AKP បន្ទាយមានជ័យ ថ្ងៃទី៧ ខែតុលា ឆ្នាំ២០២៦-- ក្រុមការងារសុវត្ថិភាពចរាចរណ៍នៃមន្ទីរសាធារណការ និងដឹកជញ្ជូនខេត្តបន្ទាយមានជ័យ ដឹកនាំដោយលោក សុក ចាន់ថា ប្រធានមន្ទីរ នៅព្រឹកថ្ងៃពុធ ទី៧ ខែតុលា ឆ្នាំ២០២៦ បានចុះអប់រំ និងផ្សព្វផ្សាយច្បាប់សុវត្ថិភាពចរាចរណ៍ផ្លូវគោក ដល់ប្រជាពលរដ្ឋ និងអ្នកធ្វើដំណើរតាមដងផ្លូវ ដើម្បីចូលរួមបង្ការ និងកាត់បន្ថយគ្រោះថ្នាក់ចរាចរណ៍ ជាពិសេសក្នុងឱកាសបុណ្យភ្ជុំបិណ្ឌ ដែលប្រជាពលរដ្ឋធ្វើដំណើរទៅមកកាន់តែច្រើន។

សកម្មភាពអប់រំ និងផ្សព្វផ្សាយនេះ ត្រូវបានធ្វើឡើងនៅចំណុចភ្លើងស្តុប លើកំណាត់ផ្លូវជាតិលេខ៥ ស្ថិតក្នុងក្រុងសិរីសោភ័ណ ខេត្តបន្ទាយមានជ័យ។ ក្រុមការងារបានចុះជួបផ្ទាល់ជាមួយអ្នកបើកបរ អ្នករួមដំណើរ និងប្រជាពលរដ្ឋ ដើម្បីណែនាំអំពីការអនុវត្តច្បាប់ចរាចរណ៍ ការប្រុងប្រយ័ត្នក្នុងពេលបើកបរ និងការគោរពសិទ្ធិអ្នកប្រើប្រាស់ផ្លូវរួមគ្នា។

លោក សុក ចាន់ថា បានមានប្រសាសន៍ថា ការចុះអប់រំផ្សព្វផ្សាយសុវត្ថិភាពចរាចរណ៍នេះ មានសារៈសំខាន់ជាពិសេសនៅមុន និងក្នុងអំឡុងពេលបុណ្យភ្ជុំបិណ្ឌ ព្រោះជាឱកាសដែលប្រជាពលរដ្ឋមកពីតំបន់នានា តែងធ្វើដំណើរទៅស្រុកកំណើត ទៅវត្តអារាម និងទៅកាន់ទីកន្លែងផ្សេងៗជាច្រើន ដែលធ្វើឱ្យចរាចរណ៍នៅលើដងផ្លូវមានសភាពមមាញឹកជាងធម្មតា។
លោកប្រធានមន្ទីរបានអំពាវនាវដល់អ្នកបើកបរ និងអ្នកធ្វើដំណើរទាំងអស់ ត្រូវបង្កើនការប្រុងប្រយ័ត្នខ្ពស់ គោរពច្បាប់ចរាចរណ៍ផ្លូវគោក គោរពសិទ្ធិអ្នកដទៃ និងមិនត្រូវប្រើប្រាស់ល្បឿនលឿនហួសកំណត់ ឬប្រព្រឹត្តសកម្មភាពណាមួយដែលអាចបង្កគ្រោះថ្នាក់ដល់ខ្លួនឯង និងអ្នកដទៃ។

លោកបានបញ្ជាក់ថា «ការធ្វើដំណើរប្រកបដោយសុវត្ថិភាពមិនមែនជាការទទួលខុសត្រូវរបស់បុគ្គលណាម្នាក់តែឯងនោះទេ ប៉ុន្តែជាការចូលរួមរបស់អ្នកប្រើប្រាស់ផ្លូវគ្រប់រូប»។ ដូច្នេះ អ្នកបើកបរត្រូវមានស្មារតីទទួលខុសត្រូវ គោរពស្លាកសញ្ញាចរាចរណ៍ ភ្លើងសញ្ញាចរាចរណ៍ និងបញ្ជារបស់សមត្ថកិច្ច ព្រមទាំងត្រូវយកចិត្តទុកដាក់ចំពោះសុវត្ថិភាពអ្នកដំណើរ និងអ្នកថ្មើរជើង។

លោក សុក ចាន់ថា ក៏បានគូសបញ្ជាក់ថា គោលដៅសំខាន់នៃការចុះផ្សព្វផ្សាយនេះ គឺចង់ឱ្យប្រជាពលរដ្ឋកាន់តែយល់ច្បាស់ថា ការគោរពច្បាប់ចរាចរណ៍ គឺជាវិធានការដ៏សំខាន់បំផុតមួយក្នុងការការពារអាយុជីវិត និងទ្រព្យសម្បត្តិរបស់ខ្លួន និងអ្នកដទៃ។ ជាមួយគ្នានេះ ការអប់រំជាបន្តបន្ទាប់ ក៏ជាមធ្យោបាយមួយក្នុងការកសាងវប្បធម៌គោរពច្បាប់ និងសុវត្ថិភាពចរាចរណ៍នៅក្នុងសង្គម។

ក្នុងឱកាសនោះ ក្រុមការងារក៏បានណែនាំដល់អ្នកបើកបរឱ្យពិនិត្យស្ថានភាពយានយន្តឱ្យបានត្រឹមត្រូវមុនពេលចេញដំណើរ បើកបរដោយមានការប្រុងប្រយ័ត្ន មិនបើកបរក្នុងស្ថានភាពស្រវឹង មិនប្រើប្រាស់ទូរស័ព្ទពេលកំពុងបើកបរ និងត្រូវពាក់មួកសុវត្ថិភាពសម្រាប់អ្នកជិះម៉ូតូ ព្រមទាំងគោរពល្បឿនកំណត់ និងច្បាប់អាទិភាពនៅតាមផ្លូវប្រសព្វនានា។

សកម្មភាពនេះ ក៏មានការចូលរួមសហការពីកងកម្លាំងនគរបាលចរាចរណ៍ផ្លូវគោកខេត្ត និងសាខាកាកបាទក្រហមកម្ពុជាខេត្តបន្ទាយមានជ័យ ដែលបានរួមគ្នាផ្សព្វផ្សាយ និងលើកកម្ពស់ការយល់ដឹងអំពីសុវត្ថិភាពចរាចរណ៍ដល់ប្រជាពលរដ្ឋ និងអ្នកធ្វើដំណើរ។

លោក សុក ចាន់ថា បានបន្ថែមថា ការចុះអប់រំផ្សព្វផ្សាយនេះ នឹងរួមចំណែកដល់ការបង្ការ និងកាត់បន្ថយគ្រោះថ្នាក់ចរាចរណ៍នៅលើដងផ្លូវ ជាពិសេសក្នុងអំឡុងពេលដែលប្រជាពលរដ្ឋធ្វើដំណើរច្រើនក្នុងឱកាសបុណ្យភ្ជុំបិណ្ឌ។ លោកសង្ឃឹមថា ប្រជាពលរដ្ឋគ្រប់រូបនឹងចូលរួមអនុវត្តច្បាប់ចរាចរណ៍ដោយស្មារតីទទួលខុសត្រូវ ដើម្បីឱ្យការធ្វើដំណើរទៅកាន់ស្រុកកំណើត វត្តអារាម និងទីកន្លែងផ្សេងៗ ប្រកបដោយសុវត្ថិភាព សុខសាន្ត និងជៀសផុតពីគ្រោះថ្នាក់៕

ដោយ ឈុន សារ៉ាត