AKP ភ្នំពេញ ថ្ងៃទី៣១ ខែកក្កដា ឆ្នាំ២០២៥--លោកជំទាវ ឧត្តមសេនីយ៍ឯក ម៉ាលី សុជាតា អនុរដ្ឋលេខាធិការ និងជាអ្នកនាំពាក្យក្រសួងការពារជាតិបានគូសបញ្ជាក់ថា កងទ័ពកម្ពុជា-ថៃ កំពុងបន្តអនុវត្តន៍បទឈប់បាញ់ស្របតាមកិច្ចព្រមព្រៀងរបស់ថ្នាក់ដឹកនាំប្រទេសទាំងពីរដែលបានធ្វើឡើងនៅប្រទេសម៉ាឡេស៊ី កាលពីថ្ងៃទី២៨ ខែកក្កដា ឆ្នាំ២០២៥ កន្លងទៅ ដោយលទ្ធផលមួយចំនួនដែលយើងទទួលបានពីបទឈប់បាញ់បានចូលជាធរមាន និងបានវិវត្តន៍ទៅមុខជាជំហានៗ។ ការគូសបញ្ជាក់របស់លោកជំទាវឧត្ដមសេនីយ៍ឯកបែបនេះ ក្នុងការធ្វើសេចក្តីសង្ខេបព័ត៌មានប្រចាំថ្ងៃស្តីពីលទ្ធផលនៃការអនុវត្តបទឈប់បាញ់រវាង កម្ពុជា-ថៃ នៅទីស្តីការគណៈរដ្ឋមន្ត្រី នាព្រឹកថ្ងៃទី៣១ ខែកក្កដា ឆ្នាំ២០២៥។

លោកជំទាវ ឧត្តមសេនីយ៍ឯក ម៉ាលី សុជាតា មានប្រសាសន៍ថា ការទទួលបាននូវភាពជោគជ័យនៃបទឈប់បាញ់យើងអាចនិយាយបានថា សង្គ្រាមអាចនឹងធានាថាត្រូវបានបញ្ចប់ និងជំនួសមកវិញដោយសន្តិភាព ដែលកងទ័ពប្រទេសទាំងពីរកម្ពុជា-ថៃ បានគោរព និងអនុវត្តន៍តាមកិច្ចព្រមព្រៀង ហើយបានជួបប្រជុំគ្នានៅក្នុងកម្រិតថ្នាក់ភូមិភាគ។ លោកជំទាវ ឧត្តមសេនីយ៍ឯកលើកឡើងថា ម៉ាឡេស៊ីក្នុងនាមជាប្រធានអាស៊ានបច្ចុប្បន្នក៏បានបញ្ជូនគណៈប្រតិភូអគ្គមេបញ្ជាការកងទ័ពរបស់ខ្លួនមកដល់ប្រទេសកម្ពុជា ហើយក៏បានជួបធ្វើការងារលើបទឈប់បាញ់នេះមួយចំនួនហើយដែរ។ លោកជំទាវ ឧត្តមសេនីយ៍ឯក អ្នកនាំពាក្យក្រសួងការពារជាតិបានរម្លឹកផងដែរថា កាលពីម្សិលមិញថ្នាក់ដឹកនាំក្រសួងការពារជាតិកម្ពុជាក៏បានរៀបចំកម្មវិធីចុះទៅដល់ទីតាំងផ្ទាល់ដោយក្នុងនោះគឺមានអង្គទូត រួមនឹងអនុព័ន្ធយោធាចំនួន១៣ប្រទេស បានអញ្ជើញទៅដល់ទីតាំងតំបន់អានសេះ និងកងពលលេខ៣។ 

ជាមួយគ្នានេះ លោកជំទាវ ឧត្តមសេនីយ៍ឯកបានអះអាងបន្ថែមថា៖ «មួយវិញទៀតគឺយើងបានឯកភាពគ្នារួចហើយកំណត់យកថ្ងៃទី០៤ ខែសីហា ឆ្នាំ២០២៥ គឺជាថ្ងៃរៀបចំកិច្ចប្រជុំរបស់គណៈកម្មាធិការព្រំដែនកម្ពុជា-ថៃ(GBC) ដែលកម្ពុជានឹងធ្វើជាម្ចាស់ផ្ទះ។ ជំហានទាំងអស់នេះហើយដែលបង្ហាញថាកម្ពុជាបានអនុវត្តន៍យ៉ាងម៉ឺងម៉ាត់នូវអ្វីដែលបានឯកភាពគ្នា»៕

ដោយ៖ ចាន់ សុភឿន