AKP ភ្នំពេញ ថ្ងៃទី១៨ ខែឧសភា ឆ្នាំ២០២៦--ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍បានគូសបញ្ជាក់ថា ក្បួនរថយន្តបើករថយន្តឆ្លងកាត់ព្រំដែន (Caravan Tour) មេគង្គ-ឡាងឆាង អបអរសាទរ “ឆ្នាំទេសចរណ៍ កម្ពុជា-ចិន គឺជាព្រឹត្តិការណ៍មួយក្នុងចំណោមព្រឹត្តិការណ៍ទាំង១២ ក្នុងក្របខ័ណ្ឌ «ឆ្នាំទេសចរណ៍ កម្ពុជា-ចិន» ដែលបានកំពុងក្លាយជាចលករយ៉ាង​សំខាន់ ក្នុងការបង្កើននូវទំនាក់ទំនង និងការតភ្ជាប់វិស័យទេសចរណ៍ ក៏ដូចជា ទំនាក់ទំនង និងបេះដូង រវាងប្រជាជន នៃ ប្រជាជាតិទាំងពីរ។ ការលើកឡើងរបស់ឯកឧត្ដមរដ្ឋមន្រ្ដីបែបនេះ ក្នុងឱកាសអញ្ជើញជាអធិបតីពិធីជូនដំណើរក្បួនរថយន្ត Caravan ដែលចេញដំណើរពីទីស្តីការក្រសួងទេសចរណ៍ រាជធានីភ្នំពេញ នាព្រឹកថ្ងៃទី១៨ ខែឧសភា ឆ្នាំ២០២៦ ឆ្ពោះទៅកាន់ច្រកព្រំដែនអន្តរជាតិត្រពាំងគ្រៀល នៃខេត្តស្ទឹងត្រែង។
ឯកឧត្តម ហួត ហាក់ បានមានប្រសាសន៍ថា ព្រឹត្ដិការណ៍នេះ បានរួមចំណែកសំខាន់ក្នុងការសម្រេចឱ្យបានការកសាង សហគមន៍ ជោគវាសនារួមគ្នារវាងកម្ពុជា-ចិន ឱ្យមានអត្ថន័យច្បាស់លាស់ និងជាប្រយោជន៍សម្រាប់ប្រជាជនទាំងពីរ និងប្រទេសទាំងពីរ។

ឯកឧត្តមរដ្ឋមន្រ្ដីបានថ្លែងបញ្ជាក់ថា ព្រឹត្តិការណ៍ខាងលើនេះ មានរយៈពេល ២៣ ថ្ងៃ ចាប់ពីថ្ងៃទី១៨ ខែឧសភា រហូតដល់ថ្ងៃទី៩ ខែមិថុនា ឆ្នាំ២០២៦។ ក្បួនរថយន្តនឹងចេញដំណើរពីរាជធានីភ្នំពេញនាព្រឹកនេះពីទីស្តីការក្រសួងទេសចរណ៍ ឆ្ពោះទៅ កាន់ច្រកទ្វារព្រំដែនអន្តរជាតិត្រពាំងគ្រៀល ខេត្តស្ទឹងត្រែង ឆ្លងកាត់តាមសាធារណរដ្ឋប្រជាធិបតេយ្យប្រជាមានិតឡាវ និងបន្តដំណើរទៅកាន់ខេត្តយូណាន (Yunnan Province) នៃសាធារណរដ្ឋប្រជាមានិតចិន ចាប់ពីថ្ងៃទី១៨ ខែឧសភា រហូតដល់ថ្ងៃទី៣០ ខែឧសភា ឆ្នាំ២០២៦។ បន្ទាប់មកនៅថ្ងៃទី៣១ ខែឧសភា ឆ្នាំ២០២៦ ក្បួនរថយន្ត ចេញដំណើរពីខេត្តយូណាន (Yunnan Province) នៃសាធារណរដ្ឋប្រជាមានិតចិន មកដល់ខេត្តសៀមរាប នៃព្រះ រាជាណាចក្រកម្ពុជាវិញ នៅថ្ងៃទី៩ ខែមិថុនា ឆ្នាំ២០២៦។

ឯកឧត្តម រដ្ឋមន្រ្ដីបានបន្ថែមថា (Caravan Tour) មេគង្គ-ឡាងឆាង អបអរសាទរ “ឆ្នាំទេសចរណ៍ កម្ពុជា-ចិន នេះ គឺជាការបង្ហាញអំពីទំនាក់ទំនងកិច្ចសហប្រតិបត្តិការណ៍កម្ពុជា-ចិន ដែលឈរលើស្មារតីមិត្តភាព កិច្ចសហប្រតិបត្តិការគ្រប់ជ្រុងជ្រោយ ហើយកាន់តែស៊ីជម្រៅជាងមុនពីមួយថ្ងៃទៅមួយថ្ងៃ។

ជាមួយគ្នានេះ លោកជំទាវ ឆាយ ស៊ីវលីន ប្រធានសមាគមទេសចរណ៍កម្ពុជា (CATA) បានលើកឡើងថា Caravan Tour ដែលរថយន្តឆ្លងកាត់ព្រំដែន ៣ ប្រទេស រួមមាន កម្ពុជា ឡាវ ចិន រួចមកបញ្ចប់នៅទឹកដីសៀមរាបអង្គរ ដែលមានរយៈពេល២៣នេះ មិនមែនជាព្រឹត្តិការណ៍ធម្មតានោះទេ ពោលជាបេសកកម្មវប្បធម៌ និងទេសចរណ៍ដ៏ធំមួយដែលបានឆ្លុះបញ្ចាំងអំពីស្មារតីសាមគ្គីភាព មិត្តភាព និងកិច្ចសហប្រតិបត្តិការណ៍ក្នុងតំបន់។

លោកជំទាវបានបញ្ជាក់ទៀតថា ការជ្រើសរើសផ្លូវឆ្លងកាត់ប្រទេសឡាវ និងផ្លូវខេត្តយូណាន ប្រទេសចិន គឺជាការតភ្ជាប់ខ្សែក្រវ៉ាត់ទេសចរណ៍តាមផ្លូវគោកនៃបណ្តាប្រទេសរស់នៅតាមបណ្តាដងទន្លេមេគង្គ-ឡាងឆាង ដែលជាតំបន់មានសក្កានុពលសេដ្ឋកិច្ច និងទេសចរណ៍យ៉ាងខ្លាំងក្លា។ លោកជំទាវប្រធានសមាគមក៏បានពន្យល់ទៀតថា ដំណើរទស្សនកិច្ចរួមគ្នា កម្ពុជា និងចិន នេះ បានធ្វើឡើងក្នុងគោលបំណងគាំទ្រការអនុវត្តយុទ្ធនាការគាំទ្រឆ្នាំទេស​ចរណ៍កម្ពុជា និងចិន សម្រាប់ឆ្នាំ២០២៦ ដែលបង្ហាញពីឆន្ទៈរឹងមាំ លើកកម្ពស់ការផ្លាស់ប្តូរវប្បធម៌ និងកិច្ចសហប្រតិបត្តិការណ៍ទេសចណ៍ និងការតភ្ជាប់កិច្ចសហប្រតិបត្តិការណ៍សេដ្ឋកិច្ចរវាងកម្ពុជា ឡាវ និងចិន ដែលធ្វើដំណើរតាមក្បួនរថយន្ត ដើម្បីចូលរួមចំណែកផ្សព្វផ្សាយសក្កានុពលទេសចរណ៍កម្ពុជា ជាពិសេស ផ្សព្វផ្សាយយុទ្ធនាការទស្សនាកម្ពុជាសម្រាប់រដូវកាលបៃតងក្នុងឆ្នាំ២០២៦ ដែលក្រសួងទេសចរណ៍បានប្រកាសដាក់ចេញកាលពីថ្ងៃទី២ ខែឧសភា ឆ្នាំ២០២៦ គាំទ្រដោយប្រមុខរាជរដ្ឋាភិបាលកម្ពុជា។

សូមជម្រាបជូនថា បេសកកម្មបើករថយន្តឆ្លងកាត់ព្រំដែន (Caravan Tour) មេគង្គ-ឡាងឆាង អបអរសាទរ “ឆ្នាំទេសចរណ៍ កម្ពុជា-ចិន មានរយៈពេល២៣ថ្ងៃ គិតចាប់ពីថ្ងៃទី១៨ ខែឧសភា រហូតដល់ថ្ងៃទី៩ ខែមិថុនា ឆ្នាំ២០២៦ ក្នុងនោះ ក្រុមរថយន្តកម្ពុជាមាន៣០ គ្រឿង ដោយឆ្លងកាត់ប្រទេសឡាវ និងខេត្តយូណាន សាធារណរដ្ឋមប្រមានិតចិន។
យោងតាមសេចក្ដីជូនដំណឹងរបស់ក្រសួងទេសចរណ៍បានឱ្យដឹងថា «ព្រឹត្តិការណ៍ផ្សព្វផ្សាយ Caravan Tour កម្ពុជា-ចិន» នៃ ដំណើរទស្សនកិច្ចតាមក្បួនរថយន្ត “Mekong-Langcang River FAM-Trip Discovery” ដោយចេញដំណើរពីទីស្តីការក្រសួងទេសចរណ៍ ឆ្ពោះទៅកាន់ខេត្តយូណាន ប្រទេសចិន នៅព្រឹកថ្ងៃទី១៨ ខែឧសភា ឆ្នាំ២០២៦ និងត្រឡប់មករាជធានីភ្នំពេញវិញនៅថ្ងៃទី៩ ខែមិថុនា ឆ្នាំ២០២៦។

ក្នុងក្របខ័ណ្ឌនៃការអនុវត្តយុទ្ធនាការ «ឆ្នាំទេសចរណ៍ កម្ពុជា-ចិន» សម្រាប់ឆ្នាំ២០២៦ ក្រសួងទេសចរណ៍ សហការជាមួយស្ថានទូតនៃសាធារណរដ្ឋប្រជាមានិតចិនប្រចាំនៅកម្ពុជា និងសមាគមទេសចរណ៍កម្ពុជា នឹងរៀបចំ «ព្រឹត្តិការណ៍ផ្សព្វផ្សាយ Caravan Tour កម្ពុជា-ចិន» នៃដំណើរទស្សនកិច្ចតាមក្បួនរថយន្ត "Mekong-Langcang River FAM-Trip Discovery” ចាប់ពីថ្ងៃទី១៨ ខែឧសភា ដល់ថ្ងៃទី៩ ខែមិថុនា ឆ្នាំ២០២៦។ ក្នុងដំណើរទស្សនកិច្ចនេះ ប្រតិភូអ្នកដំណើរតាមក្បួនរថយន្ត ដោយចេញដំណើរ ពីរាជធានីភ្នំពេញឆ្ពោះទៅកាន់ច្រកទ្វារអន្តរជាតិត្រពាំងគ្រៀល ខេត្តស្ទឹងត្រែង ឆ្លងកាត់ប្រទេសឡាវ និងបន្តដំណើរ ទៅកាន់ខេត្តយូណាន (Yunnan Province) ប្រទេសចិន។ ទន្ទឹមនេះ ក្បួនរថយន្ត Caravan ដែលនឹងចេញដំណើរពីទីស្តីការ ក្រសួងទេសចរណ៍ ឆ្ពោះទៅកាន់ច្រកទ្វារព្រំដែនអន្តរជាតិត្រពាំងគ្រៀល ខេត្តស្ទឹងត្រែង ឆ្លងកាត់ ប្រទេសឡាវ និងបន្តដំណើរទៅកាន់ខេត្តយូណាន (Yunnan Province) ប្រទេសចិន ចាប់ពី ថ្ងៃទី១៨ ដល់ថ្ងៃទី៣០ ខែឧសភា ឆ្នាំ២០២៦។ ក្បួនរថយន្ត នឹងចេញដំណើរពីខេត្តយូណាន (Yunnan Province) ប្រទេសចិន ឆ្លងកាត់ ប្រទេសឡាវ ឆ្ពោះមកកាន់ច្រកទ្វារព្រំដែនអន្តរជាតិត្រពាំងគ្រៀល ខេត្តស្ទឹងត្រែង និងបន្តដំណើរ មករាជធានីភ្នំពេញវិញ ចាប់ពីថ្ងៃទី៣១ ខែឧសភា ដល់ថ្ងៃទី៩ ខែមិថុនា ឆ្នាំ២០២៦៕

ដោយ៖ រិទ្ធី, រូបថត៖ យឹម​ សុវឌ្ឍនា