AKP ភ្នំពេញ ថ្ងៃទី០៧ ខែកុម្ភៈ ឆ្នាំ២០២៥ -- រដ្ឋមន្រ្ដីក្រសួងព័ត៌មាន និងលោកជំទាវ ឯកអគ្គរដ្ឋទូតគុយបាប្រចាំកម្ពុជាបានគូសបញ្ជាក់ពីជំហរក្នុងការបន្តពង្រឹងកិច្ចសហការរវាងទីភ្នាក់ងារសារព័ត៌មានជាតិនៃប្រទេសទាំងពីរ ក្នុងការផ្សព្វផ្សាយព័ត៌មានទៅវិញទៅមកដើម្បីឱ្យប្រជាជនកម្ពុជាយល់ដឹងនូវអ្វីដែលកើតមានឡើងនៅប្រទេសគុយបា ហើយប្រជាជនគុយបាក៏បានដឹងព័ត៌មានពីអ្វីដែលកើតមានឡើងនៅកម្ពុជា។ ការគូសបញ្ជាក់រវាងភាគីទាំងពីក្នុងការបន្តពង្រឹងពង្រីកកិច្ចសហប្រតិបត្តិការលើប្រព័ន្ធផ្សព្វផ្សាយរដ្ឋនៃប្រទេសទាំងពីរ កម្ពុជា-គុយបា បែបនេះ បានធ្វើឡើងក្នុងជំនួបពិភាក្សាការងាររវាង ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន និង លោកជំទាវ Milena Caridad Zaldívar Piedra ឯកអគ្គរដ្ឋទូតនៃសាធារណរដ្ឋគុយបាប្រចាំព្រះរាជាណាចក្រកម្ពុជា នាព្រឹកថ្ងៃទី០៧ ខែកុម្ភៈ ឆ្នាំ២០២៥ នៅទីស្តីការក្រសួងព័ត៌មាន។

ឯកឧត្ដម នេត្រ ភក្រ្ដា បានលើកឡើងអំពីទំនាក់ទំនងរវាងប្រទេសកម្ពុជា និងប្រទេសគុយបា ដែលបានបន្តពង្រីកកិច្ចសហប្រតិបត្តិការជាមួយគ្នាជាពិសេសនៅក្នុងក្របខ័ណ្ឌនៃទំនាក់ទំនងព័ត៌មានរវាងប្រទេសទាំងពីរ ដោយត្រូវធ្វើការពង្រីកទៅលើកិច្ចការងារផ្សព្វផ្សាយបន្ថែមទៀត ដើម្បីផ្សាយអំពីការពិតក្នុងប្រទេសកម្ពុជាទៅកាន់ប្រទេសគុយបា ធ្វើឱ្យប្រជាជនបានដឹង ហើយក៏ផ្សាយត្រឡប់មកវិញពីប្រទេសគុយបា ដើម្បីឱ្យប្រជាជនកម្ពុជាបាទទួលបានព័ត៌មានជាប្រចាំពីអ្វីដែលជាការវិវឌ្ឍនៃស្ថានភាពនយោបាយ សង្គមសេដ្ឋកិច្ច របស់គុយបា ឱ្យប្រជាជនកម្ពុជា បានយល់ដឹងវិញផងដែរ។ 

ឯកឧត្តមរដ្ឋមន្រ្តីក្រសួងព័ត៌មាន និងលោកជំទាវ ឯកអគ្គរដ្ឋទូតគុយបាប្រចាំកម្ពុជា បានលើឡើងនូវកិច្ចការងារសំខាន់ៗមួយចំនួន ដើម្បីបន្តពង្រឹងនិងពង្រីកកិច្ចសហប្រតិបត្តិការលើការងារផ្សព្វផ្សាយព័ត៌មានរវាងប្រទេសទាំងពីរតាមរយៈទីភ្នាក់ងារសារព័ត៌មានកម្ពុជា(AKP) និងទីភ្នាក់ងារសារព័ត៌មានគុយបា Prensa Latina (PL)។

សូមរម្លឹកផងដែរថា កាលថ្ងៃទី២៥ ខែតុលា ឆ្នាំ២០២២  ភាគីទាំងពីរក៏បានការចុះហត្ថលេខាលើអនុស្សរណៈស្តីពីការផ្លាស់ប្តូរព័ត៌មាន រវាងទីភ្នាក់ងារសារព័ត៌មានកម្ពុជា (AKP) តំណាងដោយ លោកជំទាវអគ្គនាយិកា សុខមុំ និមល និងទីភ្នាក់ងារសារព័ត៌មានគុយបា Prensa Latina (PL) តំណាងដោយ ឯកឧត្តមអគ្គនាយក Luis Enrique Gonzalez Acosta ។

ក្នុងឱកាសនោះ ឯកឧត្តម នេត្រ ភក្ត្រា បានវាយតម្លៃខ្ពស់ចំពោះកិច្ចសហប្រតិបត្តិការល្អរវាង ទីភ្នាក់ងារសារព័ត៌មានកម្ពុជា(AKP) និង ទីភ្នាក់ងារសារព័ត៌មានគុយបា Prensa Latina (PL) ដោយកន្លងមកនេះ ទីភ្នាក់ងារសារព័ត៌មាននៃប្រទេសទាំងពីរ បានធ្វើចែករំលែកធ្វើការផ្សព្វផ្សាយព័ត៌មានពីគ្នាទៅវិញទៅមក ដើម្បីអោយប្រជាជនកម្ពុជាយល់ដឹងនូវអ្វីដែលកើតមានឡើងនៅប្រទេសគុយបា ហើយប្រជាជនគុយបាក៏បានដឹងព័ត៌មានពីអ្វីដែលកើតមានឡើងនៅកម្ពុជា ។ ឯកឧត្តម នេត្រ ភក្ត្រា បានធ្វើការរម្លឹកឡើងវិញនូវអ្វីដែលប្រទេសគុយបាបានចូលរួមចំណែកក្នុងការកសាងប្រទេសកម្ពុជាឡើងវិញនូវ នៅពេលរបបខ្មែរក្រហមបានដួលរំលំ នាឆ្នាំ១៩៧៩ ។

ជាមួយគ្នានេះ លោកជំទាវ Milena Caridad Zaldivar Piedra បានសម្ដែងនូវការរីករាយដោយបានឃើញពីភាពរីកចម្រើនយ៉ាងល្អនៃកិច្ចសហការលើការផ្សព្វផ្សាយព័ត៌មាន រវាងទីភ្នាក់ងារសារព័ត៌មានគុយបា Prensa Latina (PL) ជាមួយទីភ្នាក់ងារសារព័ត៌មានកម្ពុជា (AKP) ។ 

ក្នុងជំនួបពិភាក្សាការងារនេះដែរ លោកជំទាវឯកអគ្គរដ្ឋទូតគុយបា ក៏បានគោរពអញ្ជើញ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន ដើម្បីចូលរួមនៅក្នុងកិច្ចប្រជុំកម្រិតអន្តរជាតិ "IV Patria International Colloquium" ដែលនឹងប្រព្រឹត្តទៅនៅទីក្រុងហាវ៉ាណា ប្រទេសគុយបា ចាប់ពីថ្ងៃទី១៧ ដល់ថ្ងៃទី១៩ ខែមីនា ឆ្នាំ២០២៥ ខាងមុខនេះ ៕

ដោយ៖ រិទ្ធី រូបថត៖ ខឹម សុវណ្ណារ៉ា