AKP បន្ទាយមានជ័យ ថ្ងៃទី១៨ ខែឧសភា ឆ្នាំ២០២៦-- ការយកចិត្តទុកដាក់លើវិស័យអប់រំសម្រាប់កុមារ និងយុវជននៅតាមតំបន់ដាច់ស្រយាល ជាពិសេសកូនចៅរបស់បងប្អូនពលរដ្ឋភៀសសឹក បាននិងកំពុងក្លាយជាអាទិភាពចម្បងរបស់រាជរដ្ឋា ភិបាលកម្ពុជា។

ស្មារតីនេះត្រូវបានស្តែងឡើងយ៉ាងច្បាស់ តាមរយៈសកម្មភាពចុះជួយដោយផ្ទាល់ពីសំណាក់ថ្នាក់ដឹកនាំក្រសួងអប់រំ យុវជន និងកីឡា ទៅដល់សាលារៀននៅតាមខ្សែបន្ទាត់ព្រំដែន។

ជាក់ស្តែង នៅថ្ងៃទី១៨ ខែឧសភា ឆ្នាំ ២០២៦ នេះ ក្រុមការងារនាយកដ្ឋានមធ្យមសិក្សាចំណេះទូទៅ ដឹកនាំដោយ លោក ជា វុធ ប្រធាននាយកដ្ឋាននិងសហការី បានធ្វើដំណើរចុះទៅដល់សាលាអនុវិទ្យាល័យបន្ទាយមានឫទ្ធិ ស្ថិតក្នុងភូមិស្លក្រាម ឃុំស្លក្រាម ស្រុកស្វាយចេក ខេត្តបន្ទាយមានជ័យ ដើម្បីនាំយកសម្ភារៈសិក្សា និងឧបករណ៍គាំទ្រការបង្រៀនជាច្រើនទៅឧបត្ថម្ភដល់ទីនោះ។

ស្បៀងចំណេះដឹង និងសម្ភារៈគាំទ្រដែលបានប្រគល់ជូន រួមមានសៀវភៅសិក្សាគោល (ថ្នាក់ទី៧ ដល់ទី៩ គ្រប់មុខវិជ្ជា ចំនួន ៣៧២ ក្បាល។

សៀវភៅ «ទៅមុខរបស់ខ្ញុំ ជម្រើសអ្នកអនាគតអ្នក»ចំនួន ៥១០ ក្បាល (ដើម្បីតម្រង់ទិសជីវិត និងការសិក្សា)ឧបក រណ៍បំពងសំឡេង (សម្រាប់ការបង្រៀន)ចំនួន ៤ គ្រឿង សម្ភារៈឧបត្ថម្ភផ្សេងៗស្បែកជើង និងប៊ិចមួយចំនួនធំ។   

នៅក្នុងឱកាសជួបសំណេះសំណាលដ៏មានអត្ថន័យនោះ លោក ជា វុធ ប្រធាននាយកដ្ឋានមធ្យមសិក្សាចំណេះទូទៅបានលើកឡើង និងសង្កត់ធ្ងន់អំពីសារៈ សំខាន់នៃការអប់រំ ដោយលោកបានបង្ហាញពីការយកចិត្តទុកដាក់ដ៏ខ្ពង់ខ្ពស់របស់ប្រមុខរាជរដ្ឋាភិបាលកម្ពុជា ចំពោះអនាគតរបស់កូនចៅប្រជាពលរដ្ឋភៀសសឹក។ លោកបានបញ្ជាក់ថា ទោះបីស្ថិតក្នុងកាលៈទេសៈណាក៏ដោយ ក៏រាជរដ្ឋាភិ បាលមិនបោះបង់ ឬទុកនរណាម្នាក់ចោលដោយមិនបានរៀនសូត្រនោះឡើយ ពោលគឺត្រូវធានាឱ្យបាននូវសមធម៌ និងគុណភាពអប់រំនៅគ្រប់ទិសទី។

ក្រៅពីការផ្តល់សម្ភារៈ ប្រតិភូក្រសួងអប់រំក៏បានជួបជែកពិភាក្សាយ៉ាងស៊ីជម្រៅជាមួយ លោកនាយក លោកគ្រូ អ្នកគ្រូ និងសិស្សានុសិស្ស លើកម្មវិធីសិក្សា និងវិធីសាស្ត្របង្រៀននិងរៀន ដោយបានផ្តល់ការណែនាំ និងបណ្តាំផ្ញើគន្លឹះៗចំនួន ២ ធំៗ រួមមាន៖
១. ការបញ្ចប់កម្មវិធីសិក្សាទាន់ពេលវេលា ជំរុញឱ្យលោកគ្រូ-អ្នកគ្រូ បង្រៀនបែប «បញ្ញត្តិ» ដើម្បីឱ្យសិស្សងាយយល់ ចាប់បានខ្លឹមសារស្នូល និងមិនចំណាយពេលច្រើន។

២. ការអនុវត្តកម្មវិធីពន្លឿន ដើម្បីជួយយិតយោង និងបំពេញបន្ថែមដល់សិស្សានុសិស្សឱ្យទាន់កម្រិតស្តង់ដារចំណេះដឹង ធានាថាពួកគេមានសមត្ថភាពគ្រប់គ្រាន់ក្នុងការប្រកួតប្រជែងទៅថ្ងៃអនាគត។

    សកម្មភាពចុះជួយផ្ទាល់អមដោយការផ្តល់យុទ្ធសាស្ត្រគរុកោសល្យថ្មីៗនេះ មិនត្រឹមតែជាការបំពេញបន្ថែមនូវកង្វះខាតផ្នែកសម្ភារៈសិក្សាប៉ុណ្ណោះទេ ប៉ុន្តែវាក៏ជាការផ្តល់កម្លាំងចិត្ត និងក្តីសង្ឃឹមយ៉ាងធំធេងដល់បុគ្គលិកអប់រំ និងកុមារៗនៅតំបន់ព្រំដែន ខេត្តបន្ទាយមានជ័យ ក្នុងការកសាងអនាគតដ៏ភ្លឺស្វាងសម្រាប់ខ្លួនឯង និងសង្គមជាតិ៕

ដោយ ៖ឈុនសារ៉ាត