AKP ភ្នំពេញ ថ្ងៃទី០២ ខែកក្កដា ឆ្នាំ២០២៦--ឯកឧត្តម ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី ប្រធានអង្គភាពអ្នកនាំពាក្យរាជរដ្ឋាភិបាលបានថ្លែងថា មានបញ្ហាធំៗមហិមាប្រៀបដូចជាព្យុះព្យោមារដែលបោកបក់ព្រមៗគ្នា និងយ៉ាងពេញទំហឹងមកលើរាជរដ្ឋាភិបាលនីតិកាលទី៧ នៃរដ្ឋសភា ដែលទើបតែចូលកាន់តំណែងថ្មីៗ។ វាប្រៀបដូចជាវិញ្ញាសាដ៏តឹងតែងបំផុតដែលចូលមកសាកល្បងសមត្ថភាពដឹកនាំ ចាត់ចែង និងដោះស្រាយរបស់ថ្នាក់ដឹកនាំវ័យក្មេងដែលជាអ្នកបន្តវេនរបស់គណបក្សប្រជាជនកម្ពុជា។

ក្នុងវេទិកាសារព័ត៌មានលើកទី៨ របស់អង្គភាពអ្នកនាំពាក្យរាជរដ្ឋាភិបាល កាលពីរសៀលថ្ងៃទី០១ ខែកក្កដា ឆ្នាំ២០២៦ នៅទីស្តីការគណៈរដ្ឋមន្ត្រី  ឯកឧត្តម ប៉ែន បូណា  ឱ្យដឹងថា បញ្ហាធំៗមហិមាប្រៀបដូចជាព្យុះព្យោមារដែលបោកបក់ព្រមៗគ្នា និងយ៉ាងពេញទំហឹងមកលើរាជរដ្ឋាភិបាលនីតិកាលទី៧ រួមមាន៖ ទី១.កម្ពុជាទទួលរងសង្គ្រាមឈ្លានពានយ៉ាងអាក្រក់ពីប្រទេសថៃ ដែលបង្កឱ្យមានជនភៀសសឹកជាង៦៤ម៉ឺននាក់ ពលករពីប្រទេសថៃសម្រុកមកប្រទេសវិញយ៉ាងគំហុក និងយ៉ាងច្រើនក្នុងពេលតែមួយ ហើយសង្គ្រាមនេះក៏បានបង្កការខូចខាតហេដ្ឋរចនាសម្ព័ន្ធស៊ីវិលជាច្រើន។ ទី២.សង្គ្រាមនៅមជ្ឈឹមបូព៌ាដែលបង្កឱ្យប្រេង និងឧស្ម័នឡើងថ្លៃខ្ពស់....ប្រេងជាទំនិញចាំបាច់ណាស់សម្រាប់ប្រជាពលរដ្ឋ បើប្រេងហក់ឡើងខ្ពស់វាប៉ះពាល់ខ្លាំងណាស់។ ទី៣.ការឆបោកតាមប្រព័ន្ធបច្ចេកវិទ្យា(ស្កេមអនឡាញ) ជាបញ្ហាធ្ងន់ធ្ងរ និងស្មុគស្មាញ ពិបាកដោះស្រាយ ពីព្រោះវាជាឧក្រិដ្ឋកម្មឆ្លងដែន និងប្រើប្រាស់បច្ចេកវិទ្យាទំនើប  ហើយកម្ពុជាបានក្លាយជាប្រទេសរងគ្រោះមួយក្នុងចំណោមប្រទេសជាច្រើនក្នុងតំបន់។

ឯកឧត្តម ប៉ែន បូណា បានអះអាងថា ទោះជារងការបោកបក់ពីបញ្ហាធំៗ និងព្រមៗគ្នាបែបនេះក៏ដោយ ក៏កម្ពុជានៅតែរក្សាបាន៖ ទី១.សុខសន្តិភាពដែលជាមូលដ្ឋានគ្រឹះនៃការអភិវឌ្ឍ និងសេចក្តីសុខរបស់ប្រជាជននៅតែត្រូវបានថែរក្សា។ ពិតណាស់ សង្គ្រាមឈ្លានបានដែលយើងមិនបានតាំងចិត្ត និងដែលយើងមិនចង់ឃើញទាល់តែសោះនោះ បានកើតឡើងនៅតាមជាយដែនថៃពីរលើក(២៤-២៨ កក្កដា បន្ទាប់មក ៧-២៧ ធ្នូ ២០២៥) ដែលទាមទារឱ្យរាជរដ្ឋាភិបាលត្រូវប្រើសិទ្ធិការពារខ្លួន។ ទោះយ៉ាងណា ថ្នាក់ដឹកនាំរបស់យើងដែលតែងតែតម្កល់តម្លៃសន្តិភាពជាធំ បានប្រែក្លាយសង្គ្រាមប្រដាប់អាវុធឱ្យទៅជាដំណោះស្រាយតាមការទូត និងផ្លូវច្បាប់វិញយ៉ាងឆាប់រហ័សក្រោមការជួយជ្រោមជ្រែងពីបណ្តាប្រទេសជាមិត្តដែលស្នេហាសន្តិភាពដូចគ្នា ជាពិសេសសហរដ្ឋអាម៉េរិក សាធារណរដ្ឋប្រជាមានិតចិន និងអាស៊ាន។ បទឈប់បាញ់ក៏ត្រូវបានរកឃើញពីរលើក និងបន្តរហូតមកទល់បច្ចុប្បន្ន។ នេះគឺជាសក្ខីភាពនៃការផ្តល់តម្លៃដល់សន្តិភាព និងដល់អាយុជីវិតមនុស្សដែលរាជរដ្ឋាភិបាលតែងតែតម្កល់ខ្ពស់ជានិច្ច។ ទី២. ស្ថានភាពម៉ាក្រូសេដ្ឋកិច្ចមានលំនឹងល្អ៖ ជាក់ស្តែងសេដ្ឋកិច្ចកម្ពុជាឆ្នាំ២០២៦ ត្រូវបានប៉ាន់ប្រមាណថា នឹងសម្រេចបានកំណើន ៤,២%, សន្តិសុខស្បៀងមានភាពរឹងមាំ ពាណិជ្ជកម្មអន្តរជាតិ ជាពិសេសការនាំចេញមានកំណើនគួរឱ្យកត់សម្គាល់ ខណៈដែលចំណូលសារពើពន្ធក៏មានកំណើន។ ពិតណាស់នេះជាពេលវេលាដែលគ្រប់គ្នានិយាយថា «សេដ្ឋកិច្ចធ្លាក់» មិនមែនតែកម្ពុជាទេ តែជាស្ថានភាពធ្លាក់ចុះ និងមិនច្បាស់លាស់នៃសេដ្ឋកិច្ចសាកល។ បងប្អូនយើងអ្នករកទទួលទានសុទ្ធតែបានជួបប្រទះគ្រប់គ្នា។ ប៉ុន្តែកម្ពុជានៅតែរកក្សាបានស្ថិរភាពម៉ាក្រូសេដ្ឋកិច្ចដែលមានលំនឹងល្អ ដែលជាជន្ទល់រឹងមាំនៃលំនឹងជីវភាពប្រជាពលរដ្ឋ។ ទី៣.ស្ថិរភាពសង្គម-នយោបាយ ក៏យើងនៅថែរក្សាបានល្អ៖ ឥតមានភាពវឹកវរ ចលាចលសង្គម ឬចលាចលនយោបាយអ្វីកើតឡើងក្នុងប្រទេសឡើយ។ ទី៤.កាលពីអំឡុងខែមេសា ឆ្នាំ ២០២៦ថ្មីៗនេះ មន្ត្រីអង្គការសហប្រជាជាតិទទួលបន្ទុកប្រទេសដែលមានការអភិវឌ្ឍតិចតួច (LDC) បានអញ្ជើញមកទស្សនកិច្ចនៅកម្ពុជា ហើយបានបញ្ជាក់ប្រាប់សម្តេចធិបតីថា ក្រោយការវាតម្លៃពីរលើក កម្ពុជានៅតែរក្សាបាននូវលក្ខណៈសម្បត្តិជាប្រទេសដែលអាចចាកចេញពីបណ្តាប្រទេស ដែលមានការអភិវឌ្ឍតិចតួច ( LDC) នៅឆ្នាំ២០២៩ខាងមុខដដែល។ 

ដូច្នេះ តាមរយៈសូចនាករទាំងអស់នេះ យើងអាចទាញសេចក្តីសន្និដ្ឋានបានថា រាជរដ្ឋាភិបាលនីតិកាលទី៧នៃរដ្ឋសភា មានសុខភាពល្អ ហើយបាន និងកំពុងបោះជំហានទៅមុខជានិច្ច ប្រកបដោយភាពស្វាហាប់ទោះបីជារាល់ជំហានទៅមុខត្រូវឆ្លងកាត់ឧបសគ្គធំៗយ៉ាងណាក៏ដោយ៕

ដោយ៖  ចាន់សុភឿន