AKP ភ្នំពេញ ថ្ងៃទី៣១ ខែកក្កដា ឆ្នាំ២០២៦ -- ក្រុមប្រឹក្សាសន្តិសុខជាតិអ៊ីរ៉ាក់កាលពីពេលថ្មីៗនេះ បានសម្រេចចិត្តបង្កើតផែនការដ៏ទូលំទូលាយមួយដើម្បីធានាសន្តិសុខរបស់ប្រទេស បន្ទាប់ពីមានការវាយប្រហាររបស់សហរដ្ឋអាមេរិក-អារ៉ាប៊ីសាអូឌីត ដែលបានធ្វើឡើងកាលពីព្រឹកព្រលឹមថ្ងៃពុធ។

ក្រុមប្រឹក្សាបាននិយាយនៅក្នុងសេចក្តីថ្លែងការណ៍មួយ បន្ទាប់ពីកិច្ចប្រជុំបន្ទាន់មួយថា «ក្រុមប្រឹក្សារដ្ឋមន្ត្រីសម្រាប់សន្តិសុខជាតិបានសម្រេចចិត្តអនុម័តផែនការសន្តិសុខដ៏ទូលំទូលាយមួយដើម្បីពង្រឹងការគ្រប់គ្រងទូទាំងប្រទេស ប្រឈមមុខនឹងការរំលោភបំពានណាមួយលើអធិបតេយ្យភាពរបស់ប្រទេសអ៊ីរ៉ាក់ និងការពារប្រភពណាមួយពីការប្រើប្រាស់ទឹកដីអ៊ីរ៉ាក់ដើម្បីគំរាមកំហែងដល់រដ្ឋជិតខាង»។

ដើម្បីឆ្លើយតបទៅនឹងការវាយប្រហារនេះ ក្រុមប្រឹក្សាបានណែនាំក្រសួងការបរទេសរបស់ប្រទេសអ៊ីរ៉ាក់ឱ្យធ្វើសកម្មភាពស្របតាមច្បាប់អន្តរជាតិ និងធម្មនុញ្ញអង្គការសហប្រជាជាតិ កត់ត្រាហេតុការណ៍ និងការពារសិទ្ធិស្របច្បាប់របស់ប្រទេសអ៊ីរ៉ាក់។

បញ្ជាការកណ្តាលសហរដ្ឋអាមេរិក បាននិយាយកាលពីយប់ថ្ងៃអង្គារថាយន្តហោះចម្បាំងរបស់សហរដ្ឋអាមេរិក និងអារ៉ាប៊ីសាអូឌីត បានវាយប្រហារអ្វីដែលខ្លួនពិពណ៌នាថា ជាភេរវករដែលមានសម្ព័ន្ធភាពជាមួយអ៊ីរ៉ង់ នៅភាគខាងកើតប្រទេសអ៊ីរ៉ាក់ ដើម្បីឆ្លើយតបទៅនឹងការវាយប្រហារតាមអាកាសដោយយន្តហោះគ្មានមនុស្សបើកលើមូលដ្ឋានទ័ពអាម៉េរិក និងហេដ្ឋារចនាសម្ព័ន្ធរបស់អារ៉ាប៊ីសាអូឌីត ដែលបានកត់ត្រាក្នុងរយៈពេល៧២ម៉ោងមុន។ កងកម្លាំងចល័តប្រជាជនបាននិយាយថា យ៉ាងហោចណាស់មនុស្សពីរនាក់បានរងរបួសនៅក្នុងការវាយប្រហារតាមអាកាសលើទីស្នាក់ការកណ្តាលរបស់ខ្លួន។

កងកម្លាំងចល័តប្រជាជនបាននិយាយថា មនុស្ស ២០នាក់ត្រូវបានសម្លាប់ និង ៣២នាក់ផ្សេងទៀតបានរងរបួសនៅក្នុងការវាយប្រហាររបស់អារ៉ាប៊ីសាអូឌីត និងសហរដ្ឋអាមេរិកលើទីតាំងរបស់ខ្លួននៅទូទាំងប្រទេស៕

ដោយ៖ យា ចិន្ដាខន្ដី (ប្រភព៖ ស្ពុតនីក)