AKP ភ្នំពេញ ថ្ងៃទី២៦ ខែកុម្ភៈ ឆ្នាំ២០២៦--នៅក្នុងឱកាសទទួលបានដៃគូឧបត្ថម្ភគាំទ្រផ្តាច់មុខ ឆ្នាំ២០២៦ពីក្រុមហ៊ុន វឌ្ឍនៈ ថ្នាក់ដឹកនាំសហព័ន្ធកីឡាប្រដាល់សកលកម្ពុជាបានដាក់គោលដៅជាមួយនឹងក្តីសង្ឃឹមកាន់តែខ្ពស់ ក្នុងការត្រៀមខ្លួនរបស់ក្រុមជម្រើសជាតិកម្ពុជាចូលរួមប្រកួតអន្តរជាតិជាច្រើន ដូចជាស៊ីហ្គេម កីឡាអាស៊ី កីឡាអាស៊ីហ្គេម-យុទ្ធគុន ជាពិសេសឆ្ពោះទៅប្រកួត Qualified អូឡាំពិកហ្គេម ដែលជាការប្រកួតកម្រិតគុណភាពបច្ចេកទេសខ្ពស់បំផុតរបស់ពិភពលោក រៀងរាល់៤ឆ្នាំម្តងផងដែរ។

នេះជាការគូសបញ្ជាក់របស់ឯកឧត្តម ប៊ុយ សុភ័ណ្ឌ ប្រធានសហព័ន្ធកីឡាប្រដាល់សកលកម្ពុជា នៅក្នុងពិធីចុះអនុស្សរណៈលើភាពជាដៃគូឧបត្ថម្ភភេសជ្ជៈផ្តាច់មុខរវាងសហព័ន្ធកីឡាប្រដាល់សកលកម្ពុជា និងក្រុមហ៊ុន វឌ្ឍនៈ នៅទីស្នាក់ការគណៈកម្មាធិការជាតិអូឡាំពិកកម្ពុជា (NOCC) កាលពីថ្ងៃទី២៥ ខែកុម្ភៈ ឆ្នាំ២០២៦។

ឯកឧត្តម ប៊ុយ សុភ័ណ្ឌ លើកឡើងថា សម្រាប់ពិធីចុះអនុស្សរណៈនាពេលនេះ គឺជាការបើកសករាជទំព័រប្រវត្តិសាស្រ្តថ្មីរបស់សហព័ន្ធកីឡាប្រដាល់សកលកម្ពុជា ក្នុងការរៀបចំឱ្យមានកម្មវិធីប្រកួតប្រដាល់សកលអាជីពប្រចាំខែលើកដំបូងបំផុតនៅកម្ពុជា ដែលមានឈ្មោះថា «DRAGON THE GOLDEN RING» ចំនួន ១១លើក សម្រាប់ឆ្នាំ២០២៦។ ជាមួយគ្នានេះ ក្រុមហ៊ុន វឌ្ឍនៈ ក៏មានគម្រោងជួយឧបត្ថម្ភគាំទ្របន្ថែមដល់ក្រុមជម្រើសជាតិប្រដាល់សកលត្រៀមចូលរួមការប្រកួតអន្តរជាតិនានា សម្រាប់ឆ្នាំ២០២៦ ពិសេសការប្រកួតកីឡាអាស៊ី (ASIAN Games) ឆ្នាំ២០២៦ នៅប្រទេសជប៉ុន និងការប្រកួតកីឡាអាស៊ីហ្គេមក្នុងសាល និងយុទ្ធគុន  ឆ្នាំ២០២៦ នៅប្រទេសអារ៉ាប៊ីសាអូឌីតផងដែរ។

«សម្រាប់ភាពជាដៃគូរវាងសហព័ន្ធកីឡាប្រដាល់សកលកម្ពុជា និងក្រុមហ៊ុន វឌ្ឍនៈ នាពេលនេះនឹងក្លាយជាកាលានុវត្តភាព ជាប្រវត្តិសាស្រ្តថ្មីយ៉ាងសំខាន់ក្នុងការផ្តល់ឱកាសដល់កីឡាករ កីឡាការិនីប្រដាល់សកលតាមបណ្តាក្លឹបបានពង្រឹងសមត្ថភាព និងបង្កើនចំណូល ក៏ដូចជារួមចំណែកអភិវឌ្ឍគុណផលក្រុមជម្រើសជាតិប្រដាល់សកលត្រៀមចូលរួមការប្រកួតអន្តរជាតិនានាសម្រាប់ឆ្នាំ២០២៦ ក៏ដូចជាត្រៀមការប្រកួតកីឡាស៊ីហ្គេមនាឆ្នាំ២០២៧ នៅប្រទេសម៉ាឡេស៊ី ពិសេសឆ្ពោះទៅប្រកួតទទួលបានសិទ្ធិផ្លូវការ (Qualified) សម្រាប់ការប្រកួតកីឡាអូឡាំពិក នាឆ្នាំ២០២៨ នៅទីក្រុង Los Angeles សហរដ្ឋអាមេរិក និងត្រៀមឆ្ពោះទៅដណ្តើមមេដាយក្នុងការប្រកួតកីឡាយុវជនអាស៊ី ឆ្នាំ២០៣១ ដែលព្រះរាជាណាចក្រកម្ពុជានឹងធ្វើជាម្ចាស់ផ្ទះ»។ ប្រធានសហព័ន្ធបានបន្ថែម។

ឯកឧត្តម ប៊ុយ សុភ័ណ្ឌ គូសបញ្ជាក់ថា សម្រាប់ពិធីចុះអនុស្សរណៈនាពេលនេះ គឺជាការបើកសករាជទំព័រប្រវត្តិសាស្រ្តថ្មីរបស់សហព័ន្ធកីឡាប្រដាល់សកលកម្ពុជា ក្នុងការរៀបចំឱ្យមានកម្មវិធីប្រកួតប្រដាល់សកលអាជីពចំនួន១១ខែ ឆ្នាំ២០២៦ ក្រោមការឧបត្ថម្ភគាំទ្រផ្ដាច់មុខដោយក្រុមហ៊ុន វឌ្ឍនៈ ដែលជាក្រុមហ៊ុនមានភាពលេចធ្លោបំផុតក្នុងឧស្សាហកម្មផលិតភេសជ្ជៈនៅកម្ពុជា និងមានម្ចាស់ភាគហ៊ុនជាជនជាតិខ្មែរ ១០០% ជាមួយនឹងការរួមចំណែកយ៉ាងសំខាន់ជួយគាំទ្រអភិវឌ្ឍសេដ្ឋកិច្ច សង្គមជាតិលើគ្រប់វិស័យ ពិសេសក្នុងការអភិវឌ្ឍវិស័យកីឡាជាតិ។ 

ប្រធានសហព័ន្ធបានរម្លឹកថា ប្រដាល់សកលកម្ពុជាគឺជាប្រភេទកីឡាដ៏មានសក្តានុពលបំផុតមួយតាំងពីសម័យសង្គមរាស្រ្តនិយម ដោយក្រុមជម្រើសជាតិប្រដាល់សកលកម្ពុជារហូតដល់ ៤រូបទទួលបានសិទ្ធិចូលរួមការប្រកួតកីឡាអូឡាំពិក នាឆ្នាំ១៩៦៤ នៅទីក្រុងតូក្យូ ប្រទេសជប៉ុន ដែលជាកំណត់ត្រាខ្ពស់បំផុតរបស់ប្រដាល់សកលកម្ពុជា ក្នុងប្រវត្តិចូលរួមការប្រកួតកីឡាអូឡាំពិក។  ក្នុងន័យនេះ សហព័ន្ធសង្ឃឹមថា ក្រោមជួយឧបត្ថម្ភគាំទ្រពីក្រុមហ៊ុន វឌ្ឍនៈ នាពេលនេះ យើងនឹងមានលទ្ធភាពអភិវឌ្ឍធនធានកីឡាករ កីឡាការិនីឈានទៅប្រកួតទទួលបានសិទ្ធិផ្លូវការសម្រាប់ការប្រកួតកីឡាអូឡាំពិក នាពេលអនាគតជាក់ជាមិនខាន។ 

តាងនាមថ្នាក់ដឹកនាំសហព័ន្ធកីឡាប្រដាល់សកលកម្ពុជា និងក្រុមគ្រួសារប្រដាល់សកលបានថ្លែងអំណរគុណយ៉ាងជ្រាលជ្រៅបំផុតចំពោះ អ្នកឧកញ៉ា សំអាង វឌ្ឍនៈ អគ្គនាយក ក្រុមហ៊ុនវឌ្ឍនៈគ្រុប ដែលបានឧបត្ថម្ភគាំទ្រឱ្យការរៀបចំកម្មវិធីប្រកួតប្រដាល់សកលអាជីពប្រចាំខែជាប្រវត្តិសាស្រ្តនេះឡើ ខណៈពិធីចុះហត្ថលេខាធិការនៃភាពជាដៃគូនេះតំណាងដោយកញ្ញា ឡុង ស៊ីណេត ប្រធានផ្នែកទីផ្សារ និងកញ្ញា ទូច លាភភា អ្នកគ្រប់គ្រងផែនការផ្សព្វផ្សាយតំណាងក្រុមហ៊ុន វឌ្ឍនៈ៕

ដោយ ហេង ណាលីន