AKP ភ្នំពេញ ថ្ងៃទី២៧ ខែតុលា ឆ្នាំ២០២៦–ឯកឧត្តមបណ្ឌិត ធន់ វឌ្ឍនា អនុប្រធានទី២ ព្រឹទ្ធសភា ថ្ងៃទី២៦ ខែតុលា ឆ្នាំ២០២៦ បានដឹកនាំកិច្ចប្រជុំប្រចាំខែរបស់ខុទ្ទកាល័យ ដើម្បីពិភាក្សាអំពីការពង្រឹងការសិក្សាស្រាវជ្រាវ និងពង្រីកកិច្ចសហការជាមួយស្ថាប័នពាក់ព័ន្ធ សំដៅផ្តល់ព័ត៌មាន ទិន្នន័យ និងភស្តុតាងជាក់ស្តែង ជាមូលដ្ឋានសម្រាប់គាំទ្រមុខងារនីតិកម្ម និងការតាមដានការអនុវត្តច្បាប់របស់ព្រឹទ្ធសភា។

អង្គប្រជុំបានគូសបញ្ជាក់ថា ការវិវត្តនៃស្ថានភាពសេដ្ឋកិច្ច និងសង្គមទាមទារឱ្យមានការសិក្សាស្រាវជ្រាវ និងវិភាគកាន់តែស៊ីជម្រៅ ដើម្បីលើកកម្ពស់គុណភាពនៃការពិនិត្យ និងផ្តល់យោបល់លើសេចក្តីព្រាងច្បាប់ ព្រមទាំងគាំទ្រដល់ការតាមដានការអនុវត្តច្បាប់ បទដ្ឋានគតិយុត្តក្រោមច្បាប់ គោលនយោបាយជាតិ និងយុទ្ធសាស្ត្រអភិវឌ្ឍន៍នានារបស់រាជរដ្ឋាភិបាល ដែលជាកិច្ចការសំខាន់សម្រាប់សមាជិកព្រឹទ្ធសភាក្នុងការស្វែងយល់ពីវឌ្ឍនភាព សមិទ្ធផល និងបញ្ហាប្រឈមនៅតាមវិស័យនានា ដោយផ្អែកលើទិន្នន័យ និងភស្តុតាងជាក់ស្តែងសម្រាប់ការពិភាក្សា និងផ្តល់យោបល់ប្រកបដោយប្រសិទ្ធភាព និងស័ក្តិសិទ្ធភាព។

ក្នុងន័យនេះ ឯកឧត្តមបណ្ឌិត អនុប្រធានទី២ ព្រឹទ្ធសភា បានលើកទឹកចិត្តឱ្យក្រុមការងាររៀបចំបញ្ជីប្រធានបទស្រាវជ្រាវអាទិភាព និងពង្រីកកិច្ចសហការជាមួយសាកលវិទ្យាល័យ ស្ថាប័នជំនាញ និងអង្គការពាក់ព័ន្ធ ដោយផ្តោតលើការសិក្សាស្ថានភាពជាក់ស្តែងក្នុងវិស័យកសិកម្ម ឧស្សាហកម្ម និងសេវាកម្ម ព្រមទាំងវាយតម្លៃប្រសិទ្ធភាពនៃការអនុវត្តច្បាប់ និងគោលនយោបាយពាក់ព័ន្ធ។

អង្គប្រជុំបានសង្កត់ធ្ងន់ថា លទ្ធផលស្រាវជ្រាវនឹងជួយសមាជិកព្រឹទ្ធសភាក្នុងការផ្តល់អនុសាសន៍ និងប្រឹក្សាយោបល់ជូនរាជរដ្ឋាភិបាល ព្រមទាំងគាំទ្រដល់ការរៀបចំសំណើគោលនយោបាយនាពេលអនាគត។ ឯកឧត្តមបណ្ឌិត ធន់ វឌ្ឍនា បានលើកទឹកចិត្តមន្ត្រីទាំងអស់ឱ្យបន្តចែករំលែកចំណេះដឹង រក្សាសាមគ្គីភាព និងបំពេញភារកិច្ចតាមតួនាទី និងការទទួលខុសត្រូវរៀងៗខ្លួន ដើម្បីរួមចំណែកដល់ការអភិវឌ្ឍប្រទេសជាតិប្រកបដោយចីរភាព និងបរិយាបន្ន។

ដោយ៖ ចាន់ សុភឿន (ប្រភព៖ ព្រឹទ្ធសភា)