AKP បន្ទាយមានជ័យ ថ្ងៃទី២៨ ខែកក្កដា ឆ្នាំ២០២៥--ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យកាលពីរសៀលថ្ងៃអាទិត្យ ទី២៧ ខែកក្កដា ឆ្នាំ២០២៥ បានអញ្ជើញចុះពិនិត្យដោយផ្ទាល់នូវស្ថានភាពនៅច្រកទ្វារព្រំដែនអន្តរជាតិប៉ោយប៉ែត ដើម្បីសួរសុខទុក្ខមន្ត្រីប្រចាំការ និងពុកម៉ែបងប្អូនប្រជាពលរដ្ឋ ដែលកំពុងបន្តវិលត្រឡប់មកមាតុភូមិកម្ពុជាវិញ។ វត្តមានរបស់ឯកឧត្តមបានឆ្លុះបញ្ចាំងពីការយកចិត្តទុកដាក់ខ្ពស់របស់រាជរដ្ឋាភិបាលចំពោះសុខុមាលភាពរបស់ពលករខ្មែរ។

ឯកឧត្តមរដ្ឋមន្ត្រីបានទទួលស្វាគមន៍យ៉ាងកក់ក្តៅចំពោះពលករដែលបន្តចាកចេញពីប្រទេសថៃវិលត្រឡប់មកកម្ពុជាវិញ និងបានថ្លែងអំណរគុណចំពោះអាជ្ញាធរខេត្ត និងមន្ត្រីប្រចាំការនៅច្រកព្រំដែនទាំងអស់ ចំពោះកិច្ចខិតខំប្រឹងប្រែងឥតឈប់ឈរក្នុងការរៀបចំការដឹកជញ្ជូនទៅកាន់ស្រុកកំណើត ការជួយស្វែងរកការងារ និងការផ្តល់សេវាសុខភាព ដើម្បីសម្របសម្រួលឱ្យប្រជាពលរដ្ឋវិលត្រឡប់មកវិញដោយរលូន និងមានសុវត្ថិភាព។

ឯកឧត្តម ឌិត ទីណា បានមានប្រសាសន៍ថា «ខ្ញុំពិតជាកោតសរសើរចំពោះការលះបង់ និងការខិតខំប្រឹងប្រែងរបស់បងប្អូនមន្ត្រីទាំងអស់ ដែលបានជួយសម្រួលដល់ការវិលត្រឡប់របស់ពលករយើងឱ្យប្រព្រឹត្តទៅបានល្អ។ នេះជាការឆ្លុះបញ្ចាំងពីស្មារតីសាមគ្គីភាព និងការទទួលខុសត្រូវរបស់យើងទាំងអស់គ្នាចំពោះប្រជាពលរដ្ឋ។» ពលករជាច្រើនរូបដែលបានវិលត្រឡប់មកពីប្រទេសថៃវិញបានសម្តែងនូវក្តីរំភើប និងការដឹងគុណចំពោះការជួយសម្រួលពីសំណាក់អាជ្ញាធរ។

លោក វណ្ណៈ អាយុ៣៥ឆ្នាំ មកពីខេត្តបាត់ដំបង បានថ្លែងថា «ខ្ញុំពិតជារំភើបណាស់ដែលបានត្រឡប់មកផ្ទះវិញដោយសុវត្ថិភាព។ អាជ្ញាធរបានរៀបចំឡានដឹកជញ្ជូន និងផ្តល់អាហារទឹកស្អាតគ្រប់គ្រាន់។ ខ្ញុំមានអារម្មណ៍កក់ក្តៅណាស់ដែលឃើញរដ្ឋាភិបាលយកចិត្តទុកដាក់ដល់ពលករដូចពួកខ្ញុំ។»

ចំណែកឯ អ្នកស្រី សុភ័ក្ត្រ អាយុ៤២ឆ្នាំ មកពីខេត្តបន្ទាយមានជ័យ បានលើកឡើងថា «ដំបូងខ្ញុំបារម្ភច្រើន ខ្លាចពិបាកក្នុងការធ្វើដំណើរត្រឡប់មកវិញ តែពេលមកដល់ច្រកទ្វារ ឃើញមានមន្ត្រីរង់ចាំជួយសម្រួលគ្រប់បែបយ៉ាង។ ថែមទាំងមានគ្រូពេទ្យពិនិត្យសុខភាពទៀតផង។ ខ្ញុំសូមថ្លែងអំណរគុណដល់ឯកឧត្តមរដ្ឋមន្ត្រី និងអាជ្ញាធរទាំងអស់។»

សូមបញ្ជាក់ថា ដំណើរចុះពិនិត្យរបស់ឯកឧត្តម ឌិត ទីណា មិនត្រឹមតែជាការសួរសុខទុក្ខប៉ុណ្ណោះទេ តែជាការបង្ហាញពីការប្តេជ្ញាចិត្តរបស់រាជរដ្ឋាភិបាលកម្ពុជា ក្នុងការបន្តគាំទ្រ និងផ្តល់សេវាចាំបាច់នានាដល់ប្រជាពលរដ្ឋ ជាពិសេសពលករដែលកំពុងប្រឈមនឹងការលំបាក។ ក្រសួងកសិកម្ម រុក្ខាប្រមាញ់ និងនេសាទ ក៏ដូចជាក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ នឹងបន្តសហការយ៉ាងជិតស្និទ្ធជាមួយអាជ្ញាធរពាក់ព័ន្ធទាំងអស់ ដើម្បីធានាថាពលករកម្ពុជាទាំងអស់ទទួលបានការមើលថែ និងជំនួយចាំបាច់ក្នុងដំណើរការវិលត្រឡប់មកកាន់មាតុភូមិវិញប្រកបដោយភាពរលូន និងសេចក្តីថ្លៃថ្នូរ៕

ដោយ ឈុន សារ៉ាត