AKP កំពង់ចាម ថ្ងៃទី២៦ ខែមិថុនា ឆ្នាំ២០២៦ --ដោយអនុវត្តន៍តាមផែនការពហុវិស័យ និងផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី១១ អគ្គលេខាធិការដ្ឋាន នៃអាជ្ញាធរជាតិប្រយុទ្ឋប្រឆាំងគ្រឿងញៀន​ នៅរសៀលថ្ងៃទី២៥ ខែមិថុនា ឆ្នាំ២០២៦ បានសហការជាមួយក្រសួងទេសចរណ៍ មន្ទីរទេសចរណ៍ខេត្តកំពង់ចាម ដើម្បីចូលរួមចុះផ្សព្វផ្សាយអប់រំពីគ្រោះថ្នាក់នៃគ្រឿងញៀនដល់ប្រតិបត្តិករ និងបុគ្គលិកបម្រើការនៅតាមមូលដ្ឋានអាជីវកម្មសេវាកម្មទេសចរណ៍ ក្នុងក្រុងកំពង់ចាម ខេត្តកំពង់ចាម បានចំនួន២២ទីតាំង គ្របដណ្តប់ចំនួនមនុស្ស ៣៤៥នាក់។

លោក ស៊ាន សុគន្ធ ប្រធានមន្ទីរទេសចរណ៍ខេត្តកំពង់ចាមបានបង្ហាញពីសភាពការណ៍ទេសចរណ៍នៅក្នុងខេត្តក៏ដូចជាកិច្ចខិតខំប្រឹងប្រែងលើកកម្ពស់ប្រសិទ្ធភាពការងារប្រយុទ្ធប្រឆាំងគ្រឿងញៀនដើម្បីធានាសុវត្ថិភាព និងទាក់ទាញអ្នកទេសចរណ៍ ឱ្យមកលេងខេត្តកំពង់ចាម តាមដងទន្លេមេគង្គមួយនេះ។ លោកប្រធានមន្ទីរបានបន្ដ​ថា មន្ទីរទេសចរណ៍ខេត្ដ នឹងបន្តចូលរួមអនុវត្តន៍នៅរាល់គោលនយោបាយដែលបានដាក់ចេញដោយក្រសួងទេសចរណ៍ ដើម្បីទាក់ទាញទេសចរណ៍នៅក្នុងរដូវកាលបៃតងនេះ ។

ក្នុងឱកាសនោះលោក ឡោ សុវិជ្ជា អគ្គនាយករងអភិវឌ្ឍន៍ទេសចរណ៍ និងសហប្រតិបត្តិការអន្តរជាតិតំណាងក្រុមការងារប្រយុទ្ធប្រឆាំងគ្រឿងញៀន ក្រសួងទេសចរណ៍ បានផ្សព្វផ្សាយផែនការលេខ ០១ ផក ចុះថ្ងៃទី១៣ ខែឆ្នាំកុម្ភ: ២០២៦ ស្តីពីផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់ របស់រាជរដ្ឋាភិបាលលើកទី១១។

ជាមួយគ្នានេះ ឯកឧត្ដម ឧត្តមសេនីយ៍ឯក លឹម តុងហួត ប្រធាននាយកដ្ឋានផ្សព្វផ្សាយ អប់រំ និងទំនាក់ទំនងសាធារណៈ  នៃអគ្គលេខាធិកាដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន បានលើកឡើងនូវប្រសាសន៍ថ្លែងអំណរគុណ និងកោតសសើររបស់ឯកឧត្តមសន្តិបណ្ឌិត នេត សាវឿន ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀនជូនដល់វិស័យទេសចរណ៍ ដែលបានចូលរួមយ៉ាងសកម្មក្នុងការងារប្រយុទ្ធប្រឆាំងគ្រឿងញៀន។ ឯកឧត្ដម ឧត្តមសេនីយ៍ឯក ការចូលរួមផ្សព្វផ្សាយអប់រំក្នុងគោលបំណងពេលនេះ គឺដើម្បីត្រួតពិនិត្យការចូលរួមរបស់វិស័យឯកជន ជួយបង្ការ ទប់ស្កាត់ការរីករាលបញ្ហាគ្រឿងញៀន និងផ្តល់យុទ្ធសាស្រ្តបន្ថែមទៀត។

ជាមួយគ្នានេះ ឯកឧត្ដម ឧត្តមសេនីយ៍ឯក លឹម តុងហួត បានថ្លែងបញ្ជាក់របស់ម្ចាស់ទីតាំងអាជីវកម្មសេវាកម្មទេសចរណ៍ចំពោះកិច្ចសហការ និងបង្ហាញពីអារម្មណ៍រីករាយសាទរដល់ក្រុមការងារ ដែលបានយកចិត្តទុកដាក់ដល់ពួកគាត់ បង្កើនការយល់ដឹងបន្ថែមទៀតតាមរយ:ការផ្តល់នូវខិតបណ្ណ សៀវភៅច្បាប់ស្តីពីការត្រួតពិនិត្យគ្រឿងញៀន ស្ទីកឃ័រណែនាំឱ្យទៅទទួលសេវាព្យាបាលដោយផ្អែកលើសហគមន៍ នៅមូលដ្ឋានសុខាភិបាល និងបំផុសការប្រើប្រាស់ App NoDrug ។

សូមបញ្ជាក់ថា គិតត្រឹមឆ្នាំ២០២៥ កម្ពុជា បានសម្រេចនូវសមិទ្ធផលលេចធ្លោជាច្រើនក្នុងនោះបានចុះអប់រំទីតាំងអាជីវកម្មនៅតាមសណ្ឋាគារ ផ្ទះសំណាក់ ផ្ទះជួល បារ ខេធីវី និងក្លឹប បានចំនួន ១៤ ១៩៤លើក បិទអាជីវកម្មបានចំនួន១២ទីតាំង និងឆ្មក់ធ្វើតេស្តអ្នកសង្ស័យបានចំនួន ១ ១៦៣ លើក ស្មើនឹង ១៣ ៧៩៦នាក់ មានវិជ្ជមានចំនួន ១ ៥១០នាក់ ក្នុងនោះ បានបញ្ជូនទៅតុលាការចំនួន ១ ៤៣១នាក់ និងធ្វើសមាហរណកម្មបានចំនួន ១០ ៦៤០នាក់៕

ដោយ៖ រិទ្ធី, ប្រភព៖ អាជ្ញាធរជាតិប្រយុទ្ធប្រឆាំងគ្រឿងញៀន