AKP ភ្នំពេញ ថ្ងៃទី០៧ ខែមករា ឆ្នាំ២០២៥--សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា និងជាប្រធាន​គណបក្សប្រជាជនកម្ពុជាបានថ្លែងថា ស្នាមញញឹម៧មករា បានជិតជាប់ជានិច្ចក្នុងដួងចិត្តរបស់ខ្មែរ​គ្រប់​រូប​ដែលបានរស់ឡើងវិញ។ អាស្រ័យហេតុនេះ ប្រជាជនកម្ពុជាបានប្រសិទ្ធនាមថា «ថ្ងៃ៧មករា គឺជា​ថ្ងៃ​កំណើតទីពីររបស់ខ្លួន»។

ក្នុងពីធីមិទ្ទីងរម្លឹកខួបលើកទី៤៦ នៃទិវាជ័យជម្នះ៧មករា (០៧.០១.១៩៧៩-០៧.០១.២០២៥) នាព្រឹក​​ថ្ងៃទី០៧ ខែមករា ឆ្នាំ២០២៥ នៅបរិវេណខាងមុខសាលមហោស្រពកោះពេជ្រ ដែលមានអ្នក​ចូលរួម ប្រមាណជាង២ម៉ឺននាក់នោះ សម្ដេចតេជោ ហ៊ុន សែន មាន ប្រសាសន៍រម្លឹកថា  ព្រឹត្តិការណ៍​រដ្ឋ​ប្រហារ​នៅថ្ងៃ១៨ មីនា ឆ្នាំ១៩៧០ របស់ពួក លន់ នល់ ដែលបានដើរតាមខ្សែញាក់របស់បរទេស បាន​រុញច្រានកម្ពុជាឱ្យធ្លាក់ក្នុងភ្លើងសង្គ្រាមដ៏សន្ធោរសន្ធៅបំផុត ដែលបានសម្លាប់ប្រជាជនកម្ពុជាជិត​១លាន​នាក់ និងបំផ្លាញរចនាសម្ព័ន្ធសង្គមជាតិឱ្យវិនាសខ្ទេចខ្ទី។ សម្ដេចតេជោលើកឡើងថា បន្ទាប់ពីការដួល​រលំ​នៃ របបសាធារណរដ្ឋខ្មែររបស់ពួកលន់ នល់ នៅថ្ងៃ ១៧ មេសា ឆ្នាំ ១៩៧៥ ក្រោមកម្លាំងតស៊ូរំដោះជាតិ​របស់ ប្រជាជនដើម្បីឯករាជ្យ សន្តិភាព និងសេរីភាព គ្រោះមហន្តរាយថ្មីមួយ ទៀតក៏បានមកដល់ភ្លាម។ សម្ដេចតេជោបន្ដថា ពួក ប៉ុល ពត ដែលក្បត់នឹងឆន្ទៈ និងផលប្រយោជន៍របស់ប្រជាជនបានប្លន់យកទាំង​ស្រុង​នូវសមិទ្ធផល​នៃការតស៊ូ របស់ប្រជាជន ហើយអនុវត្តយោបាយប្រល័យពូជសាសន៍យ៉ាងសាហាវ​ឃោរឃៅ​បំផុត។ ជាមួយគ្នានេះ ទឹកដីកម្ពុជា ទាំងមូលបានក្លាយជាគុកឥតជញ្ជាំង និងជាវាលពិឃាត​ដែល​​ត្រូវ​លិចលង់ក្នុងសមុទ្រឈាម និងទឹកភ្នែក របស់ប្រជាជន។ សម្ដចតេជោបានបន្ដទៀតថា របប ប៉ុល ពត បានសម្លាប់ប្រជាជនកម្ពុជាអស់ ៣លាន ៣សែននាក់ យ៉ាងព្រៃផ្សៃបំផុត ឯអ្នកនៅសេសសល់​ក៏ត្រូវរស់​នៅក្នុងភាពភ័យខ្លាច ដែលរង់ចាំតែពេលត្រូវពួកវាយកទៅសម្លាប់ប៉ុណ្ណោះ។ នៅក្នុងកាលៈ​ទេសៈដ៏ធ្ងន់ធ្ងរបំផុតនេះ ចលនាតស៊ូឆ្ពោះទៅរកការសង្គ្រោះជាតិពីរបបប្រល័យពូជសាសន៍បានកើតមាន​ជាបន្តបន្ទាប់។

សម្ដេចតេជោប្រធានគណបក្សប្រជាជនកម្ពុជាបានគូសបញ្ជាក់ថា នៅថ្ងៃ ២០មិថុនា ឆ្នាំ១៩៧៧ សម្ដេច បានសម្រេចចាកចេញទៅប្រទេសវៀតណាម យកជីវិតធ្វើជាដើមទុនស្វែងរកការជួយឧបត្ថម្ភក្នុងការតស៊ូ​រំដោះ​ប្រទេសជាតិ ពីរបបវាលពិឃាដនេះ។ ក្រោយឆ្លងកាត់ឧបសគ្គយ៉ាងច្រើន និងទទួលបានជំនួយពី​ប្រទេស​វៀតណាម កងកម្លាំង ប្រដាប់អាវុធសាមគ្គីសង្គ្រោះជាតិកម្ពុជាក៏ត្រូវបានបង្កើតឡើងនៅ ថ្ងៃទី១២ ខែឧសភា ឆ្នាំ១៩៧៨។ ជាមួយ គ្នានេះ នៅក្នុងប្រទេស កងទ័ព និងប្រជាជននៅទូទាំងភូមិភាគបូព៌ា បានក្រោកឈរតស៊ូប្រឆាំង ប៉ុល ពត នៅ ថ្ងៃទី ២៥ ខែឧសភា ឆ្នាំ ១៩៧៨ ក្រោមការដឹកនាំរបស់ សម្តេច ហេង សំរិន និងសម្តេច ជា ស៊ីម។ សម្ដេចតេជោរម្លឹកបន្ដថា ការរួបរួមនៃកម្លាំងប្រឆាំង ប៉ុល ពត ពីគ្រប់​ទិសទីបានបង្កើតឡើងនូវ រណសិរ្សសាមគ្គីសង្គ្រោះជាតិកម្ពុជា នៅថ្ងៃ ២ ធ្នូ ឆ្នាំ១៩៧៨ ដែលបានបំផុស ប្រមូលផ្តុំ និងចាត់តាំងចលនាប្រជាជនធ្វើការប្រយុទ្ធដើម្បីផ្តួលរំលំ របប ប៉ុល ពត។ នៅក្នុងមហា​ចលនា​នេះ កម្លាំងផ្ទាល់របស់កម្ពុជាដែលបានរីកធំធាត់យ៉ាងរហ័ស រួមជាមួយ ការជួយឧបត្ថម្ភរបស់របស់កងទ័ព​ស្ម័គ្រ​ចិត្ត​វៀតណាម បានសម្រេចជ័យជម្នះដ៏ត្រចះត្រចង់នាថ្ងៃ ៧មករា ឆ្នាំ ១៩៧៩ ដែលបានសង្គ្រោះ​អាយុជីវិតរបស់ប្រជាជនរាប់លាននាក់ពីមាត់ជ្រោះមរណៈបានទាន់ពេលវេលា និងបាននាំមកជូនប្រ​ជាជន​វិញនូវសិទ្ធិសេរីភាពគ្រប់យ៉ាង ដែលត្រូវបាត់បង់ទាំងស្រុងក្នុងរបប ប៉ុល ពត។ ប្រជាជនកម្ពុជាទូទាំង​ប្រទេសបានសម្តែងអំណរសាទរចំពោះយុទ្ធជនរណសិរ្ស ដោយក្តីរំភើបរីករាយជាទីបំផុត។

ក្នុងឱកាសនោះ សម្ដេចតេជោគូសបញ្ជាក់បន្ថែមថា បន្ទាប់ពីថ្ងៃជ័យជម្នះ ៧មករា គណបក្សប្រជាជន​កម្ពុជា បានដឹកនាំ «សាធារណរដ្ឋប្រជាមានិតកម្ពុជា» ឆ្លងកាត់ឧបសគ្គយ៉ាងច្រើនឥតគណនា ដើម្បីទប់​ស្កាត់​ការប៉ុនប៉ងវិលត្រឡប់នៃរបប ប៉ុល ពត ការពារការរស់ឡើងវិញរបស់ប្រជាជន និងស្តារ កសាងមាតុ​ភូមិឡើងវិញពីបាតដៃទទេ ក្នុងស្ថានភាពមានសន្តិភាពផង និងសង្គ្រាមផង។ សម្ដេចតេជោអះអាងផង​ដែរថា ជោគជ័យដែលរដ្ឋកម្ពុជា​សម្រេចបានក្នុងរយៈពេល ៨ឆ្នាំ ក្រោយថ្ងៃរំដោះ បានបង្កបុព្វបទ និង​លក្ខណៈសម្បត្តិជាមូលដ្ឋានសម្រាប់ការស្វែងរកដំណោះស្រាយ ចំពោះជម្លោះនៅកម្ពុជាតាមផ្លូវ​នយោ​បាយ ដែលបានចាប់ផ្តើមពីជំនួបចរចាលើកដំបូងរវាងសម្ដេច និងសម្តេចព្រះនរោត្តម សីហនុ ពីថ្ងៃទី ០២ ដល់ថ្ងៃទី ០៤ ខែធ្នូ ឆ្នាំ១៩៨៧ នៅ Fere-en-Tardenois ប្រទេសបារាំង រហូតឈានដល់ការ សម្រេច​បានកិច្ចព្រមព្រៀងសន្តិភាពទីក្រុងប៉ារីសនៅ ថ្ងៃទី២៣ ខែតុលា ឆ្នាំ១៩៩១ ដែលជារបត់ដ៏សំខាន់ និង​វិជ្ជមានមួយក្នុងប្រវត្តិសាស្ត្ររបស់កម្ពុជា។ ក្រោយពីការបោះឆ្នោតជាតិលើកទី១ នាខែឧសភា ឆ្នាំ១៩៩៣ ព្រះរាជាណាចក្រកម្ពុជា បានបន្តជំហានទៅមុខប្រកបដោយក្តីសង្ឃឹមលើមាគ៌ាសន្តិភាព បង្រួប បង្រួម​ជាតិ ប្រជាធិបតេយ្យ និងអភិវឌ្ឍន៍ ប៉ុន្តែនៅតែត្រូវប្រឈមនឹងឧបសគ្គធំៗជាច្រើន ដែលបណ្តាលមក ទាំងពីកត្តាផ្ទៃក្នុងផង និងពីកត្តាខាងក្រៅផង ជាពិសេសពួកឧទ្ទាមកម្ពុជាប្រជាធិបតេយ្យ ដែលបានដើរ​ចេញពីកិច្ចព្រមព្រៀងសន្តិភាពទីក្រុងប៉ារីស នៅតែបន្តបង្កសង្គ្រាមបំផ្លិចបំផ្លាញឥតឈប់ឈរ។

សម្ដេចតេជោ ហ៊ុន សែន បានថ្លែងបញ្ជាក់ឱ្យដឹងទៀតថា ក្នុង​បរិការណ៍នេះ នៅថ្ងៃទី១១ ខែកុម្ភៈ ឆ្នាំ ១៩៩៦ សម្ដេចបានដាក់ចេញនូវនយោបាយ ឈ្នះ ឈ្នះ ដើម្បី​ដោះ ស្រាយបញ្ចប់បញ្ហា​សង្គ្រាមដោយ​ខ្មែរ​ខ្លួនឯង ហើយខ្មែរទាំងមូល គឺជាអ្នកឈ្នះ ដែលនៅទីបំផុតបាន​ធ្វើ​ឱ្យរលំរលាយជាស្ថាពរនូវអង្គការចាត់​តាំង​នយោបាយ និងយោធារបស់ពួកឧទ្ទាមកម្ពុជាប្រជាធិបតេយ្យ បញ្ចប់សង្គ្រាមដ៏រ៉ាំរ៉ៃ បង្កើតបានសន្តិ​ភាព​ពេញលេញ និងឯកភាពជាតិ ឯកភាពទឹកដីទាំងស្រុងចាប់ពី ថ្ងៃទី ២៩ ខែ ធ្នូ ឆ្នាំ ១៩៩៨ មក។ នេះជាសន្តិភាពពេញលេញលើកដំបូងដែល​កម្ពុជាពុំធ្លាប់មានឡើយ​ក្នុងរយៈពេលជាង ៥០០ឆ្នាំ ចុង​ក្រោយ​នៃប្រវត្តិសាស្ត្ររបស់ខ្លួន៕

ដោយ៖ ជឹម ណារី