AKPតាកែវថ្ងៃទី២០ខែកក្កដាឆ្នាំ២០២៦--ឯកឧត្តម អ៊ូច ភា រដ្ឋលេខាធិការក្រសួងមហាផ្ទៃ និងជាប្រធានក្រុម ការងាររាជរដ្ឋាភិបាល ចុះមូលដ្ឋានឃុំត្រពាំងធំខាងជើង និងលោកជំទាវ បាននាំយកទៀនព្រះវស្សា បច្ច័យ ទេយ្យទាន ប្រគេនព្រះសង្ឃចំនួន5វត្ត នៅក្នុងឃុំត្រពាំងធំខាងជើង។

ក្នុងពិធីនោះដែរមានការអញ្ជើញចូលរួមពីលោក លោកស្រីអនុប្រធាន សមាជិក សមាជិកា ក្រុមការងាររាជរដ្ឋាភិបាលចុះមូលដ្ឋានឃុំត្រពាំងធំខាងជើង ថ្នាក់ ដឹកនាំ មន្ត្រីរាជការ កងកម្លាំងប្រដាប់អាវុធ ចំណុះរដ្ឋបាលស្រុកត្រាំកក់ ព្រះសង្ឃ ពុទ្ធបរិស័ទ និងបងប្អូនប្រជាពលរដ្ឋ ចូលរួមជាច្រើនរូបផងដែរ។

ពិធីនេះរៀបចំឡើងនៅក្នុងវត្តមង្គលមានលក្ខណ៍ ស្ថិតនៅក្នុងឃុំត្រពាំងធំខាង ជើងស្រុកត្រាំកក់ខេត្តតាកែវ កាលពីព្រឹកថ្ងៃទី១៩ខែកក្កដា ឆ្នាំ២០២៦។ 

មានប្រសាសន៍សំណេះសំណាលក្នុងឱកាសនោះ ឯកឧត្តម អ៊ូច ភា រដ្ឋលេខា ធិការក្រសួងមហាផ្ទៃ បានពាំនាំនូវការសាកសួរសុខទុក្ខ និងក្តីនឹករលឹកដ៏ជ្រាលជ្រៅ ពីសំណាក់ថ្នាក់ដឹកនាំជាន់ខ្ពស់រាជរដ្ឋាភិបាល ជូនដល់បងប្អូនប្រជាពលរដ្ឋ និងពុទ្ធបរិស័ទទាំងអស់។ជាមួយគ្នានេះដែរ ឯកឧត្តមបានមានប្រ សាសន៍លើកឡើងយ៉ាងច្បាស់ៗ អំពីគុណតម្លៃដ៏មហាសាលនៃ"សុខសន្តិភាព"  មានសន្តិភាពទើបមានការអភិវឌ្ឍលើគ្រប់វិស័យ ទាំងពុទ្ធចក្រនិងអាណាចក្រ។សន្តិភាពគឺជាគ្រឹះដ៏រឹងមាំ ដែលអនុញ្ញាតឱ្យយើងមានឱកាសជួបជុំគ្នា ធ្វើបុណ្យទានតាមគន្លងប្រពៃណីសាសនា ដូចជាពិធីប្រគេនទៀនវស្សានៅថ្ងៃនេះជាដើម ។

ឯកឧត្តមរដ្ឋលេខាធិការក្រសួងមហាផ្ទៃ ក៏បានលើកឡើងផងដែរ អំពីកិច្ចខិតខំប្រឹងប្រែងឥតឈប់ឈររបស់រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលជានិច្ចកាលតែងតែតម្កល់ផលប្រយោ ជន៍ជាតិ និងប្រជាជនជាធំ។ តាមរយៈការដាក់ចេញនូវយុទ្ធសាស្ត្របញ្ចកោណ ដើម្បីជំរុញសេដ្ឋកិច្ចជាតិ កសាងហេដ្ឋារ ចនាសម្ព័ន្ធ បម្រើឱ្យជីវភាពរស់នៅរបស់ប្រជាពលរដ្ឋ និងរក្សាបាននូវស្ថិរភាពនយោបាយយ៉ាងរឹងមាំ។ ហេតុនេះបងប្អូនប្រជាពលរដ្ឋទាំងអស់ ត្រូវរួមគ្នាបន្តថែរក្សា និងការពារសន្តិភាពនេះឱ្យបានគង់វង្ស ដើម្បីភាពចម្រើនរុងរឿងរបស់ប្រទេសជាតិយើងតទៅមុខទៀត ។

នៅក្នុងឱកាសនោះដែរ ឯកឧត្តមប្រធានក្រុមការងារ និងសហការី បាននាំយកនូវទៀនព្រះវស្សា បច្ច័យ និងទេយ្យទាន ប្រគេនដល់ព្រះសង្ឃទាំង៥វត្ត ដោយក្នុង១វត្តៗ ទទួលបាន៖ អង្ករ1បាវទម្ងន់50គីឡូក្រាម ទៀនព្រះវស្សា1គូ មី1កេស ទឹកសុទ្ធ2កេស ទឹកក្រូច1កេសទឹកត្រី1យួរ។បច្ច័យវត្តមង្គលមានលក្ខណ៍ដែលជាវត្តប្រារព្ធពិធី ប្រគេនចំនួន50ម៉ឺនរៀល ចំណែកឯវត្ត4ផ្សេងទៀត ក្នុង1វត្តៗប្រគេនបច្ច័យចំនួន20ម៉ឺនរៀល៕

 ដោយ៖ អ៊ុច សៀង