខ្ជួនតាមពុទ្ធឱវាទ។បងប្អូនដែលជាអ្នកមានជំនឿទៅលើព្រះពុទ្ធសាសនា តែងតែនាំគ្នាប្រារព្ធពិធីបុណ្យនេះដោយនាំយកជាសាដក អង្ករ ភេសជ្ជៈ និងរបស់ប្រើប្រាស់ផ្សេងៗ ទៅប្រគេនព្រះសង្ឃតាមលទ្ធភាព។

ការប្រគេនទៀនវស្សានេះ គឺដើម្បីចូលរួមចំណែកទ្រទ្រង់ និងលើកស្ទួយព្រះពុទ្ធសាសនា ដែលជាសាសនារបស់រដ្ឋព្រមទាំងចូលរួមថែរក្សាប្រពៃណី ទំនៀមទម្លាប់ដ៏ល្អប្រពៃរបស់ជាតិ។ការប្រគេនបច្ច័យនិងទេយ្យទានដល់ព្រះសង្ឃនេះ ក៏បានជួយសម្រួលដល់ការគង់ចាំព្រះវស្សា របស់ព្រះសង្ឃក្នុងរយៈពេល៣ខែផងដែរ។

លោក គិន ភក្ដី បានមានប្រសាសន៍បន្តថា ពិធីបុណ្យចូលព្រះវស្សាគឺជាការរៀបចំឱ្យព្រះសង្ឃ បានឈប់សម្រាកនៅទីណាមួយ ឬក្នុងវត្តអារាមណាមួយក្នុងរយៈពេល៣ខែក្នុងរដូវធ្លាក់ភ្លៀង និងមិនអនុញ្ញាតឱ្យព្រះសង្ឃនិមន្តទៅទីឆ្ងាយ ដោយដាច់រាត្រីឆ្លងថ្ងៃនោះឡើយ។លើកលែងតែមានភារកិច្ចសំខាន់ចាំបាច់ ដូចជាឪពុកម្តាយឈឺធ្ងន់ ឬនិមន្តទៅសម្តែងធម៌ជាដើម ដោយតាំងចិត្តត្រលប់មកវិញក្នុងរយៈពេល៧ថ្ងៃ។ពិធីបុណ្យចូលព្រះវស្សា ប្រារព្ធធ្វើឡើងជារៀងរាល់ឆ្នាំចាប់ពីថ្ងៃ១រោចខែអាសាឍដល់ថ្ងៃ១៥កើតខែអស្សុជ។ពិធីត្រូវបានចាប់ផ្តើមនៅល្ងាចថ្ងៃទី១៥កើតខែអាសាឍ ដោយមានការចូលរួមពីសំណាក់បងប្អូននិងចាស់ទុំចំណុះជើងវត្ត នាំគ្នាហែទៀនវស្សា សំពត់ សាដក និងសម្ភារៈប្រើប្រាស់ផ្សេងៗ ហែជុំវិញព្រះវិហារ និងបន្ទាប់មកសម្តែងធម៌ទេសនា វេរទៀនវស្សានិងសម្ភារៈប្រគេនព្រះសង្ឃ។

នៅពេលព្រឹកឡើងនៅថ្ងៃ១រោចខែអាសាឍ មានម្ហូបអាហារ បង្អែម ប្រគេនដល់ព្រះសង្ឃ ហើយក្នុងអំឡុងរយៈ៣ខែនេះ បងប្អូនដែលមានទម្លាប់គោរពព្រះពុទ្ធសាសនា ក៏និយមបន្តធ្វើម្ហូបនំចំណី និងគ្រឿងប្រើប្រាស់ផ្សេងៗមកប្រគេនព្រះសង្ឃ ជាបន្តបន្ទាប់សម្រាប់ផ្គត់ផ្គង់ព្រះសង្ឃ គង់ចាំព្រះវស្សាក្នុងអំឡុងពេលនេះដែរ។

លោក គិន ភក្ដី បានមានប្រសាសន៍បន្ថែមថា ក្រៅពីរបស់ប្រើប្រាស់និងម្ហូបអាហារ បងប្អូនខ្មែរក៏បានជាវទានវស្សាទៅប្រគេនព្រះសង្ឃផងដែរ ព្រោះយើងមានជំនឿថាពន្លឺទៀនគឺជួយបំភ្លឺអនាគតជាតិ ឱ្យភ្លឺស្រស់បំព្រងនិងមានសេចក្តីសុខចម្រើន ដោយអំពើល្អសេចក្តីល្អ ហើយគេត្រូវរក្សាភ្លើងទៀនឱ្យឆេះជាប់រហូតគ្រប់រយៈពេលបីខែ។មួយវិញទៀតនេះជាការជួយដល់វត្តអារាម ក្នុងការមានទៀនប្រើប្រាស់ដើម្បីដុតបំភ្លឺនៅពេលយប់ផងដែរ។

លោក គិន ភក្ដី ក៏បានគូសបញ្ជាក់ផងដែរថា វឌ្ឍនភាពទាំងផ្នែកពុទ្ធចក្រនិងអាណាចក្រ ដែលយើងទទួលបានសព្វថ្ងៃ គឺមិនអាចកាត់ផ្ដាច់ចេញ ពីកត្តាសុខសន្តិភាពបានឡើយ។សន្តិភាពដ៏មានតម្លៃនេះ គឺកើតចេញពីកាលះបង់និងការយកជីវិតធ្វើជាដើមទុន របស់សម្ដេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រីនៃព្រះរាជាណាចក្រកម្ពុជា ដែលបានដឹកនាំប្រែក្លាយកម្ពុជាពីសង្គ្រាម មកជាប្រទេសដែលមានការអភិវឌ្ឍលើគ្រប់វិស័យ ទាំងសាលារៀន មន្ទីរពេទ្យ ស្ពាន និងផ្លូវថ្នល់ខ្វាត់ខ្វែង។បើគ្មានសន្តិភាពទេ កុំថាឡើយដល់ការអភិវឌ្ឍ សូម្បីតែសិទ្ធិរស់រានមានជីវិតក៏គ្មានដែរ។ដូច្នេះសូមបងប្អូនប្រជាពលរដ្ឋទាំងអស់ ត្រូវរួមគ្នាការពារនិងថែរក្សា សុខសន្តិភាពឱ្យបានគង់វង់យូរអង្វែង ដើម្បីបន្តវឌ្ឍនភាពជាតិក្រោមគោលនយោបាយ ឈ្នះ-ឈ្នះរបស់រាជរដ្ឋាភិបាល។

នៅក្នុងឱកាសនោះដែរ រដ្ឋបាលស្រុកព្រៃកប្បាស បានយកទៀនព្រះវស្សា បច្ច័យ និងទេយ្យទាន ប្រគេនព្រះសង្ឃគង់ចាំព្រះវស្សាទាំងពីរវត្ត ដោយមួយវត្តៗទទួលបាន ទៀនវស្សាធំ១គូ អង្ករ១០០គីឡូក្រាម មី៥កេស ត្រីខ៥ឡូ ទឹកត្រី៥យួរ ទឹកស៊ីអ៊ីវ៥យួរ ទឹកសណ្ដែក៥កេស ទឹកសុទ្ធ៥កេស សៀង៥គីឡូក្រាម ប្រេងឆា៥លីត្រ និងបច្ច័យចំនួន១លាន២សែនរៀល។រដ្ឋបាលស្រុកព្រៃកប្បាសក៏បានប្រគេនបច្ច័យបន្ថែម ដល់ព្រះចៅអធិការវត្តឈ្នះ ចំនួន១៥ម៉ឺនរៀល ព្រះចៅអធិការវត្តធម្មវិន័យ ចំនួន១៥ម៉ឺនរៀល ព្រះសង្ឃគង់នៅវត្តឈ្នះវត្តប្រារព្ធកម្មវិធី ចំនួន២០អង្គដោយមួយអង្គៗ ប្រគេនបច្ច័យចំនួន២ម៉ឺនរៀល។អាចារ្យគណៈកម្មការវត្តចូលរួមទាំងពីរវត្ត អាចារ្យធំចំនួន៥ម៉ឺនរៀល អាចារ្យគណៈកម្មការ៨នាក់ម្នាក់ៗ២ម៉ឺនរៀល៕

ដោយ៖ តាកែវ អ៊ុច សៀង