AKP ភ្នំពេញ ថ្ងៃទី២០ ខែមករា ឆ្នាំ២០២៥​​ --មន្រ្ដីជាន់ខ្ពស់ក្រសួងព័ត៌មានលើកឡើងថា មូលធនមនុស្សជាកត្តាដ៏សំខាន់ក្នុងការកំណត់នូវប្រសិទ្ធភាព និងស័ក្តិសិទ្ធិភាព នៃប្រតិបត្តិការស្ថាប័ន ហើយការគ្រប់គ្រងធនធានមនុស្សជាតួនាទីចម្បងក្នុងការអភិវឌ្ឍសមត្ថភាពស្ថាប័ន ដើម្បីសម្រេចបាននូវគោលដៅរួមគ្នា។ នេះគឺជាការលើកឡើងរបស់លោកជំទាវ ជា ស៊ុនដាណែត រដ្ឋលេខាធិការប្រចាំការក្រសួងព័ត៌មាននៅក្នុងសន្និបាតបូកសរុបលទ្ធផលការងារឆ្នាំ២០២៤ និងលើកទិសដៅការងារឆ្នាំ ២០២៥ របស់ក្រសួងព័ត៌មាន នាព្រឹកថ្ងៃទី២០ ខែ មករា ឆ្នាំ២០២៥នេះ នៅទីស្ដីការក្រសួងព័ត៌មាន។

លោកជំទាវ ជា ស៊ុនដាណែត បានលើកឡើងនូវផែនការសកម្មភាពស្តីពីការកសាង និងអភិវឌ្ឍន៍មូលធនមនុស្ស ក្នុងវិស័យព័ត៌មាន និងសោតទស្សន៍ ឆ្នាំ២០២៥-២០២៨ ដោយបានបញ្ជាក់ថាក្នុងវិស័យព័ត៌មាន និងសោតទស្សន៍ មូលធនមនុស្សក្នុងវិស័យនេះ ជាចលករ យ៉ាងសំខាន់ក្នុងកិច្ចសហការគ្រប់គ្រងលំហព័ត៌មាន និងសន្តិសុខព័ត៌មាន ពោលគឺព័ត៌មានដែលសម្បូណ៌បែបនិងទាន់សភាពការណ៍ ប្រកបដោយគុណភាព និងមិនបង្កនូវអរិភាពក្នុងសង្គមជាតិ។ លោកជំទាវរដ្ឋលេខាធិការប្រចាំការបានថ្លែងបញ្ជាក់ថាការយកចិត្តទុកដាក់លើការកសាង និងអភិវឌ្ឍន៍មូលធនមនុស្សក្នុងវិស័យព័ត៌មាន និងសោតទស្សន៍ ជា ភាពចាំបាច់ ក្នុងការលើកកម្ពស់នូវសណ្តាប់ធ្នាប់សារព័ត៌មាន និងការផ្សព្វផ្សាយ ប្រកបដោយគុណភាព និងសុវត្ថិភាព។ លោកជំទាវបានបន្ដថា នៅប៉ុន្មានឆ្នាំចុងក្រោយនេះ វិស័យព័ត៌មាន និងសោតទស្សន៍នៅកម្ពុជាមានការវិវត្តគួរឱ្យកត់សម្គាល់ ជាពិសេសក្នុងដំណាក់កាលនៃការរីកចម្រើនផ្នែកបច្ចេកវិទ្យា (ឌីជីថល..) ដែលបាននាំមកនូវ ការចាប់ផ្តើមនៃប្រព័ន្ធផ្សព្វផ្សាយជំនាន់ទី៥ និងការរួមចំណែកពីបច្ចេកវិទ្យានៃបញ្ញាសិប្បនិមិត្តជាដើម។ ជាមួយគ្នានេះ អនុលោមតាមយុទ្ធសាស្ត្របញ្ចកោណ ដំណាក់កាលទី១ និងផែនការអភិវឌ្ឍន៍ជាតិ (២០២៤-២០២៨) ការកសាងនិងអភិវឌ្ឍមូលធនមនុស្ស ជាអាទិភាព ដែលក្រសួងព័ត៌មានបានកំណត់ជាទិសដៅយុទ្ធសាស្ត្រក្នុងការពង្រឹងសមត្ថភាពវិជ្ជាជីវៈរបស់មន្ត្រី និងអ្នកប្រកបអាជីពក្នុងវិស័យព័ត៌មាន និងសោតទស្សន៍។

បើតាមលោកជំទាវរដ្ឋលេខាធិការប្រចាំការ ការកសាងនិងអភិវឌ្ឍមូលធនមនុស្សនឹងត្រូវពង្រឹង តាមរយៈការជ្រើសរើស និងការធ្វើទំនើបកម្មការបណ្តុះបណ្តាលនិងវិក្រឹតការវិជ្ជាជីវៈសារព័ត៌មាន បច្ចេកទេស គុណភាពព័ត៌មាន និងការគោរពក្រមសីលធម៌និងវិជ្ជាជីវៈ។ ទន្ទឹមនេះ ដើម្បីបង្កើនសមត្ថភាព រាជរដ្ឋាភិបាលកម្ពុជាតែងតែយកចិត្តទុកដាក់លើគោលនយោបាយអភិវឌ្ឍន៍ធនធានមនុស្ស ដោយផ្អែកលើចក្ខុវិស័យសេដ្ឋកិច្ច-សង្គមរបស់ប្រទេស ដើម្បីរួមចំណែកលើកស្ទួយធនធានមនុស្ស លើគ្រប់ការអភិវឌ្ឍប្រទេស។

លោកជំទាវបានបន្ដទៀតថា រាជរដ្ឋាភិបាលបានផ្តោតលើការបង្កើនសមត្ថភាព សក្តានុពលជាភាពអប់រំ ការបណ្តុះបណ្តាលបច្ចេកទេស និងជំនាញ ក៏ដូចជាការអភិវឌ្ឍសុខភាពត្ថិភាព អនុសំរិលភាពសង្គម។ បញ្ចកោណទី១ នៃយុទ្ធសាស្ត្របញ្ចកោណ ដំណាក់កាលទី១ បានកំណត់ច្បាស់ពីការអភិវឌ្ឍមូលធនមនុស្ស ដោយផ្តោតលើ៖ ការពង្រឹងគុណភាពវិស័យអប់រំ កីឡា វិទ្យាសាស្ត្រ និងបច្ចេកវិទ្យាការបណ្តុះបណ្តាលជំនាញបច្ចេកទេស ការលើកកម្ពស់សុខភាព និងសុខុមាលភាព ការពង្រឹងប្រព័ន្ធគាំពារសង្គម និងប្រព័ន្ធស្បៀង និងការពង្រឹងភាពជាប្រជាពលរដ្ឋក្នុងសង្គម។

ក្រៅពីនេះចំពោះ យុទ្ធសាស្ត្របញ្ចកោណ ដំណាក់កាលទី១ នៅតែចាត់ទុកមនុស្សជាអាទិភាពទី១ ក្នុង ការអភិវឌ្ឍ ដូចដែលបញ្ចកោណទី១ បានកំណត់ច្បាស់ពីការអភិវឌ្ឍមូលធនមនុស្ស ដែលជាមូលដ្ឋានគ្រឹះ ដ៏សំខាន់សម្រាប់ជំរុញសន្ទុះនៃការអភិវឌ្ឍកម្ពុជា។ ក្នុងន័យនេះ រាជរដ្ឋាភិបាលបានសម្រួចទិសលើ៖ ទី១. ការពង្រឹងគុណភាពវិស័យអប់រំ កីឡា វិទ្យាសាស្ត្រ និងបច្ចេកវិទ្យា ទី២. ការបណ្តុះបណ្តាល ជំនាញបច្ចេកទេស ទី៣. ការលើកម្ពស់សុខភាពនិងសុខុមាលភាព ទី៤. ការពង្រឹងប្រព័ន្ធគាំពារសង្គម និងប្រព័ន្ធស្បៀង និងទី៥. ការពង្រឹងភាពជាពលរដ្ឋក្នុងសង្គម។

ក្នុងឱកាសនោះ លោកជំទាវរដ្ឋលេខាធិការប្រចាំការបានលើកឡើងផងដែរពីទិសដៅពង្រឹងសមត្ថភាពស្ថាប័ន គុណភាពមន្ត្រី ប្រសិទ្ធភាពការងារ និងយុទ្ធសាស្ត្រអភិវឌ្ឍន៍មូលធនមនុស្ស។ក្រៅពីនេះក៏បានដាក់ទិសដៅពង្រឹងសមត្ថភាពស្ថាប័ន គុណភាពមន្ត្រី និងប្រសិទ្ធភាពការងារ,យុទ្ធសាស្ត្រអភិវឌ្ឍន៍មូលធនមនុស្សនិង ការកសាង និងអភិវឌ្ឍន៍ជំនាញវិជ្ជាជីវៈជាដើម៕

ដោយ៖ ដេប៉ូ