AKP ភ្នំពេញ ថ្ងៃទី២៤ ខែមីនា ឆ្នាំ២០២៦ -- លោក ហ្វាទី ប៊ីរ៉ុល (Fatih Birol) ប្រធានទីភ្នាក់ងារថាមពលអន្តរជាតិ (IEA) បាននិយាយកាលពីថ្ងៃចន្ទថា ពិភពលោកប្រឈមនឹងហានិភ័យនៃវិបត្តិថាមពលធ្ងន់ធ្ងរបំផុតក្នុងរយៈពេលជាច្រើនទសវត្សរ៍កន្លងមកនេះក្នុងចំណោមជម្លោះនៅមជ្ឈិមបូព៌ា ដោយទីផ្សារបានបាត់បង់ប្រេងចំនួន ១១លានបារ៉ែលក្នុងមួយថ្ងៃ។

លោក ប៊ីរ៉ុល បានថ្លែងនៅក្នុងក្លឹបសារព័ត៌មានជាតិអូស្ត្រាលីថា «យើងជាច្រើនចងចាំពីវិបត្តិប្រេងពីរលើកជាប់ៗគ្នាក្នុងទសវត្សរ៍ឆ្នាំ១៩៧០ ...ហើយនៅពេលនោះ ក្នុងវិបត្តិនីមួយៗ ពិភពលោកបានបាត់បង់ប្រហែល ៥លានបារ៉ែលក្នុងមួយថ្ងៃ។ ទាំងពីរលើករួមគ្នា ១០លានបារ៉ែលក្នុងមួយថ្ងៃ ... ហើយសព្វថ្ងៃនេះ គិតត្រឹមថ្ងៃនេះ យើងបានបាត់បង់ ១១លានបារ៉ែលក្នុងមួយថ្ងៃ»។

ប្រធាន IEA បាននិយាយថា ស្ថានភាពនេះធ្ងន់ធ្ងរណាស់ ហើយលោកបានកត់សម្គាល់ថា ទីភ្នាក់ងារនេះកំពុងពិគ្រោះយោបល់ជាមួយរដ្ឋាភិបាលនៅអាស៊ី និងអឺរ៉ុប ស្តីពីលទ្ធភាពនៃការបញ្ចេញប្រេងបន្ថែមពីទុនបម្រុងយុទ្ធសាស្ត្រ។

នៅថ្ងៃទី១១ ខែមីនា ប្រទេសជាសមាជិកទីភ្នាក់ងារ IEA បានព្រមព្រៀងបញ្ចេញប្រេងចំនួន ៤០០លានបារ៉ែលពីទុនបម្រុងយុទ្ធសាស្ត្រ ដើម្បីទប់ស្កាត់ការកើនឡើងតម្លៃ។

លោក ប៊ីរ៉ុល បាននិយាយថា ការសម្រេចចិត្តទៅលើអន្តរាគមន៍ថ្មីនេះនឹងផ្អែកលើលក្ខខណ្ឌទីផ្សារ ហើយមិនត្រូវបានចងភ្ជាប់ទៅនឹងកម្រិតតម្លៃជាក់លាក់ណាមួយឡើយ។ លោក​បាននិយាយ​ថា កត្តា​សំខាន់​មួយ​ក្នុង​ការ​ធ្វើឱ្យ​ស្ថានការណ៍​មាន​ស្ថិរភាព ​គឺ​ធានាឱ្យ​មាន​ចរាចរណ៍​ដោយ​គ្មាន​ការ​រំខាន​តាម​រយៈ​ច្រក​សមុទ្រហ័រមុស ដែលជា​ផ្នែក​សំខាន់​នៃ​ការ​ផ្គត់ផ្គង់​ប្រេង​របស់​ពិភពលោក​ឆ្លងកាត់។

យោងតាមការព្យាករណ៍របស់ទីភ្នាក់ងារ IEA បានឱ្យដឹងថា តម្រូវការប្រេងសកលលោកនៅឆ្នាំ២០២៦ នឹងឡើងដល់ ១០៤,៧៧លានបារ៉ែលក្នុងមួយថ្ងៃ ខណៈដែលអង្គការ OPEC រំពឹងថាការប្រើប្រាស់នឹងឡើងដល់១០៦,៥៣លានបារ៉ែលក្នុងមួយថ្ងៃ៕
ដោយ៖ យា ចិន្ដាខន្ដី (ប្រភព៖ ស្ពុតនីក)