AKP ភ្នំពេញ ថ្ងៃទី២៤ ខែមីនា ឆ្នាំ២០២៦ -- ប្រធានាធិបតីសហរដ្ឋអាមេរិកលោក ដូណាល់ ត្រាំ (Donald Trump) បាននិយាយកាលពីថ្ងៃចន្ទថាលោកបានបញ្ជាឱ្យពន្យារពេលការវាយប្រហារទាំងអស់រយៈពេល ៥ថ្ងៃទៅលើរោងចក្រថាមពល និងហេដ្ឋារចនាសម្ព័ន្ធថាមពលអ៊ីរ៉ង់ ដោយលោកបានលើកឡើងពីកិច្ចពិភាក្សាដ៏ល្អ និងមានផ្លែផ្កាខ្លាំងជាមួយទីក្រុងតេអេរ៉ង់ក្នុងរយៈពេលពីរថ្ងៃកន្លងមក។

លោក ត្រាំ បាននិយាយនៅលើវេទិកាប្រព័ន្ធផ្សព្វផ្សាយសង្គមរបស់លោកថា «ខ្ញុំមានសេចក្តីសោមនស្សរីករាយក្នុងការរាយការណ៍ថាសហរដ្ឋអាមេរិក និងប្រទេសអ៊ីរ៉ង់ ក្នុងរយៈពេលពីរថ្ងៃចុងក្រោយនេះ មានកិច្ចសន្ទនាដ៏ល្អ និងមានផ្លែផ្កាខ្លាំងទាក់ទងនឹងដំណោះស្រាយពេញលេញនៃអរិភាពរបស់យើងនៅមជ្ឈិមបូព៌ា»។

លោកបានបន្ថែមថា ដោយផ្អែកលើភាពស៊ីជម្រៅ លម្អិត និងប្រកបដោយការស្ថាបនាទាំងនេះ ការវាយប្រហារនឹងបន្តពេញមួយសប្តាហ៍លោកបានណែនាំក្រសួងការពារជាតិឱ្យពន្យារពេលការវាយប្រហារយោធាទាំងអស់ប្រឆាំងនឹងរោងចក្រថាមពល និងហេដ្ឋារចនាសម្ព័ន្ធថាមពលអ៊ីរ៉ង់រយៈពេលប្រាំថ្ងៃ។

លោកបានបន្ថែមថា ការផ្អាកនេះគឺអាស្រ័យលើភាពជោគជ័យនៃកិច្ចប្រជុំ និងកិច្ចពិភាក្សាដែលកំពុងបន្ត។

រឿងនេះកើតឡើងនៅពេលដែលការកើនឡើងក្នុងតំបន់បានបន្តផ្ទុះឡើងចាប់តាំងពីសហរដ្ឋអាមេរិក និងអ៊ីស្រាអែលបានបើកការវាយលុករួមគ្នាទៅលើអ៊ីរ៉ង់កាលពីថ្ងៃទី២៨ ខែកុម្ភៈ ដែលបានសម្លាប់មនុស្សជាង១.៣៤០នាក់ រួមទាំងមេដឹកនាំកំពូលអ៊ីរ៉ង់ លោក អាលី ខាមេណី (Ali Khamenei) ផងដែរ។

អ៊ីរ៉ង់បានសងសឹកដោយការវាយប្រហារដោយយន្តហោះគ្មានមនុស្សបើក និងមីស៊ីលដែលវាយប្រហារលើអ៊ីស្រាអែល រួមជាមួយប្រទេសហ្ស៊កដានី អ៊ីរ៉ាក់ និងបណ្តាប្រទេសនៅឈូងសមុទ្រដែលកាន់កាប់ទ្រព្យសម្បត្តិយោធាអាម៉េរិក ដែលបណ្តាលឱ្យមានអ្នកស្លាប់ រងរបួស និងខូចខាតដល់ហេដ្ឋារចនាសម្ព័ន្ធ ខណៈដែលវាក៏បានរំខានដល់ទីផ្សារ និងអាកាសចរណ៍សកលលោកទៀតផង៕
ដោយ៖ យា ចិន្ដាខន្ដី (ប្រភព៖ AA-AKP)