AKP ភ្នំពេញ ថ្ងៃទី១១ ខែឧសភា ឆ្នាំ២០២៦ -- ដំណាក់កាលទីពីរនៃកម្មវិធីប្រកួតប្រណាំងកង់ Giro d'Italia បានចាប់ផ្តើមនៅទីក្រុងបឺហ្កាស់ នៅវេលាម៉ោង ១១:៥០នាទីព្រឹក កាលពីថ្ងៃសៅរ៍ ដោយការចាប់ផ្តើមជាផ្លូវការត្រូវបានចូលរួមជាអធីបតីដោយអភិបាលក្រុងបឺហ្កាស់ លោក ឌីមីតា នីកូឡូវ (Dimitar Nikolov)។ លោកបានកោតសរសើរដល់ប្រជាជនក្នុងតំបន់ចំពោះការចាប់អារម្មណ៍យ៉ាងខ្លាំងដែលបានបង្ហាញ នៅពេលដែលនៅតាមដងផ្លូវក្នុងទីក្រុងពោរពេញទៅដោយអ្នកទស្សនាដែលចង់មើលអ្នកជិះកង់កំពូលៗមួយចំនួនរបស់ពិភពលោក។

ក្នុងអំឡុងពេលដំណាក់កាលទីពីរនៃកម្មវិធីប្រណាំងទាំងបីថ្ងៃនៅលើទឹកដីប៊ុលហ្គារីនេះ កីឡាករជិះកង់ទាំងអស់នឹងត្រូវធ្វើដំណើរចម្ងាយ២២១គីឡូម៉ែត្រទៅកាន់តំបន់វេលីកូ តាណូវ៉ូ (Veliko Tarnovo) ដែលធ្វើឱ្យវាក្លាយជាដំណាក់កាលវែងបំផុតលំដាប់ទីពីរនៅក្នុងការប្រកួត Giro d'Italia លើកទី១០៩។

ដូចដែលបានកំណត់ជាប្រពៃណី អ្នកកាន់អាវបានចាប់ផ្តើមពីជួរមុខដោយអ្នកដឹកនាំចំណាត់ថ្នាក់ទូទៅ កីឡាករ ផូល ម៉ាកនីញ៉ែរ (Paul Magnier) មកពី Soudal Quick-Step និងអ្នកដឹកនាំចំណាត់ថ្នាក់ភ្នំ កីឡាករ ឌីហ្គោ សឺវីលឡា (Diego Sevilla) មកពី Polti VisitMalta។ដោយសារតែលោក ម៉ាកនីញ៉ែរ កាន់អាវបីក្នុងចំណោមអាវទាំងបួន ដោយអាវស៊ីក្លាមែនសម្រាប់ចំណាត់ថ្នាក់ពិន្ទុនាំមុខគេ និងអាវពណ៌សសម្រាប់អ្នកជិះវ័យក្មេងល្អបំផុត ត្រូវបានពាក់រៀងៗខ្លួនដោយកីឡាករ តូប៊ីអាស់ លុនដ៍ អេនដ្រេសិន (Tobias Lund Andresen) មកពីក្រុម Decathlon AG2R La Mondiale របស់ប្រទេសដាណឺម៉ាក និងកីឡាករ អេនតូនីញ៉ូ ម៉ូហ្កាដូ(Antonio Morgado) មកពីក្រុម UAE Team Emirates របស់ប្រទេសព័រទុយហ្គាល់។

ទោះជាយ៉ាងណាក៏ដោយ កីឡាករជិះកង់អ៊ីតាលី លោក ម៉ាតតេអូ ម៉ូស្សេតទី (Matteo Moschetti) មកពីក្រុម Pinarello មិនអាចចូលរួមការប្រកួតបានទេ បន្ទាប់ពីរងរបួសក្បាលក្នុងគ្រោះថ្នាក់មួយក្នុងអំឡុងពេលប្រកួតចុងក្រោយនៃដំណាក់កាលកាលពីថ្ងៃសុក្រពីទីក្រុងណេសសេបា ទៅទីក្រុងបឺហ្កាស់។ លោកមិនបានទទួលការអនុញ្ញាតពីគ្រូពេទ្យដើម្បីបន្តការប្រកួតទេ។ ជាលទ្ធផល កីឡាករជិះកង់ចំនួន ១៨៣នាក់បានចាប់ផ្តើមការប្រកួតក្នុងដំណាក់កាលកាលពីថ្ងៃសៅរ៍៕

ដោយ៖ យា ចិន្ដាខន្ដី (ប្រភព៖ BTA)