AKP ភ្នំពេញ ថ្ងៃទី២៤ ខែមីនា ឆ្នាំ២០២៦ -- ទីភ្នាក់ងារថាមពលអន្តរជាតិ(IEA) បាននិយាយថា ទ្រព្យសម្បត្តិថាមពលជាង ៤០កន្លែងនៅទូទាំងប្រទេសចំនួនប្រាំបួននៅមជ្ឈិមបូព៌ា ត្រូវបានរងការខូចខាតយ៉ាងធ្ងន់ធ្ងរ ឬធ្ងន់ធ្ងរខ្លាំង ក្នុងអំឡុងពេលជម្លោះដែលកំពុងបន្ត។ នេះបើយោងតាមរបាយការណ៍របស់ប្រព័ន្ធផ្សព្វផ្សាយកាលពីពេលថ្មីៗនេះ។

លោក ហ្វាទី ប៊ីរ៉ុល (Fatih Birol) នាយកប្រតិបត្តិទីភ្នាក់ងារ IEA បាននិយាយថា ការខូចខាតនេះអាចអូសបន្លាយការរំខានដល់ខ្សែសង្វាក់ផ្គត់ផ្គង់សកលលោក សូម្បីតែបន្ទាប់ពីជម្លោះបានបញ្ចប់ហើយក៏ដោយ។

លោកបាននិយាយថា «វានឹងត្រូវការពេលវេលាខ្លះសម្រាប់វាលប្រេងរោងចក្រចម្រាញ់ប្រេង និងបំពង់បង្ហូរប្រេងដើម្បីដំណើរការឡើងវិញ»។

លោក ប៊ីរ៉ុល បាននិយាយថា ការប្រយុទ្ធគ្នាជាងបីសប្តាហ៍បានរំខានដល់ខ្សែសង្វាក់ផ្គត់ផ្គង់ថាមពលទាំងមូល និងស្ទើរតែបញ្ឈប់ការដឹកជញ្ជូនឆ្លងកាត់ច្រកសមុទ្រហ័រមុស។

លោកបាននិយាយថា ផលប៉ះពាល់នៃការរំខានទាំងនេះ គឺអាចប្រៀបធៀបទៅនឹងវិបត្តិប្រេងធំៗពីរក្នុងទសវត្សរ៍ឆ្នាំ១៩៧០ និងវិបត្តិឧស្ម័នធម្មជាតិឆ្នាំ២០២២ ដែលវិបត្តិទាំងអស់ត្រូវបានដាក់បញ្ចូលគ្នានៅលើកនេះ។

លោកបានបន្ថែមថា «មិនត្រឹមតែប្រេង និងឧស្ម័នប៉ុណ្ណោះទេ ប៉ុន្តែសរសៃឈាមសំខាន់ៗមួយចំនួននៃសេដ្ឋកិច្ចពិភពលោក ក៏ដូចជាពាណិជ្ជកម្មរបស់ពួកគេទាំងអស់ត្រូវបានរំខាន»។

លោក ប៊ីរ៉ុល បានព្រមានថា អាស៊ីរងផលប៉ះពាល់ជាពិសេសដោយសារតែការពឹងផ្អែកលើការផ្គត់ផ្គង់ថាមពលក្នុងតំបន់។

លោក​បាននិយាយ​ថា ទីភ្នាក់ងារ IEA មាន​គម្រោង​បញ្ចេញ​ប្រេង​ចំនួន៤០០លាន​បារ៉ែល​ពី​ប្រេង​បម្រុង​បន្ទាន់​ដើម្បី​បន្ធូរបន្ថយ​ការ​ប៉ះទង្គិច​នៃ​ការ​ផ្គត់ផ្គង់ ដោយ​បានបន្ថែម​ថា ប្រេង​បម្រុង​បន្ថែម​អាច​នឹង​ត្រូវ​បាន​បញ្ចេញ​ប្រសិនបើ​ការ​រំខាន​នៅ​តែ​បន្ត។

លោក ប៊ីរ៉ុល បាន​សង្កត់ធ្ងន់​ថា ការ​បើក​ច្រក​សមុទ្រហ័រមុសឡើង​វិញ​នៅ​តែ​មាន​សារៈសំខាន់​ក្នុង​ការ​ស្តារ​លំហូរ​ថាមពល​ជាសកល។

ច្រក​សមុទ្រហ័រមុសត្រូវ​បាន​រំខាន​យ៉ាង​ខ្លាំង​ចាប់​តាំង​ពី​ដើម​ខែ​មីនាមក។ ប្រេង​ប្រហែល ២០លាន​បារ៉ែល​ជា​ធម្មតាដែល​ឆ្លងកាត់​វា​ជា​រៀងរាល់ថ្ងៃ ហើយ​ការ​រំខាន​របស់​វា​បាន​ជំរុញឱ្យ​ថ្លៃ​ដឹកជញ្ជូន​កើនឡើង និង​ជំរុញ​ឱ្យ​តម្លៃ​ប្រេង​សកល​លោកកើនឡើង​ខ្ពស់៕
ដោយ៖ យា ចិន្ដាខន្ដី (ប្រភព៖ AA-AKP)