AKP ភ្នំពេញ ថ្ងៃទី១៤ ខែកុម្ភៈ ឆ្នាំ២០២៤--

ការតាំងពិព័រណ៍ឧបករណ៍ សម្ភារចាស់ៗពាក់ព័ន្ធនឹងវិទ្យុជាសាធារណៈ បានទាក់ចិត្តយុវជនឱ្យឈ្វេងយល់កាន់តែស៊ីចជម្រៅពីប្រវត្តិ និងការវិវត្តនៃប្រព័ន្ធផ្សព្វផ្សាយបែបបុរាណ ជាពិសេសការផ្សព្វផ្សាយជាសំឡេងតាមរលកធាតុអាកាសនៃវិទ្យុជាតិកម្ពុជាដែលបានផ្ដល់ចំណេះដឹង ព័ត៌មាន និងការកម្សាន្តជាង៤ទ​សវត្ស​រ៍​កន្ល​ងមក ហើយនៅតែបន្តអន្ទងសោតិន្ត្រិយារម្មណ៍ប្រជាពលរដ្ឋកម្ពុជារហូតមកដល់សម័យបច្ចុប្បន្ន។

ក្រសួងព័ត៌មាន បានប្រារព្ធទិវាវិទ្យុពិភពលោកឆ្នាំ២០២៥ ក្រោមប្រធានបទ «វិទ្យុ និងបម្រែបម្រួលអាកាសធាតុ» ក្នុងគោលបំណងបង្កើនការយល់ដឹងសាធារណៈពីតួនាទី និងគុណតម្លៃដ៏សំខាន់របស់វិទ្យុ ក្នុងការផ្តល់ព័ត៌មាន ពិតគ្រប់ជ្រុងជ្រោយ ការកម្សាន្តសម្បូណ៌បែប ព្រមទាំងការអប់រំប្រជាពលរដ្ឋគ្រប់មជ្ឈដ្ឋាន។ ទន្ទឹមនឹងទិវាវិទ្យុពិភពលោក ក្រសួងព័ត៌មានក៏បានតាំងពិព័រណ៍សម្ភារចាស់ៗពាក់ព័ន្ធនឹងវិទ្យុជាសាធារណៈ ក្នុងបរិវេណ ទីស្តីការក្រសួង និងការបង្ហាញប្រតិបត្តិការក្នុងស្ថានីយវិទ្យុ ក្នុងចំណោមសកម្មភាពផ្សេងៗទៀត។

ការប្រារព្ធទិវាវិទ្យុពិភពលោកក្នុងឆ្នាំនេះ គឺមានការអញ្ជើញចូលរួមពីតួអង្គពាក់ព័ន្ធក្នុងវិស័យវិទ្យុ រាប់បញ្ចូលទាំង ថ្នា​ក់​​ដឹកនាំក្រសួងព័ត៌មាន ឥស្សរជននិងអ្នកមានបទពិសោធក្នុងការងារគ្រប់គ្រង និងផ្សព្វផ្សាយវិទ្យុ នៅកម្ពុជា មន្ត្រីជំនាញនៃអគ្គនាយកដ្ឋានវិទ្យុជា​តិ​កម្ពុជា (RNK) មន្ទីរព័ត៌មានរាជធានី-ខេត្ត សមាគមវិទ្យុកម្ពុជា តំណាងស្ថានីយវិ​ទ្យុ​ទាំងអស់នៅកម្ពុជា អ្នកសារព័ត៌​មាន តំណាងវិស័យឯកជន និងនិស្សិតមកពីសាកលវិទ្យាល័យ នៅរាជធានីភ្នំពេញ។

កំពុងដើរជាក្រុមៗជាមួយមិត្តភក្តិ ទស្សនាបណ្ដើរ ស្ដាប់ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មានរៀបរាប់ពីសម្ភារផ្សព្វផ្សាយបុរាណបណ្ដើរៗ កញ្ញា សារ៉ាត់ ម៉ូនីកា ជានិស្សិតមកពី សាកលវិទ្យាល័យ ប៊ែលធី អន្តរជាតិ បានប្រាប់អ្នកយកព័ត៌មាននៃទីភ្នាក់ងារសារព័ត៌មានកម្ពុជា(AKP) ថា កញ្ញាពិតជាមានការភ្ញាក់ផ្អើលមែនទែន មិននឹកស្មានថា បច្ចេកវិទ្យាដើរលឿនណាស់ ពេលឃើញសម្ភារចាស់ៗ ធ្វើឱ្យកញ្ញាស្រមៃនឹកដល់អតីតកាល និងគំរូវីរភាពនៃរបស់មន្ត្រីជើងចាស់ដែលបានខិតខំបំពេញការងារ តាមរយៈឧបករណ៍ទាំងឡាយប្រកបដោយភាពច្នៃប្រឌិត និងប៉ិនប្រសប់ និងបានបន្សល់ទុកសម្រាប់មនុស្សជំនាន់ក្រោយបានឃើញទៀតផង។ កញ្ញា សារ៉ាត់ ម៉ូនីកា ទទួលស្គាល់ថា៖ «បើប្រៀបធៀបគ្នាសម័យមុន និងបច្ចុប្បន្ន ខ្ញុំគិតថា អស្ចារ្យណាស់ ឥឡូវវាជឿនលឿនខ្លាំងផ្នែកខាងប្រព័ន្ធផ្សព្វផ្សាយ»។

បើងាកទៅមើល យុវនិស្សិត យ៉ង់ ថេរវង្ស ឯណោះវិញ ដើរតែម្នាក់ឯង តែរូបគេទស្សនាហាក់យកចិត្តទុកដាក់ណាស់។ ជានិស្សិតផ្នែកក្រាហ្វិកឌីសាញ មកពីសាកលវិទ្យាល័យ ប៊ែលធី អន្តរជាតិ បាននិយាយដោយទឹកមុខរីករាយថា ប្លែកអារម្មណ៍ណាស់ ធ្លាប់តែកាន់របស់ទំនើបដល់ពេលឃើញរបស់បុរាណធ្វើឱ្យរូបគេជាប់ចិត្តនិងកាន់តែចង់ដឹងពីការប្រែប្រួលនៃប្រព័ន្ធផ្សព្វផ្សាយពីសម័យមួយទៅសម័យមួយទៀត។

យុវនិស្សិត យ៉ង់ ថេរវង្ស បាននិយាយថា៖ «ប្លែកអារម្មណ៍ ព្រោះខ្ញុំអត់ដែលឃើញរបស់ហ្នឹងទេ ពេលនេះបានស្ដាប់បានឮការពន្យល់ពីមន្ត្រីដែលដាក់តាំងពិព័រណ៍ ធ្វើឱ្យខ្ញុំបានយល់ពីជំនាន់សម័យ៩០ជាង សម្ភារផ្ស​ព្វផ្សា​យ​មិ​នទំនើបទេ តែអាចប្រើប្រាស់បាន វាបុរាណក៏ពិតមែន ប៉ុន្តែជាមធ្យោបាយទំនាក់ទំនងស្រួល»។

កំពុងឈរជាក្រុមបកនំអន្សម និងនំគមដែលក្រុមការងារវិទ្យុជាតិកម្ពុជារៀបចំសម្រាប់ទទួលអ្នកមកទស្សនាពិព័រណ៍ ឈររេរាជជែកគ្នាពីរឿងផ្សេងៗផង យុវតីបីបួននាក់ជានិស្សិតបានទស្សនាពិព័រណ៍ចប់ហើយ តែពួកគេដូចជាមិនទាន់អស់ចិត្ត នៅតែឈរកាន់ប៉ះអង្អែលគ្រោងដែកវែងខ្លីនៃឧបករណ៍ផ្សាយវិទ្យុ។ ពួកគេនិយាយថា ពីមុនវិទ្យុមានតែរលកសំឡេងទេ ប៉ុន្តែឥឡូវឈានដល់ផ្សាយចេញជារូបវីដេអូទៀត។

ក្នុងចំណោមនិស្សិតស្រីៗដែលមានឈ្មោះ រឿន យូ ,សេក ដាយុន, តៃ នីហ៊ង,និង កុសល ស្រីរ័ត្ន មាននិស្សិតម្នាក់ក្លាហានណាស់ គ្រាន់តែអ្នកសារព័ត៌មានសួរតែបន្តិចនាងឆ្លើយយ៉ាងរហ័សដោយសំឡេងច្បាស់ៗថា ពិព័រណ៍នេះល្អណាស់ នាងសង្កត់ធ្ងន់ថា៖ «ឥឡូវទំនើបខ្លាំងណាស់ របៀបនៃការផ្សាយអាចឱ្យប្រជាជានដឹងបានលឿនរហ័សជាងមុន ជាពិសេស ការផ្សាយព័ត៌មានទាន់ហេតុការណ៍»។ អ្វីដែលនិស្សិតទាំងឡាយសរសើរមិនដាច់ពីមាត់ដល់ក្រសួងព័ត៌មាននោះគឺ ការរក្សាសម្ភារចាស់ៗទុកឱ្យក្មេងជំនាន់ក្រោយបានស្គាល់របស់ពីមុនដែលពួកគេមិនធ្លាប់ឃើញ ហើយអាចនឹងដឹងថា ពីសម័យមុនគេផ្សាយសំឡេងវិទ្យុតាមរបបៀបណា។

ក្រុមនិស្សិត ទាំងនោះបានបន្តថា៖ «និយាយទៅបើឃើញតែរបស់ទំនើប គាត់អត់ដឹងពីរបស់បុរាណថា គេធ្វើម៉េចៗទេ បើសិនជាយើងបន្សល់ទុកឱ្យពួកគាត់ឃើញអ៊ីចឹង ពិតណាស់ពួកគាត់ឃើញទាំងពីរតែម្ដងហើយពួកគាត់យល់ដឹងបានច្រើនទៀត»។

នៅកម្ពុជា វិទ្យុបានចូលរួមចំណែកយ៉ាងសកម្មក្នុងការផ្សារភ្ជាប់ទំនាក់ទំនង និងការផ្តល់ព័ត៌មាន លឿនរហ័សដល់សហគមន៍។ ជាមួយគ្នានេះ វិទ្យុក៏ជាភ្នាក់ងារសកម្មចូលរួមដោះស្រាយរាល់បញ្ហានានាក្នុងការរស់នៅប្រចាំថ្ងៃ តាមរយៈការផ្តល់ជាសំឡេងពីពលរដ្ឋទៅកាន់រដ្ឋាភិបាល និងពីរដ្ឋាភិបាលមកប្រជាពលរដ្ឋវិញ ដើម្បីរួមចំ​ណែ​កធានាស្ថិរភាព សន្តិសុខ ភាពសុខសាន្ត និងការរីកចម្រើនក្នុងសង្គម ផ្តល់នូវប្រធានបទគន្លឹះសំខាន់ៗ គោ​ល​នយោបាយរាជរដ្ឋាភិបាល ក៏ដូចជាសភាពការណ៍ទូទៅនៅកម្ពុជា តំបន់និងពិភពលោក។

ក្នុងឱកាសអញ្ជើញជាអធិបតីនៃការប្រារព្ធទិវាវិទ្យុពិភពលោកឆ្នាំ២០២៥ នារសៀលថ្ងៃទី១៣ ខែកុម្ភៈ ឆ្នាំ២​០​២​៥ នៅទីស្តីការក្រសួងព័ត៌មាន ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានមានប្រសាសន៍ថា ទោះបីក្នុងកាលៈទេ​សៈណាក៏ដោយ វិទ្យុនៅតែដើរតូនាទីសំខាន់ក្នុងការផ្សព្វផ្សាយសំឡេង វិទ្យុជាឧបករណ៍បញ្ជូនសំឡេងមួយដែលនៅតែមា​នតម្លៃ ហើយវិទ្យុនៅតែជាប្រភពព័ត៌មានមួយដែលគួរឱ្យទុកចិត្ត ហើយជារបៀបកម្សាន្តសប្បាយ,ទោះបីក្នុងក្របខណ្ឌប​ច្ចុប្បន្នបច្ចេកវិទ្យាទំនើប មានការរីកចម្រើន ក៏ប៉ុន្តែប្រជាជនមិនបោះបង់ចោលការស្តាប់វិទ្យុនោះទេ នៅពេលធ្វើដំណើរតាមឡានក៏បើកវិទ្យុស្តាប់ ហើយប្រជាជននៅតាមទីជនបទកំពុងធ្វើស្រែ ចម្ការក៏នៅតែបើកវិទ្យុស្តាប់កម្សាន្ត និងទទួលបានដំណឹង ព័ត៌មានថ្មីៗដែលកើតមានឡើង។

ឯកឧត្តម រដ្ឋមន្ត្រីបានថ្លែងបន្តថា តូនាទី របស់វិទ្យុមានសារៈសំខាន់ណាស់ នៅពេលប្រព័ន្ធផ្សព្វផ្សាយ Internet អត់ទាន់ដើរ ហើយកាលពីជំនាន់មុន ប្រព័ន្ធផ្សព្វផ្សាយពិសេសវិទ្យុ ជាផ្នែកមួយក្នុងការបំពងសំឡេង និងពង្រីកសំឡេងរបស់យើងឱ្យបានធំ។ ឯកឧត្ដមរដ្ឋមន្រ្ដីគូសបញ្ជាក់ថា៖ «ការប្រើប្រាស់វិទ្យុគឺជាមធ្យោបាយមួយបានគ្របដណ្តប់ទៅលើសំឡេងច្រើន។ ដូច្នេះការប្រារព្ធទិវាវិទ្យុពិភពលោកនេះឡើង ដើម្បីបង្ហាញឱ្យឃើញពីសារប្រយោជន៍នៃវិទ្យុ ទោះបីក្នុងកាលៈទេសៈណាក៏ដោយ វិទ្យុក៏នៅដើរតូនាទីសំខាន់ក្នុងការផ្សព្វផ្សាយសំឡេង វិទ្យុជាឧបករណ៍បញ្ជូនសំឡេងមួយដែលនៅតែមានតម្លៃ, វិទ្យុទោះនៅក្នុងកាលៈទេសៈណាក៏ដោយគឺនៅតែជាប្រភពព័ត៌មានមួយដែលគួរឱ្យទុកចិត្ត ហើយជារបៀបកម្សាន្ត»។

ជាមួយគ្នានេះដែរ ឯកឧត្តម នេត្រ ភក្រ្ដា ក៏បានធ្វើការរម្លឹកឡើងវិញកាលពីអតីតកាល មន្ត្រីនៃវិទ្យុជាតិកម្ពុជា គឺបានលះបង់ តស៊ូធ្វើកិច្ចការងារតាំងពីនៅវ័យក្មេង រហូត ដល់វ័យចាស់ចូលនិវត្តន៍ បើយើងមើលឱ្យឆ្ងាយ វិទ្យុគ្រាន់តែជាមធ្យោបាយផ្សព្វផ្សាយសំឡេង ក៏ប៉ុន្តែវិទ្យុជាកន្លែងបណ្តុំគ្រួសារ វិទ្យុជាកន្លែងមួយដែលផ្តល់នូវការងារ វិទ្យុជាកន្លែងមួយដែលអ្នកស្នេហាជាតិ មានសំឡេងល្អ មានទឹកដៃល្អក្នុងការសរសេរអត្ថបទ មានជំនាញក៏អាចចូលរួមជាមួយរដ្ឋាភិបាល ក្នុងការចូលរួមរំដោះប្រទេសជាតិផងដែរ ។ ឯកឧត្ដមលើកឡើងថា អាចនិយាយបានថា អ្នកធ្វើការងារនៅវិទ្យុក្នុងអតីតកាលដែលប្រទេសកម្ពុជាឆ្លងកាត់ភ្លើងសង្រ្គាម ហើយមិនទាន់មានបច្ចេកវិទ្យាទំនើប វិទ្យុនេះ គឺជាទាហានសតិអារម្មណ៍មួយ ដែលបានចូលរួមយ៉ាងសកម្មជាមួយរដ្ឋាភិបាល កម្លាំងកងទ័ព ក្នុងការរំដោះប្រទេស ។

យោងតាមសេចក្តីប្រកាសព័ត៌មានរបស់ ក្រសួងព័ត៌មានបានឱ្យដឹងថា ដើម្បីចូលរួមអបអរទិវាដ៏មានសារៈសំខាន់ជាសកលនេះ ក្រសួងព័ត៌មានបានរៀបចំកម្មវិធីសំខាន់ៗដូចជា ការបង្ហាញអំពី «ប្រវត្តិនិងការវិវត្តរបស់វិទ្យុក្នុងសង្គមកម្ពុជា» និង «តួនាទីរបស់វិទ្យុក្នុងការលើកកម្ពស់ ការយល់ដឹងសហគមន៍ពីបម្រែបម្រួលអាកាសធាតុ និងការប្រឆាំងព័ត៌មានក្លែងក្លាយ» ការចែករំលែកនិងផ្លាស់ប្តូរ បទពិសោធពីអ្នកជំនាញលើការងារវិទ្យុ ការតាំងពិព័រណ៌សម្ភារចាស់ៗពាក់ព័ន្ធនឹងវិទ្យុជាសាធារណៈ ក្នុងបរិវេណ ទីស្តីការក្រសួង និងការបង្ហាញប្រតិបត្តិការក្នុងស្ថានីយវិទ្យុ ក្នុងចំណោមសកម្មភាពផ្សេងៗទៀត។

ក្នុងសេចក្តីប្រកាសព័ត៌មានបន្ដថា ដើម្បីលើកកម្ពស់ការចូលរួមដោយផ្ទាល់របស់សាធារណជនក្នុងការថែរក្សា និងអភិរក្សកេរដំណែល ក៏ដូចជាគុណតម្លៃរបស់ប្រព័ន្ធផ្សព្វផ្សាយបុរាណគ្រប់ប្រភេទ រួមទាំងវិទ្យុ ឱ្យបា​ន​គង់វង្សសម្រាប់យុវជនជំនាន់ក្រោយ ក្រសួងព័ត៌មាននឹងរៀបចំបង្កើត «សារមន្ទីរប្រព័ន្ធផ្សព្វផ្សាយ» ដែលប្រ​មូ​ល​ផ្តុំ​នូវសម្ភារឧបករណ៍នានាទាក់ទង នឹងប្រព័ន្ធផ្សព្វផ្សាយ ដើម្បីតាំងបង្ហាញ និងសម្រាប់ការសិក្សាពីប្រវត្តិសារព័​ត៌មាន និងឧបករណ៍ផ្សេងៗទាក់ទង នឹងវិស័យព័ត៌មាននិងសោតទស្សន៍។

ក្នុងឱកាសនោះ ឯកឧត្ដម នេត្រ ភក្រ្ដា បានចាត់ទុកថា នេះជាមោទនភាពមួយសម្រាប់មន្ត្រីវិទ្យុទាំងអស់ដែលបានខិតខំប្រឹងប្រែងក្នុងការបំពេញកិច្ចការងារនៅក្នុងដំណាក់កាលដែលកម្ពុជាជួបលំបាក ក្នុងដំណាក់កាលប្រឈមមុខការគំរាមកំហែង ពីរបបប្រល័យពូជសាសន៍ ឬការវិលត្រឡប់មកវិញ នៃរបបខ្មែរក្រហមសម្លាប់មនុស្ស។ វិទ្យុដើរតូនាទីក្នុងការអំពាវនាវទៅលើជនវង្វេងផ្លូវ ដែលជាកម្មវិធីវិទ្យុមួយ ក្នុងការចូលរួមចំណែកលើការកាត់បន្ថយកម្លាំងរបស់ក្រុមជនវង្វេងផ្លូវ ។

ឯកឧត្ដមរដ្ឋមន្រ្ដីក្រសួងព័ត៌មានបានបញ្ជាក់បន្ថែមថា៖ «វិទ្យុចូលរួមចំណែកក្នុងការផ្តល់ការកម្សាន្ត ដោយនៅអតីតកាលគឺគ្មានការប្រគំតន្រ្ដី ហើយក៏មិនសូវមានទូរទស្សន៍មើលច្រើនគ្រប់ផ្ទះនោះដែរ តែតាមរយៈមន្ទីរឃោសនាការ នៅតាមស្រុកដែលមាន វិទ្យុបណ្តាញ គឺនៅពេលល្ងាចថ្ងៃសុក្រ ឬថ្ងៃសៅរ៍ គឺមានកម្មវិធីសិល្បៈកម្សាន្តដល់ប្រជាជន ។ ដូច្នេះហើយតាំងពីដើមមកដល់បច្ចុប្បន្ន តួនាទី និងគុណតម្លៃដ៏សំខាន់របស់វិទ្យុ ជាពិសេសវិទ្យុជាតិកម្ពុជា ដែលជាប្រព័ន្ធផ្សព្វផ្សាយបុរាណមួយប្រភេទមានអាយុកាលជាង ៤ទសវត្សរ៍ បានចូលរួមចំណែកយ៉ាងសកម្មក្នុងការកសាង ថែរក្សាសន្តិភាព និងអភិវឌ្ឍន៍ប្រទេសជាតិឱ្យមានភាពរីកចម្រើន និងសេរីភាពពេញលេញដូចនាពេល បច្ចុប្បន្ន»៕

ដោយ៖ គង់ សិរីរ័ត្ន និង រិទ្ធី, រូបថត៖ ខឹម សុវណ្ណារ៉ា