AKPកំពង់ធំថ្ងៃទី១៥ខែតុលា ឆ្នាំ២០២៦--លោក ប៉ែន វណ្ណរិទ្ធ ប្រធានមន្ទីរកសិកម្ម រុក្ខាប្រមាញ់និងនេសាទខេត្តកំពង់ធំបានជំរុញឱ្យមន្ត្រីជំនាញខណ្ឌរដ្ឋបាលជលផលបន្តពង្រឹងការចុះត្រួតពិនិត្យនិងបង្ក្រាបបទល្មើសជលផល ដើម្បីចូលរួមថែរក្សាការពារធនធានជលផល។

កាលពីថ្ងៃទី១៤ខែតុលាឆ្នាំ២០២៦លោក យ៉េង យ៉ាន នាយសង្កាត់រដ្ឋបាលជល ផលស្ទឹងសែន សហការជាមួយលោក សៀង ហុកឃាន់ មេបញ្ជាការផ្នែក សឹករងក្រុងស្ទឹងសែននិងមន្ត្រីជំនាញចុះត្រួតពិនិត្យនិងបង្ក្រាបបទល្មើសជលផលនៅតំបន់វាលក្រោម ក្នុងភូមិសាស្ត្រសង្កាត់ស្រយ៉ូវ ក្រុងស្ទឹងសែន ខេត្តកំពង់ធំស្ថិតនៅភាគខាងជើងគោកព្រះ ជាប់ព្រំប្រទល់ស្រុកកំពង់លែងខេត្តកំពង់ឆ្នាំងដោយបានដកហូតឧបករណ៍នេសាទខុសច្បាប់មួយចំនួនរួមមាន៖របាំងស្បៃមុងប្រវែង ១.០៥០ម៉ែត្រឡុកចំនួន៤០គ្រឿង លូស្បៃមុងចំនួន៤៥ មាត់និងបង្គោលចំនួន៩៥០ដើម។

លោក យ៉េង យ៉ាន នាយសង្កាត់រដ្ឋបាលជលផលស្ទឹងសែនបានបញ្ជាក់ថាសកម្មភាពនេះជាផ្នែកមួយនៃការចូលរួមទប់ស្កាត់ និងបង្ក្រាបបទល្មើសជលផល ព្រមទាំងការពារធនធានជលផលឱ្យបានគង់វង្សសម្រាប់ប្រជាពលរដ្ឋនិងមនុស្សជំនាន់ក្រោយ៕

ដោយ៖ ស៊ុម វណ្ណា