AKP ភ្នំពេញ ថ្ងៃទី២១ ខែកក្កដា ឆ្នាំ២០២៦ -- អ៊ីរ៉ង់បានប្រកាសនៅថ្ងៃចន្ទថាខ្លួនកំពុងពិនិត្យមើលសំណើបន្ធូរបន្ថយភាពតានតឹងដែលផ្តល់ដោយអ្នកសម្របសម្រួលភាគីទីបី បន្ទាប់ពីការកើនឡើងនៃការវាយប្រហារផ្នែកយោធាដោយផ្ទាល់ជាមួយសហរដ្ឋអាមេរិកនាពេលថ្មីៗនេះ។ អ្នកនាំពាក្យក្រសួងការបរទេសអ៊ីរ៉ង់ លោក អេស្មែល បាកាអី បានបញ្ជាក់ពីការទទួលបានសំណើទាំងនេះ ប៉ុន្តែបានបដិសេធមិនផ្តល់ព័ត៌មានលម្អិតជាក់លាក់ទេដោយលោកបានសង្កត់ធ្ងន់ថា ទីក្រុងតេអេរ៉ង់នៅតែប្តេជ្ញាចិត្តចំពោះកិច្ចខិតខំប្រឹងប្រែងការទូត រួមជាមួយនឹងការការពារផ្នែកយោធារបស់ខ្លួន។

មន្ត្រីរូបនេះក៏បានគូសបញ្ជាក់ពីការសម្របសម្រួលជាបន្តបន្ទាប់ជាមួយប្រទេសអូម៉ង់ ដើម្បីការពារសន្តិសុខ និងអះអាងអំពីអធិបតេយ្យភាពរបស់អ៊ីរ៉ង់នៅក្នុងច្រកសមុទ្រហ័រមុស ដែលជាផ្លូវសមុទ្រដ៏សំខាន់មួយដែលភាពតានតឹងបានផ្ទុះឡើងម្តងទៀត។ បើទោះបីជាមានអនុស្សរណៈយោគយល់គ្នាដែលសម្របសម្រួលដោយប៉ាគីស្ថានដែលត្រូវបានចុះហត្ថលេខាកាលពីខែមុន ដែលមានគោលបំណងសម្រេចបាននូវសន្តិភាពយូរអង្វែងក៏ដោយ ក៏ការវាយប្រហារគ្នាដោយអាវុធដដែលៗបានគំរាមកំហែងដល់កិច្ចខិតខំប្រឹងប្រែងសន្តិភាព។

លើសពីនេះទៀត លោក បាកាអី បានជំទាស់នឹងការអះអាងថ្មីៗរបស់ប្រធានាធិបតីអាម៉េរិក លោក ដូណាល់ ត្រាំ ទាក់ទងនឹងការដោះលែងពលរដ្ឋអាម៉េរិកដែលត្រូវបានឃុំខ្លួនដោយខុសច្បាប់។ ដោយបញ្ជាក់សារជាថ្មីនូវសេចក្តីថ្លែងការណ៍មុនដោយប្រព័ន្ធតុលាការអ៊ីរ៉ង់ លោក បាកាអីបានបញ្ជាក់ថា គ្មានអ្នកទោសអាម៉េរិកណាម្នាក់ដែលសមនឹងការពិពណ៌នារបស់លោក ត្រាំ ត្រូវបានឃុំខ្លួនពីបទចារកម្ម ឬត្រូវបានដោះលែងនោះទេដោយបដិសេធចំពោះការអះអាងនេះ បើទោះបីជាទីក្រុងវ៉ាស៊ីនតោនទទួលស្គាល់ជាសាធារណៈចំពោះចលនានេះជាកាយវិការនៃសុច្ឆន្ទៈក៏ដោយ៕

ដោយ៖ យា ចិន្ដាខន្ដី (ប្រភព៖ AA-AKP)