AKP ភ្នំពេញ ថ្ងៃទី១ ខែសីហា ឆ្នាំ២០២៦ -- ការព្យាបាល និងស្ដារនីតិសម្បទាអ្នកញៀនគ្រឿងញៀន មិនមែនគ្រាន់តែជាការចូលរួមប្រយុទ្ធប្រឆាំងគ្រឿងញៀនប៉ុណ្ណោះទេ ប៉ុន្តែជាការចូលរួមអភិវឌ្ឍមូលធនមនុស្ស។ នេះជាប្រសាសន៍របស់ឯកឧត្តមសាស្រ្តាចារ្យ ឈាង រ៉ា រដ្ឋមន្ត្រីក្រសួងសុខាភិបាល និងជាប្រធានគណៈកម្មាធិការទទួលបន្ទុកការងារព្យាបាល និងស្តារនីតិសម្បទាអ្នកញៀនគ្រឿងញៀន (គ.ព.ស.គ.ញ) ក្នុងកិច្ចប្រជុំគណៈកម្មាធិការ គ.ព.ស.គ.ញ ដើម្បីត្រួតពិនិត្យវឌ្ឍនភាព និងពង្រឹងការអនុវត្តការងារថែទាំ ព្យាបាល ស្តារនីតិសម្បទា និងសមាហរណកម្មអ្នកញៀនគ្រឿងញៀន កាលពីថ្ងៃទី៣១ ខែកក្កដា ឆ្នាំ២០២៦ នៅទីស្ដីការក្រសួង ដោយកិច្ចប្រជុំនេះមានការចូលរួមពីថ្នាក់ដឹកនាំ និងតំណាងក្រសួង ស្ថាប័នពាក់ព័ន្ធ តំណាងរដ្ឋបាលរាជធានី-ខេត្ត និងមន្ទីរសុខាភិបាលរាជធានី-ខេត្តទាំង២៥ សរុបប្រមាណ១០០រូប។

ឯកឧត្តមសាស្រ្តាចារ្យរដ្ឋមន្ត្រីបានបញ្ជាក់ថា ការព្យាបាលអ្នកញៀនគ្រឿងញៀន គឺជាការងារពហុវិស័យមួយ ដែលទាមទារកិច្ចសហការជិតស្និទ្ធរវាងក្រសួង ស្ថាប័នពាក់ព័ន្ធ និងអាជ្ញាធរមូលដ្ឋាន ដើម្បីធានាឱ្យការគ្រប់គ្រង ការព្យាបាល និងការស្តារនីតិសម្បទាអ្នកញឿនគ្រឿងញៀនប្រកបដោយគុណភាពនិងអាចឱ្យពួកគាត់វិលត្រឡប់ទៅរស់នៅក្នុងសហគមន៍វិញដោយជោគជ័យ។

ក្នុងឱកាសនោះ ឯកឧត្តមសាស្រ្តាចារ្យរដ្ឋមន្ត្រី បានផ្តល់អនុសាសន៍សំខាន់ៗ រួមមាន ការពង្រឹងគុណភាពនៃការព្យាបាល ពង្រឹងប្រព័ន្ធតាមដាន ការបញ្ជូន និងលើកកម្ពស់ការបង្ការតាមគោលការណ៍ «ការពារប្រសើរជាងព្យាបាល» ដោយមានការចូលរួមពីអាជ្ញាធរ និងគ្រួសារ ព្រមទាំងពង្រឹងការអភិវឌ្ឍធនធានមនុស្ស ពង្រីកសេវាព្យាបាល និងជំរុញការប្រើប្រាស់បច្ចេកវិទ្យាឌីជីថលងាយៗក្នុងការគ្រប់គ្រងទិន្នន័យ។

ឯកឧត្តមសាស្រ្តាចារ្យរដ្ឋមន្ត្រីបានអំពាវនាវឱ្យគ្រប់ក្រសួង ស្ថាប័ន និងភាគីពាក់ព័ន្ធ បន្តពង្រឹងកិច្ចសហការឱ្យកាន់តែជិតស្និទ្ធ ដើម្បីលើកកម្ពស់ប្រសិទ្ធភាពនៃការងារថែទាំ ព្យាបាល ស្តារនីតិសម្បទា និងសមាហរណកម្មអ្នកញៀនគ្រឿងញៀន សំដៅរួមចំណែកលើកកម្ពស់សុខុមាលភាព និងគុណភាពជីវិតរបស់ប្រជាពលរដ្ឋ។

សូមជម្រាបជូនថា ក្នុងកិច្ចប្រជុំនេះ តំណាងក្រសួងសង្គមកិច្ច អតីតយុទ្ធជន និងយុវនីតិសម្បទា អគ្គលេខាធិការដ្ឋាននៃអាជ្ញាធរជាតិប្រយុទ្ធប្រឆាំងគ្រឿងញៀន និងក្រសួងសុខាភិបាល បានរាយការណ៍ពីវឌ្ឍនភាពនៃការអនុវត្តផែនការសកម្មភាពឆ្នាំ២០២៦-២០២៨។ អង្គប្រជុំក៏បានពិភាក្សាលើបញ្ហាប្រឈម និងដំណោះស្រាយ ដើម្បីពង្រឹងគុណភាពសេវាព្យាបាល ស្តារនីតិសម្បទា និងការធ្វើសមាហរណកម្មអ្នកញៀនគ្រឿងញៀនឱ្យកាន់តែមានប្រសិទ្ធភាព៕

ដោយ ទេស ច័ន្ទសុធារី (ប្រភព៖ ក្រសួងសុខាភិបាល)