AKP ភ្នំពេញ ថ្ងៃទី២៧ ខែមករា ឆ្នាំ២០២៦ -- រដ្ឋមន្ត្រីការបរទេសកូរ៉េខាងត្បូង លោក ចូ ហ៊ីយន់ (Cho Hyun) បាននិយាយកាលពីថ្ងៃចន្ទថាការជំរុញរបស់កូរ៉េខាងត្បូងក្នុងការទិញនាវាមុជទឹកដើរដោយថាមពលនុយក្លេអ៊ែរនឹងរួមចំណែកដល់សម្ព័ន្ធភាពជាមួយសហរដ្ឋអាមេរិក ដោយជំរុញសមត្ថភាពទប់ស្កាត់របស់ទីក្រុងសេអ៊ូល។

លោក ចូ បានធ្វើការកត់សម្គាល់នេះក្នុងអំឡុងពេលនៃកិច្ចប្រជុំជាមួយអនុរដ្ឋមន្ត្រីក្រសួងគោលនយោបាយសង្គ្រាមអាម៉េរិក លោក អ៊ែលប្រ៊ីដ ខូលប៊ី (Elbridge Colby)។ នេះបើយោងតាមទីភ្នាក់ងារសារព័ត៌មានយ៉ុនហាប់បានរាយការណ៍។

លោក ខូលប៊ី កំពុងបំពេញទស្សនកិច្ចទីក្រុងសេអ៊ូលនៅក្នុងសប្តាហ៍នេះ បន្ទាប់ពីការចេញផ្សាយយុទ្ធសាស្ត្រការពារជាតិថ្មីរបស់មន្ទីរបញ្ចកោណដែលរួមមានទិសដៅគោលនយោបាយរបស់ខ្លួនសម្រាប់ឧបទ្វីបកូរ៉េ និងបញ្ហាសម្ព័ន្ធភាពផ្សេងទៀត។

ក្រសួងបាននិយាយនៅក្នុងសេចក្តីថ្លែងការណ៍មួយថា «ជាពិសេសលោករដ្ឋមន្ត្រី ចូ បានរំលឹកថា កិច្ចសហប្រតិបត្តិការនាវាមុជទឹកដើរដោយថាមពលនុយក្លេអ៊ែរនេះនឹងរួមចំណែកដល់សម្ព័ន្ធភាព (ជាមួយសហរដ្ឋអាមេរិក) ដោយពង្រឹងសមត្ថភាពទប់ស្កាត់របស់កូរ៉េខាងត្បូង ដោយអំពាវនាវឱ្យមានជំហានអនុវត្តជាក់ស្តែងតាមរយៈកិច្ចចរចាកម្រិតការងារ»។

លោក ខូលប៊ី បានកោតសរសើរចំពោះការប្តេជ្ញាចិត្តរបស់កូរ៉េខាងត្បូងជាសម្ព័ន្ធមិត្តគំរូ ក្នុងការដើរតួនាទីនាំមុខគេក្នុងការការពារឧបទ្វីបកូរ៉េ ដោយពង្រឹងសមត្ថភាពការពារជាតិរបស់ខ្លួន។

លោកបានបន្ថែមថា ក្រសួងសង្គ្រាមសហរដ្ឋអាមេរិកនឹងដើរតួនាទីយ៉ាងសកម្មក្នុងការធានាថា កិច្ចព្រមព្រៀងសំខាន់ៗដែលសម្រេចបាននៅក្នុងកិច្ចចរចាកំពូលត្រូវបានអនុវត្តយ៉ាងឆាប់រហ័ស។

កាលពីខែវិច្ឆិកា ឆ្នាំមុន កូរ៉េខាងត្បូង និងសហរដ្ឋអាមេរិកបានចុះហត្ថលេខាលើកិច្ចព្រមព្រៀងពាណិជ្ជកម្មមួយ ដែលរួមមានការវិនិយោគរបស់កូរ៉េខាងត្បូងចំនួន ១៥០ប៊ីលានដុល្លារអាម៉េរិកនៅក្នុងវិស័យសាងសង់នាវារបស់សហរដ្ឋអាមេរិក ហើយប្រទេសទាំងពីរបានព្រមព្រៀង«ឈានទៅមុខ» ទៅលើការសាងសង់នាវាមុជទឹកដើរដោយថាមពលនុយក្លេអ៊ែរ។

ក្រោមកិច្ចព្រមព្រៀងនេះ កូរ៉េខាងត្បូងនឹងសាងសង់នាវាមុជទឹកដើរដោយថាមពលនុយក្លេអ៊ែរជាផ្នែកមួយនៃភាពជាដៃគូថ្មីជាមួយទីក្រុងវ៉ាស៊ីនតោនក្នុងការសាងសង់នាវា បញ្ញាសិប្បនិម្មិត និងឧស្សាហកម្មនុយក្លេអ៊ែរ។

នៅក្នុងការវិវឌ្ឍពាក់ព័ន្ធមួយ ក្រសួងការពារជាតិកូរ៉េខាងត្បូងបាននិយាយថា យុទ្ធសាស្ត្រការពារជាតិថ្មីរបស់សហរដ្ឋអាមេរិក បានសង្កត់ធ្ងន់ទៅលើសមត្ថភាពរបស់ទីក្រុងសេអ៊ូលក្នុងការដើរតួនាទី «នាំមុខគេ» បន្ថែមទៀតនៅក្នុងសន្តិសុខនៃឧបទ្វីបកូរ៉េ៕

ដោយ៖ យា ចិន្ដាខន្ដី (ប្រភព៖ AA-AKP)