AKP ភ្នំពេញ ថ្ងៃទី០៣ ខែមករា ឆ្នាំ២០២៥ -- យោងតាមសេចក្តីថ្លែងការណ៍ដែលចេញដោយគណៈរដ្ឋមន្ត្រីអេហ្ស៊ីប បានឱ្យដឹងថា នាយករដ្ឋមន្ត្រីអេហ្ស៊ីប លោក មូស្ដាហ្វា ម៉ាដប៊ូលី (Mostafa Madbouly) បាននិយាយថា ប្រទេសនេះទទួលបានភ្ញៀវទេសចរកម្រិតខ្ពស់បំផុតចំនួន ១៥,៧លាននាក់ក្នុងឆ្នាំ២០២៤។

លោក ម៉ាដប៊ូលី បានប្រាប់សន្និសីទសារព័ត៌មានប្រចាំសប្តាហ៍នៅក្នុងរដ្ឋធានីរបស់ប្រទេសអេហ្ស៊ីបនៅភាគខាងកើតទីក្រុងគែរថា «ប្រសិនបើមិនមានព្រឹត្តិការណ៍ដែលបានកើតឡើងនៅក្នុងតំបន់ទេ ចំនួនអ្នកទេសចរនឹងកើនឡើងដល់ ១៨លាននាក់»។

លោក ម៉ាដប៊ូលី បានសម្តែងក្តីសង្ឃឹមថា ប្រទេសអេហ្ស៊ីបនឹងសម្រេចបាននូវគោលដៅចំនួនអ្នកទេសចរដល់ ១៨លាននាក់នៅឆ្នាំ២០២៥ «ជាពិសេសជាមួយនឹងការរំពឹងទុកនៃការបើកជាផ្លូវការនៃសារមន្ទីរ Grand Egyptian ក្នុងឆ្នាំនេះ»។

យោងតាមទិន្នន័យផ្លូវការ បានឱ្យដឹងថា ចំនួនអ្នកទេសចរនៅក្នុងប្រទេសអេហ្ស៊ីបបានធ្លាក់ចុះយ៉ាងខ្លាំងពីជាង ១៣លាននាក់ក្នុងឆ្នាំ២០១៩ មកនៅប្រហែល ៣,៧លាននាក់ក្នុងឆ្នាំ២០២០ ដោយសារជំងឺរាតត្បាតកូវីដ-១៩ បន្ទាប់មកវាបានធូរស្បើយបន្តិចម្តងៗដល់ប្រហែល ៨លាននាក់ក្នុងឆ្នាំ២០២១ ហើយ១១,៧លាននាក់ក្នុងឆ្នាំ២០២២ និង១៤,៩លាននាក់នៅឆ្នាំ២០២៣។

វិស័យទេសចរណ៍ គឺជាប្រភពរូបិយប័ណ្ណបរទេសដ៏សំខាន់មួយរបស់ប្រទេសអេហ្ស៊ីប រួមជាមួយនឹងប្រាក់ចំណូលពីព្រែកជីកស៊ុយអេ ការនាំចេញ និងការផ្ទេរប្រាក់ពីជនបរទេសអេហ្ស៊ីប៕

ដោយ៖ មូល មិនា (ប្រភព៖ ស៊ីនហួ)